परमेसवर हमेशा अपणे माणसां कै गैल सै
1 हे याकूब तेरा सृजनहार यहोवा, अर हे इस्राएल तेरा रचणआळा, इब न्यू कहवै सै, "ना डरै, क्यूँके मन्नै तेरे ताहीं छुड़ा लिया सै; मन्नै तेरे ताहीं नाम लेकै बुलाया सै, तू मेरा ए सै। 2 जिब तू पाणी म्ह तै होकै चाल्लै, तो मै तेरै साथ-साथ रहूँगा अर जिब तू नदियाँ म्ह तै होकै चाल्लै, फेर वे तेरे ताहीं ना डुबा सकैगी; जिब तू आग म्ह तै चाल्लै फेर तेरे ताहीं आँच ना लाग्गैगी, अर उसकी लौ तेरे ताहीं ना जळा सकैगी।
18 पर यहोवा न्यू कहवै सै "इब बीत्ती होई घटना नै याद ना करो, ना पुराणे बखत की बात्तां पै मन लगाओ। 19 देक्खो, मै एक नई बात करुँ सूं; वो इब्बे जाहिर होवैगी, के थम उसतै अनजाण रहोगे? मै जंगळ म्ह एक राह बणाऊँगा अर निर्जल देश म्ह नदियाँ बहाऊँगा।