1 यशायाह ई भी नबूवत केरते, हे जज़ीरन पुड़ रानेबाले लोक मेरे सामने च़ुप राथ ते मेरी गल शुना; मुल्खे-मुल्खेरे लोकव नंव्वी ताकत हासिल केरा; तैना नेड़े एइतां ज़ोन; असां न्यायेरे लेई एक्‍की होरेरे नेड़े एज्जम।

2 केनी पूर्वेरे पासेरां अक उभारो, ज़ैस तै धार्मिकताई सेइं अपने पव्वन कां कुजाते? यहोवा कौमन तैसेरे बस्से मां केरि देते ते राज़न पुड़ अधिकारी ठहराते; तै एपनी तलवारी सेइं धूड़रे ज़ेरे ते अपने धनुषे सेइं उडैरतां भूंसेरे ज़ेरे बनाते। 3 तै तैन कढते ते एरी बत्तां, ज़ैस पुड़ तै कधे न थियो च़लतो, बगैर रुकावटां अग्रोवं च़लाते। 4 केनि एन कम कियोरूए ते शुरू करां पीढ़ी-पीढ़ी कुजातो एवरोए? अवं यहोवा, ज़ै सेभन करां पेइलो, ते आखरी वक्ते तगर रालो; अवं तैए आईं।

5 जज़ीरेरे लोक इन लेइतां डरतन, धेरतरे दूर मुल्ख डरे सेइं थेरकी जे ते नेड़े एवरेन। 6 तैना एक्‍की होरेरी मद्दत केरतन ते तैन मरां कोई अपने ढ्लाए सेइं ज़ोते, "हिम्मत रख!" 7 ट्लखान सुनारे ते हथोड़े सेइं बराबर केरनेबाली छिनी पुड़ बाने बाले इन ज़ोइतां हिम्मत देने लगोरोए, "जोड़ त रोड़ोए," ते तै किल देइ-देइ तैस एन्च़रे मज़बूत केरते कि तै मज़बूत राए।

8 हे मेरे दास इस्राएल, हे मेरे च़ुनोरे याकूब, हे मेरे दोस्त अब्राहमेरे वंश; 9 तू ज़ै मीं धेरतरे दूर-दूर मुल्खन मरां आनो ते धेरतरे कूने-कूने करां कुजेइतां एन ज़ोवं, "तू मेरो दास आस, तू मीं च़ुनोरोस ते शारोरो नईं;" 10 डर न, किजोकि अवं तीं सेइं साथी आईं, इरां उरां न तक, किजोकि अवं तेरो परमेशर आईं, अवं तीं मज़बूत केरेलो ते तेरी मद्दत केरेलो, ते अपने धर्मी देइने हथ्थे सेइं तीं सुमैलतां रखेलो।

11 हेर, ज़ैन तीं पुड़ क्रोधे, तैना सब शरमिन्दा भोल्हे; ते ज़ैना तीं सेइं लड़तन तैन केरां तुत्तरां कालां भोल्हां ते तैना नाश भोइतां मिटी गाले। 12 ज़ैना तीं सेइं लड़तन तैना तोप्पने पुड़ भी न मैल्हन; ज़ैना तीं सेइं जंग केरतन तैना नाश भोइतां मिटी गाले। 13 किजोकि अवं तेरो परमेशर यहोवा, तेरो देइनो हथ ट्लेइतां ज़ोइलो, "डर न, अवं तेरी मद्दत केरेलो।"

14 यहोवा ज़ोते, हे कीड़ेरे ज़ेरे याकूब, हे इस्राएली लोकव, डरा न! यहोवारू एन्ने ज़ोनूए, अवं तेरी मद्दत केरेलो; इस्राएलेरो पवित्र यहोवा तेरो छुटानेबालोए। 15 हेर, अवं तीं फसल मडनेरो नंव्वो हथियार बनालो ज़ैस बड़े तिखे दंत भोल्हे; तू पहाड़न मडते-मडते बिलकुल धूड़ बनालो, ते पहैड़न भूंसेरो ज़ेरो केरेलो।

