Isaías 43

परमेसवर हमेशा अपणे माणसां कै गैल सै

1 हे याकूब तेरा सृजनहार यहोवा, अर हे इस्राएल तेरा रचणआळा, इब न्यू कहवै सै, "ना डरै, क्यूँके मन्‍नै तेरे ताहीं छुड़ा लिया सै; मन्‍नै तेरे ताहीं नाम लेकै बुलाया सै, तू मेरा ए सै। 2 जिब तू पाणी म्ह तै होकै चाल्‍लै, तो मै तेरै साथ-साथ रहूँगा अर जिब तू नदियाँ म्ह तै होकै चाल्‍लै, फेर वे तेरे ताहीं ना डुबा सकैगी; जिब तू आग म्ह तै चाल्‍लै फेर तेरे ताहीं आँच ना लाग्गैगी, अर उसकी लौ तेरे ताहीं ना जळा सकैगी। 3 क्यूँके मै यहोवा तेरा परमेसवर सूं, इस्राएल का पवित्र मै तेरा उद्धारकर्ता सूं, तेरे ताहीं छुड़ाण म्ह मै मिस्र नै अर तेरै बदलै कूश अर सबा देशां ताहीं देऊँ सूं।