Isaías 66

यहोवा सैरी कौमां केरो न्याय केरेलो

1 यहोवा एन ज़ोते, "अम्बर मेरो तखत ते धरती मेरे पव्वां केरि चौवकी आहे; तुसां मेरे लेई केरो ज़ेरो भवन बनाले, या ते मेरे आरामेरी कौन ज़ेरि ठार भोल्ही?✝66:1 प्रेरित. 7:48-50;मत. 5:34-35. 2 यहोवा एन भी ज़ोते, एना सब चीज़ां मेरे हथ्थेरी बेनोरिन, एल्हेरेलेइ एना सब मेरी आन। पन अवं तैसेरे पासे नज़र केरेलो ज़ै दीन ते दुखी मनेरो भोए, ते मेरू वचन शुन्तां थरकतो भोए।✝66:2 भज. 34:18;मत. 5:3.

3 "दांतेरी बलि केरनेबालो मैन्हु केरे मारने बालेरो ज़ेरोए; ते ज़ै भैड्डरी बलि केरते तै तैसेरो ज़ेरोए ज़ै कुतरेरू गल कटते; ज़ै अन्नबलि च़ाढ़ते तै सूरेरे खून च़ाढ़ने बालेरो ज़ेरोए; ते ज़ै लोबान बालते तै तैसेरो ज़ेरोए ज़ै मूरती केरि पूज़ा केरते। एन सेभेइं अपनि-अपनि बत च़ुनोरीए, ते भिट्टी चीज़न सेइं तैन केरे मन खुश भोतन। 4 एल्हेरेलेइ अवं भी तैन केरे लेई दुखेरी गल्‍लां कढेलो, ते ज़ैन गल्‍लन करां तैना डरतन तैन्ना तैन पुड़ छ़डेलो; किजोकि ज़ैखन मीं तैना कुजाए, तैखन कोई न कुज्जो, ते ज़ैखन मीं तैन सेइं गल्‍लां की, तैखन तैनेईं मेरी न शुनी, पन ज़ैन मेरी नज़री मां बुरू थियूं तैन्ने तैना केरते राए, ते ज़ैस सेइं अवं खुश न थियो भोतो, तैन्ने तैनेईं पसंद कियूं।"

5 तुसां ज़ैना यहोवारू वचन शुन्तां थरकतथ यहोवारू एन वचन शुना, "तुश्शे ढ्ला ज़ैना तुसन सेइं बैर रखतन, ते मेरे नंव्वेरे वजाई सेइं तुसन अलग केरतन, ते ज़ोतन, यहोवारी महिमा त भोए, ताके असां तुश्शी खुशी हेरी सखम, पन तैना शरमिन्दे भोल्हे।"✝66:5 2 थिस. 1:12.

सज़ाह ते नंव्वी कौम

6 शुना, यरूशलेम नगरेरे पासेरां बड़ो शौर शराबो शुनोई राहोरोए, ते भवने मरां आवाज़ एज्जी राहोरीए, तै यहोवारी आवाज़े, ज़ै अपने दुश्मन सज़ाह देने लगोरोए।✝66:6 प्रका. 16:1,17.

7 "मेरी पवित्र नगरी तैस कौन्शरी ज़ेरिए ज़ैसां गल्हे बिशनेरे तकलीफी करां पेइले बच्‍चे ज़र्म दित्तू; तकलीफ भोने करां पेइले तैस बच्‍चे ज़र्म दित्तू।✝66:7 प्रका. 12:2,5. 8 केनि एरी गल कधे शुनी? केनि कधी एरी गल्‍लां हेरी? कुन मुल्ख एक्‍की दिहाड़े पैदा भोइ सखते, कुन कोई कौम एक्‍की पले मां पैदा भोइ सकतीए? किजोकि सिय्योनेरी गल्हे बिशनेरी तकलीफ शुरू भोवरी थी कि तैस बच्‍चे भोए। 9 यहोवा ज़ोते, कुन अवं ज़रमानेरे वक्ते तगर पुज़तां न ज़र्मेईं? तेरो परमेशर ज़ोते, अवं ज़ै गर्भ देताईं कुन अवं कोख बन्द केरि?

