1 ଏନ୍‌ଇଡ଼ିଂ ମେଁ ମୋଶାକେ ବାସଙ୍ଗ୍‌କେ, "ନା ଆରି ହାରୋଣ ଆରି ନାଦବ୍‌ ଆରି ଅବୀହୁ ଆରି ଇସ୍ରାଏଲ୍‌ନେ ମ୍ନାଃ ରେମୁଆଁଇଂନେ ସତୁରି ରୁଆ, ପେ ମାପ୍‌ରୁକେ ପାର୍‌ତନା ଡିଂନେସା କଣ୍ଡା ଆଡ଼ାତ୍ରା ପେଡେଃଏ । ପେ ସୁଲ ଲେଃଚେ ଆନେଙ୍ଗ୍‌ ପାର୍‌ତନା ପେଡିଂଏ । 2 ମାତର୍ ମୋଶା ମାପ୍‌ରୁ ଡାଗ୍ରା ପାଂଏ, ମାତର୍‌ ମେଇଂ ମେଡାଗ୍ରା ଆପାଂଆର୍‌ ଣ୍ଡୁ, କି ରେମୁଆଁଇଂ ମେଁ ଏତେ କଣ୍ଡା ଆଡ଼ାତ୍ରା ଆଡେଆର୍‌ ଣ୍ଡୁ ।"

3 ତେଲା ମୋଶା ପାଙ୍ଗ୍‌ଚେ ମାପ୍‌ରୁନେ ଆତେନ୍‌ ସାପା ବ୍ନାଲିର୍‌ ଆରି ନିଅମ୍‌ ବିସ‍ଏରେ ରେମୁଆଁଇଂକେ ବାସଙ୍ଗ୍‌କେ, "ସାପାରେ ମୁଇଂ ସବ୍‌ଦରେ ଉତର୍‌ ବିଆର୍‌କେ, ମାପ୍‌ରୁ ଆଣ୍ଡିନେ ସାପା ସାମୁଆଁ ବାସଙ୍ଗ୍‌ବକେ, ଆତେନ୍‌ ସାପା ନେ ପାଲନ୍‌ ନେଃଡିଂପା ।" 4 ଏନ୍‌ଇଡ଼ିଂ ମୋଶା ମାପ୍‌ରୁନେ ସାପା ବ୍ନାଲିର୍‌ ଗୁଆର୍‌କେ, ବାରି ଞ୍ଜିର୍‌ ତଡ଼ିଆଚେ କଣ୍ଡା ଆଲ ମୁଇଂ ପୁଜା ଡିଂନେ କୁଡ଼ିଆ ଆରି ଇସ୍ରାଏଲ୍‌ନେ ଗମ୍ୱାର୍‌ ବଂସ ଇସାବ୍‌ରେ ଗମ୍ୱାର୍‌କ୍ଲିଗ୍‌ ବ୍ରିନେ ମୁର୍ତି ଆରେକେ । 5 ଆରି, ମେଁ ଇସ୍ରାଏଲ୍‌ ଗଡ଼େଇଂନେ ଙ୍ଗିରେଇଂକେ ବେକେ, ମେଇଂ ମାପ୍‌ରୁନେ ମ୍ନିରେ ସୁଆ ବଲି ନ୍‌ସା ଆରି ମଙ୍ଗଲ୍‌ ଡିଂନ୍‌ସା ଗ୍ଲେଃଗୋଏଇଂକେ ବଲି ବିଃକେ । 6 ମୋଶା ସାପା ମିଆଁ ମୁଇଂତୁଗ୍‌ ରାସିଂକେ, ଆରି ମେଁନେ ତାଲିନିଆ ସେଃଗା ବକେ, ଆରି ଆତେନ୍‌ ସେଃଗା ମିଆଁ ବେଦୀ ଆଡ଼ାତ୍ରା ଉର୍‌ଚିଗ୍‌ ଆର୍‌କେ । 7 ମୋଶା ନିଅମ୍‌ ସାସ୍ତର୍‌ ରାଙ୍ଗୱେଚେ ରେମୁଆଁଇଂ ଡାଗ୍ରା ପଡ଼େକେ । ଆତ୍‌ବା ମେଇଂ ବାସଙ୍ଗ୍‌ଆର୍‌କେ, "ମାପ୍‌ରୁ ମେଃ ମେଃ ବାସଙ୍ଗ୍‌ବକେ, ଆତେନ୍‌ ସାପା ନେଃ ନେଃପାଲେପା ଆରି ମେଁନେ ଆଦେସ୍‌ ନେଃମାନେଃପା ।"

8 ଆକେନ୍‌ ଇଡ଼ିଙ୍ଗ୍ ମୋଶା ଆତେନ୍‌ ମିଆଁ ରାଙ୍ଗ୍‌ୱେଚେ ରେମୁଆଁଇଂନେ ଆଡ଼ାତ୍ରା ଉର୍‌ଚିଗ୍‌ ବିଚେ ବାସଙ୍ଗ୍‌କେ, "କେଲାପା, ମାପ୍‌ରୁ ପେ ଏତେ ଆକେନ୍‌ ସାପା ବ୍ନାଲିର୍‌ ବିସ‍ଏରେ ମୁଃଡ଼ି ନିଅମ୍‌ ଡିଂବକେ, ଆତେନ୍‌ ନିଅମ୍‌ନେ ମିଆଁ ଆକେନ୍‌ ।"

