Isaías 43

परमेसवर हमेशा अपणे माणसां कै गैल सै

1 हे याकूब तेरा सृजनहार यहोवा, अर हे इस्राएल तेरा रचणआळा, इब न्यू कहवै सै, "ना डरै, क्यूँके मन्‍नै तेरे ताहीं छुड़ा लिया सै; मन्‍नै तेरे ताहीं नाम लेकै बुलाया सै, तू मेरा ए सै। 2 जिब तू पाणी म्ह तै होकै चाल्‍लै, तो मै तेरै साथ-साथ रहूँगा अर जिब तू नदियाँ म्ह तै होकै चाल्‍लै, फेर वे तेरे ताहीं ना डुबा सकैगी; जिब तू आग म्ह तै चाल्‍लै फेर तेरे ताहीं आँच ना लाग्गैगी, अर उसकी लौ तेरे ताहीं ना जळा सकैगी। 3 क्यूँके मै यहोवा तेरा परमेसवर सूं, इस्राएल का पवित्र मै तेरा उद्धारकर्ता सूं, तेरे ताहीं छुड़ाण म्ह मै मिस्र नै अर तेरै बदलै कूश अर सबा देशां ताहीं देऊँ सूं। 4 मेरी नजर म्ह तू अनमोल अर आदरणीय ठहरया सै अर मै तेरे तै प्यार करुँ सूं, इस करकै मै तेरै बदलै माणसां नै अर तेरे प्राण कै बदलै म्ह राज्य-राज्य के माणसां नै दे दियुँगा। 5 ना डरै, क्यूँके मै तेरै गैल सूं; मै तेरे वंश नै पूर्व तै ले आऊँगा, अर पश्चिम तै भी कठ्ठा करुँगा। 6 मै उत्तर तै कहूँगा, ‘दे दे’, अर दक्षिण तै के ‘रोक्‍के ना राक्खै;’ मेरे बेट्यां नै दूर तै अर मेरी बेटियाँ नै धरती की छोर तै ले आओ; 7 हर एक तै जो मेरा कुहवावै सै, जिस ताहीं मन्‍नै अपणी महिमा कै खात्तर सिरज्या, जिस ताहीं मन्‍नै रच्या अर बणाया सै।"

इस्राएल परमेसवर का गवाह

8 आँख रहन्दे होए आंध्याँ तै अर कान होन्दे होए बहरां ताहीं लिकाड़ ले आओ! 9 जात-जात के माणस कठ्ठे करे जावैं अर राज्य-राज्य के माणस कठ्ठे हों। उन म्ह तै कौण या बात बता सकै सै*43:9 कौण या बात बता सकै सै उन म्ह तै कौण सै जो इस हालात का बीत्ती होई बात्तां का हिसाब लगा सकै सै? कौण सै जो आण आळी घटना नै बता सकै सै। उरै इसका मतलब सै के यहोवा नै इसा करया सै जो गैर जात्ति देवी-देवता कदे भी न्ही कर सकदे। या बीत्ती होई बात हमनै सुणा सकै सै? वे अपणे गवाह ले आवैं जिसतै वे सच्‍चे ठहरै, वे सुण लें अर कहवैं, यो सच सै। 10 यहोवा की वाणी सै*43:10 यूह. 1:7,8; यशा. 45:6, "थम मेरे गवाह सों अर मेरे दास सों, जिन ताहीं मन्‍नै इस करकै चुण्या सै ताके समझकै मेरा बिश्वास करो अर यो जाण ल्यो के मै वोए सूं। मेरे तै पैहल्या कोए परमेसवर न्ही होया अर ना मेरै बाद कोए होवैगा। 11 मै ए यहोवा सूं अर मेरे ताहीं छोड़ कोए उद्धारकर्ता न्ही। 12 मन्‍नै ए खबर दी अर उद्धार करया अर बखान भी करया, जिब थारे बीच म्ह कोए पराया देवता न्ही था; इस करकै थम ए मेरे गवाह सों," यहोवा की या वाणी सै। 13 "मै ए परमेसवर सूं*43:13 मै ए परमेसवर सूं 1 तीमुथि. 1:17; रोम. 9:18,19 अर भविष्य म्ह भी मै ए सूं; मेरे हाथ तै कोए छुड़ा न्ही सकैगा; जिब मै काम करणा चाहूँ फेर कौण मेरै ताहीं रोक सकैगा।"