10 "हे यरूशलेमे सेइं प्यार केरनेबाले सब लोकव, तैस सेइं साथी आनन्द केरा ते तैसेरे वजाई सेइं खुश भोथ, तैसेरे लेई मातम केरने बालाव, तैस सेइं साथी बड़े खुश भोथ। 11 तुस तैसेरी शान्ति देनेबाले छैतरू दुद्ध पीतां रज़्ज़ेले; ते दुद्ध पीतां तैसेरी बड़े महिमारे वजाई सेइं खुश भो।"

12 किजोकि यहोवा एन ज़ोते, "हेरा, अवं तैसेरे पासे शान्ति दरियाएरे ज़ेरि, ते कौमां केरि दौलत तूफानेरी ज़ेरि तैसेरे पासे बगेइलो, ते तुसन तै मैल्हेलो, तुस तैसेरे कुम्मे मां छ़ूए गाले ते तैसेरे ज़ैंधन पुड़ रख्खे गाले। 13 ज़ेन्च़रे हाज अपने बच्‍चे तसल्‍ली देतीए, तेन्च़रे अवं तुसन तसल्‍ली देइलो; तुसन यरूशलेमे मां तसल्‍ली मैल्हेली। 14 तुस इन हेरेले ते खुश भोल्हे; ते तुश्शी हेड्डी घासेरी ज़ेरि हेरी भेरि भोल्ही; ते यहोवारो हथ तैसेरे दासन पुड़ बांदो भोल्हो, पन तैसेरो क्रोध तैसेरे दुश्मन पुड़ भड़केलो।

15 "किजोकि हेरा, यहोवा अग्गी सेइं साथी एज्जेलो, ते तैसेरां रथां ऐंधरां ज़ेरे भोल्हे; ज़ैस सेइं तै अपने क्रोधेरी जलनी सेइं ते एपनी हदायत अग्गरी लप्पी सेइं बांदी केरे।✝66:15 2 थिस. 1:8. 16 किजोकि यहोवा सारे लोकां केरो न्याय अग्गी सेइं ते तलवारी सेइं केरेलो; यहोवारे मारोरे बड़े लोक भोल्हे।"

17 यहोवा ज़ोते, "ज़ैना लोक अपने आपे एल्हेरेलेइ पवित्र ते शुद्ध केरतन कि बागी मां गेइतां केन्चेरे मूरती केरि पूज़ा केरतां गातन ते पुतोरां खड़े भोइतां ज़ैना सूरेरू ते मूंशा केरू मास कने भिट्टी चीज़ां खातन, तैना अकोट्ठे नाश भोइ गाले, यहोवा एन ज़ोते।

18 "किजोकि अवं तैन केरे कम्मां ते तैन केरे खियाल दूईये रोड़ेच़ारे ज़ानताईं, ते तै वक्त एइते ज़ैखन अवं सैरी कौमां ते अलग-अलग भाषाई ज़ोनेबालन अकोट्ठो केरेलो; ते तैना एइतां मेरी शक्ति हेरेले। 19 अवं तैन मां अक निशान बांदो केरेलो, ते तैन केरे बच़ोरे लोकन तैन कौमन कां भेज़ेलो, ज़ैनेईं न मेरी खबर शुनोरीए ते न मेरी महिमा लाहोरीए, मतलब तर्शीश नगरेरे लोकन ते धनुर्धारी लोकन ते पूलि लोकन ते लूदी लोकन, ते तूबली लोकन ते यूनानी लोकन ते दूर जज़ीरां केरे रानेबालन कां भेज़ेलो, तैना कौमन कां मेरी महिमारू बियान केरमेले। 20 ज़ेन्च़रे इस्राएली लोक अन्नबलि शुद्ध भांडन मां रेखतां यहोवारे भवने मां आनतन, तेन्च़रे तैना तुश्शे सेभी ढ्लान कौमन करां घोड़न, रथ्थन, ते पालकन, खचरन पुड़ ते सेंढनी पुड़ च़ैढ़ी-च़ैढ़तां मेरे पवित्र पहाड़े यरूशलेमे मां यहोवारी भेंटरे लेई आनेले, यहोवारू एन वचने। 21 ते तैन मरां अवं किछ लोकन याजक ते लेवी पदेरे लेई भी च़ुनेलो।"

नंव्वू अम्बर ते नव्वीं धरती

22 "किजोकि ज़ैस तरीके नंव्वू अम्बर ते नव्वीं धरती, ज़ै अवं बनाने बालोईं, मेरे सामने बनोरी राली, तैस्से तरीके तुश्शो वंश ते तुश्शू नवं भी कायम रालू; यहोवा एन ज़ोते।

23 "फिरी एरू भोल्हु कि एक्‍की नंव्वे चाँदे करां होरी नंव्वे चाँदे तगर ते एक्‍की आरामेरे दिहाड़े करां होरि आरामेरे दिहाड़े तगर सारे प्राणी मीं कां झुकनेरे लेई एज्जेले; यहोवारू एन ज़ोनूए। 24 तैखन तैना निस्तां तैन लोकां केरि लाशन पुड़ नज़र देले; ज़ैनेईं मीं सेइं बगावत कियोरी थी, किजोकि तैन मां पेवरे कीड़े कधी न मरेले, तैन केरि अग कधी न हिश्शेली, ते सारे मैन्हु तैन सेइं बड़ी नफरत केरेले।"