16 तू तैन छ़ट्टेलो, ते बात तैस उडारेलो, आँधी तैन तितर-बितर केरेली। पन तू यहोवारी वजाई सेइं मघन भोल्हो, ते इस्राएलेरे पवित्र परमेशरेरे वजाई सेइं घमण्ड केरेलो।

17 गरीब ते कंगाल लोक पानी तोपेले ते तैन न मैल्हेलू, तैन केरो तैलू ट्लिशी सेइं शुक्‍की गालो; अवं यहोवा तैन केरि बिनती शुनेलो, अवं इस्राएलेरो परमेशर तैन न शैरेलो। 18 अवं तैन केरे लेई नग्गे पहाड़न पुड़ दरिया ते मैइदाने मरां नाग बगेइलो; अवं सुनसान ठारी मां तालाब बनेइलो ते खुशक ज़मीनी मां नागे-नाग बगेइलो। 19 अवं सुनसान जगाई मां गैइड़, किक्र, मींधी, ते ज़ैतून उगेइलो; अवं अराबा मां सनोवर, ते चिनारेरे बुट ते च़िवं लेइलो। 20 ज़ैस सेइं लोक बुझ़न, ते सोचतां पूरे तरीके सेइं समझ़न कि एन यहोवारू कियोरू कम्मे, ते इस्राएलेरे पवित्र परमेशरेरू बनेवरूए।

21 यहोवा एन ज़ोते, "अपनो मुकदमो लड़ा," याकूबेरो राज़ो एन ज़ोते, "अपनि दलील देथ।" 22 तैना मूरती तैन हेरतां असन ज़ोन कि एजने बाले वक्ते मां कुन भोल्हु? पुराने ज़मानेरी घटना ज़ोथ कि शुरू मां कुन-कुन भोवं, ज़ैस सेइं अस तैन सोचतां ज़ानम कि एजने बाले वक्ते मां तैन केरो फल कुन भोल्हो; या भोने बैली घटना असन शुनाथ। 23 एजने बाले वक्ते मां ज़ैन किछ भोल्हु तैन ज़ोथ, तैखन अस मनमेले कि तुस ईश्वर आथ; भलू या बुरू किछ त केरा कि असां हेरतां हैरान रेई गाम। 24 हेरा, तुसां किछ भी नईं, तुसन करां किछ न बने; ज़ै कोई तुश्शी पूज़ा केरते तै लानतीए।

25 मीं अक उत्तरेरे पासेरां उभारो, तै एज्जी भी जेव; ते पूर्वेरे पासेरां आहे ते मेरू नवं घिन्ते; ज़ेन्च़रे कुम्हार आड्ली मित्ती सनते, तेन्च़रे तै हाकिमन च़िकरारे ज़ेरे ढ्लेन्च़ेलो। 26 केनि ऐह गल पेइले ज़ोवरी थी, ज़ैस सेइं असां एस ज़ानतम? ते केनी पेइले एन बांदू कियोरूए, ज़ैस सेइं असां एन ज़ोम कि तै सच़्च़ोए? कोई भी ज़ोने बालो नईं ते कोई भी शुनाने बालो नईं, तुश्शी गल्‍लां केरो कोई भी शुनाने बालो नईं। 27 मीएं पेइले सिय्योने मरां ज़ोवरूए, "हेर, तैन्ने हेर," ते मीं यरूशलेमे मां अक खुशखबरी देनेबालो भेज़ो। 28 मीं हेरने मां भी कोई न मैल्हो; तैन मां कोई सलाहकार नईं ज़ै मेरे पुछ़ने पुड़ भी जुवाब देइ सखे। 29 शुना, तैन सेभी केरां कम्मां अनर्थ आन; तैन केरां कम्मां घटिया आन, ते तैन केरि बनेवरी मूरती हवा ते झूठी आन।