बाबेल तै बच जाणा

14 थारा छुड़ाण आळा अर इस्राएल का पवित्र परमेसवर न्यू कहवै सै, "थारे खात्तर मन्‍नै बाबेल ताहीं भेज्या सै, अर उसके सारे रहण आळयां नै भगोड्यां की हालत म्ह अर कसदियाँ नै भी उन्हे के जहाजां पै चढ़ाकै ले आऊँगा जिनकै बारै म्ह वे बड़ा बोल बोल्‍लै सैं। 15 मै यहोवा थारा पवित्र, इस्राएल का सृजनहार, थारा राजा सूं।" 16 यहोवा जो समुन्दर म्ह राह अर प्रचण्ड धारा म्ह रास्ता बणावै सै, 17 जो रथां अर घोड़यां नै अर शूरवीरां समेत सेना ताहीं लिकाड़ ल्यावै सै, (वे तो एक साथ ओड़ैए रहवैंगे अर फेर न्ही उठ सकदे, वे बुझगे, वे सण की बत्ती की तरियां बुझगे सैं।) वो न्यू कहवै सै, 18 पर यहोवा न्यू कहवै सै "इब बीत्ती होई घटना नै याद ना करो, ना पुराणे बखत की बात्तां पै मन लगाओ। 19 देक्खो, मै एक नई बात करुँ सूं; वो इब्बे जाहिर होवैगी, के थम उसतै अनजाण रहोगे? मै जंगळ म्ह एक राह बणाऊँगा अर निर्जल देश म्ह नदियाँ बहाऊँगा। 20 गादड़ अर शुतुर्मुर्ग और जंगळी जन्तु मेरी महिमा करैंगे; क्यूँके मै अपणी चुणी होई प्रजा कै पीण खात्तर जंगळ म्ह पाणी अर निर्जल देश म्ह नदियाँ बहाऊँगा। 21 इस्राएल के लोगां ताहीं मन्‍नै अपणे खात्तर बणाया सै ताके वे मेरा गुणानुवाद करैं।"

इस्राएल का पाप

22 यहोवा न्यू कहवै सै, "फेर भी हे याकूब, तन्‍नै मेरे तै प्रार्थना न्ही करी; बलके हे इस्राएल तू मेरे तै थक ग्या सै! 23 मेरै खात्तर होमबलि करण नै तू मेम्‍ने न्ही ल्याया अर ना मेलबलि चढ़ाकै मेरी महिमा करी सै। देख, मन्‍नै अन्‍नबलि चढ़ाण की मुश्किल सेवा तेरै तै न्ही कराई, ना तेरै तै धूप लेकै तेरे ताहीं थका दिया सै। 24 तू मेरे खात्तर खुशबुदार नरकट रपियाँ तै मोल न्ही ल्याया अर ना मेलबलियां की चर्बी तै मेरे ताहीं तृप्त करया। पर तन्‍नै अपणे पापां कै कारण मेरे पै बोझ लाद दिया सै, अर अपणे अधर्म के काम्मां तै मेरे ताहीं थका दिया सै।"

25 "मै*43:25 इब्रा. 10:17; 8:12; यिर्म. 31:34 वोए सूं जो अपणे नाम कै मुताबिक तेरे अपराध्धां नै मिटा देऊँ सूं अर तेरे पापां नै याद न्ही करुँगा। 26 मेरे ताहीं याद करो, हम आप्पस म्ह विवाद करां; तू अपणी बात का बखान कर जिसतै तू निर्दोष ठहरै। 27 तेरा मूलपुरुष*43:27 याकूब, अब्राहम या आदम, (व्यव. 26:5; होशे. 12:2-4; 12) पापी होया अर जो-जो मेरे अर थारे बीच बिचौलिए होए, वे मेरे तै बलवा करदे चले आये सैं। 28 इस करकै मन्‍नै पवित्रस्‍थान के हाकिमां ताहीं अपवित्र ठहराया, मन्‍नै याकूब ताहीं सत्यानाश अर इस्राएल ताहीं शर्मसार होण दिया सै।"