1 मोआबेरे नाश भोनेरे वक्ते यहूदा प्रदेशेरे लोक एन गीत ज़ोले, "इश्शो अक मज़बूत नगरे; छुटकारेरू कम देनेरे लेई तै तैसेरी शहरपनाह ते क़िले च़ुनते। 2 नगरेरे फाटक खोल्‍ला कि ताके धर्मी कौम रखवाली केरनेरे लेई अन्तर एज्जे। 3 हे यहोवा ज़ेसेरे दिलेरो भरोसो तीं पुड़े, तैस तू हर तरीके सेइं बच़ेइतां रखतस, किजोकि तै तीं पुड़ भरोसो रखते।✝ 4 यहोवा पुड़ तू हमेशा भरोसो रख, किजोकि प्रभु यहोवा सनातन चट्टाने। 5 तै उच्‍चे पदे पुड़ बिशने बाले झुकाते, ज़ैन नगर उच्‍चे पुड़ बस्सोरूए तैस उन्ढे केरते। तै तैस बिछ़ोड़तां मित्ती मां मिलाते। 6 तै पव्वन सेइं बल्के गरीबां केरे पव्वन सेइं ढ्लन्च़ो गालो।"

7 धेर्मी लोकां केरि बत सच़्च़ाई आहे, हे यहोवा ज़ै तू एप्पु सच़्च़ाई आस, तू धेर्मी मैन्हेरी अगवाई केरतस। 8 हे यहोवा, तेरे न्यायेरे बत्ती मां अस लोक तीं बलगतम; तेरे नंव्वेरे याद असन खुवैइश रहतीए। 9 रातरे वक्ते मां अवं दिले सेइं तेरी खुवैइश केरताईं, मेरो सारो मन बड़े लगनी सेइं तीं तोपते। किजोकि ज़ैखन तेरे न्यायेरां कम्मां धेरती पुड़ बांदां भोतन, तैखन दुनियारे रानेबाले धार्मिकता शिखतन। 10 दुष्टे पुड़ चाहे यहोवा दया भी केरे फिर भी तै धार्मिकता न शिखेलो; चाए मुल्खे मां लोक धार्मिकता केरन फिरी भी तै बुराई केरेलो, ते यहोवारी महिमा तैसेरी समझ़ी मां न एज्जेली।

11 हे यहोवा, तीं हथ खड़ो कियोरोए, पन तेरे दुश्मन न लहन। पन तैना बुझ़न कि तीं अपने लोकन सेइं केत्रो प्यारे, तैना शरमिन्दा भोल्हे।✝ 12 तेरे दुश्मन अग्गी सेइं भस्म भोल्हे। हे यहोवा, तू इश्शे लेई शान्ति ठहरेलो, असेईं ज़ैन किछ कियूं तैन तींए इश्शे लेई कियोरूए। 13 हे इश्शे यहोवा परमेशर, तेरे अलावा भी तेरे हाकिम असन पुड़ हुकूमत केरते थिये, पन तेरी दयाई सेइं असां सिर्फ तेरे नंव्वेरू शुक्र केरमेले। 14 तैना हाकिम मेरि जेवरेन, हुनी तैना ज़ींते न भोल्हे; तैन्न मर्रोरे बड़े दिहाड़े भोए, तैना फिरी कधे खड़े न भोल्हे। तीं तैना विचार केरतां एरे नाश किये कि तैना फिरी यादी मां एज्जेले। 15 तीं यहूदा प्रदेशेरे अपने लोक महान किये; हे यहोवा तीं कौम बधाई, तीं अपनि महिमा हिरेवरीए ते तैस मुल्खेरी सब हद्दां बधेवरिन।

16 हे यहोवा, दुखे मां तैना तीं याद केरते थिये, ज़ैखन तू तैन सज़ाह देतो थियो तैखन तैना अपने मनेरी गल्‍लां बल्हे-बल्हे तीं कां बैंदी केरते थिये। 17 ज़ेन्च़रे अक गल्हे बिशने बाली कौन्श बच्‍चो ज़ांनेरे मौके कर लातीए; ठीक तेन्च़रे हे यहोवा असां तेरे सामने थिये।✝ 18 ज़ेन्च़रे दोज़ींती कौन्शी गल्हे बिशनेरी तकलीफ भोतीए, तेन्च़रे असन भी तकलीफ भोइ, पन असेईं सिर्फ हवाई ज़र्म दित्तू, असेईं मुल्खेरे लेई कोई छुटकारेरू कम न कियूं, ते असेईं दुनियारे लोकन ज़र्म दित्तू। 19 तेरे मुओरे लोक ज़ींते भोइ गाले, मुड़दे खड़े उठेले। हे मित्ती मां बस्सने बालाव, खड़े भोइतां जयजयकार केरा! किजोकि तेरी ओश लौई मरां पैदा भोतीए; ज़मीन अपने मुड़दन वापस देली।

20 हे मेरे लोकव, एज्जा, एपनी-एपनी कोठी मां गेइतां अपनु दार बन्द केरतां छ़डा; थोड़े च़िरे तगर ज़ांतगर यहोवारो क्रोध ठंडो न भोए अपनो आप छ़ुपेइतां रखा।✝ 21 किजोकि हेरा, यहोवा धेरतरे रानेबालन अधर्मेरी सज़ाह देनेरे लेई एज्जी राहोरोए, ते ज़मीन अपनो खून बांदो केरेली ते मारोरे लोकन जादे छ़ुपेइतां न रखेली।