9 ମୋଶା, ହାରୋଣ, ନାଦବ୍‌, ଅବୀହୁ ଆରି ଇସ୍ରାଏଲ୍‌ନେ ମ୍ନାଃରେଇଂନେ ବାନ୍‌ ସତୁରି ରୁଆ କଣ୍ଡା ଆଡ଼ାତ୍ରା ଡେଃଆର୍‌କେ । ଆରି ମେଇଂ ଇସ୍ରାଏଲ୍‌ନେ ପର୍‌ମେସର୍‌କେ କେଆର୍‌କେ । 10 ଆରି କଣ୍ଡା ଆଡ଼ାତ୍ରା ମେଁ ଅଲେଙ୍ଗ୍‌ନେ ଗାଲି ତାର୍କିଗ୍‌ ଲେଃଗେ ଆରି ନୀଳକାନ୍ତ ମଣୀ ଏଃତେ ତିଆର୍‌ ଡିଂଲାଏକେ ରକମ୍‌ ତ୍ନାଡିଂଗେ ଆରି କିତଙ୍ଗ୍‌ଇନି ତ୍ନାକେ ରକମ୍‌ ନିଲି ତ୍ନାଡିଂଗେ । 11 ପର୍‌ମେସର୍‌ ଇସ୍ରାଏଲ୍‌ନେ ନେତାଇଂନେ ବିରୁଦ୍‌ରେ ନ୍ତି ଆଟେକେକେ ଣ୍ଡୁ । ମେଇଂ ସାପାରେ ପର୍‌ମେସର୍‌କେ କେଆର୍କେ । ଆରି ମେଇଂ ଉଗ୍‌ଚଙ୍ଗ୍‌ ଆର୍‌କେ ।

12 ଏନ୍‌ଇଡ଼ିଂ ମାପ୍‌ରୁ ମୋଶାକେ ବାସଙ୍ଗ୍‌କେ, "ପେ କଣ୍ଡା ଆଡ଼ାତ୍ରା ଡେଃଚେ ନେଂ ଡାଗ୍ରା ପାଙ୍ଗ୍‌ଚେ ଆକ୍‌ଅରିଆ ଲାଲାପା, ତେଲା ନେ ରେମୁଆଁଇଂନେ ସିକ୍ୟା ନ୍‌ସା ମେଃ ଗୁଆର୍‌ନେବକେ, ଆତେନ୍‌‍ ନିଅମ୍‌ ଆରି ଆଦେସ୍‌ ବିସ‍ଏରେ ମ୍ୱାର୍‌ ବାଗ୍‌ ଡିଂକ୍ନେ ବ୍ରି ପାଟା ଆନାକେ ନେବିଏ ।" 13 ଆକେନ୍‌ ଇଡ଼ିଙ୍ଗ୍‌ ମୋଶା ଆରି ମେଁନେ ଚାକର୍‌ ଯିହୋଶୂୟ ତଡ଼ିଆକେ, ମୋଶା ପର୍‌ମେସର୍‌ନେ କଣ୍ଡା ଆଡ଼ାତ୍ରା ଡେଃକେ । 14 ମୋଶା ମ୍ନାଃରେଇଂକେ ବାସଙ୍ଗ୍‌କେ, "ନେ ଉଡ଼ିପର୍‌ ଜାକ ପେ ଡାଗ୍ରା ନେପାଙ୍ଗ୍‌ ଣ୍ଡୁ, ଅତେନ୍‌ପର୍‌ ଜାକ ପେ ଆକ୍‌ଅରିଆ ଲାଲାପା, କେଲା, ହାରୋଣ ଆରି ହୂର୍‌ ପେ ଡାଗ୍ରା ଲେଃକେ, ଜାନେ ଜଦି ମେଃଡିଗ୍‌ ୱିଙ୍ଗ୍‌ଆଃରିଙ୍ଗ୍‌ଆଃନେ ସାମୁଆଁ ନେଅଁଲା ମେଇଂ ମେଙ୍ଗ୍‌ ଡାଗ୍ରା ୱେଏ ।"

15 ତେନ୍‌ଇଡ଼ିଂ ମୋଶା କଣ୍ଡା ଆଡ଼ାତ୍ରା ଡେଃକେ, ବାରି ତ୍ରିଗ୍‌ଡିଆ କଣ୍ଡାକେ ଡାବିକେ । 16 ଆତ୍‌ବାନ୍‌ ସୀନୟ କଣ୍ଡା ଆଡ଼ାତ୍ର ମାପ୍‌ରୁନେ ତାର୍କିଗ୍‌ ପାଙ୍ଗ୍‌କେ । ଆରି ଆତେନ୍‌ ତୁର୍‌ ଦିନା ଜାକ ତ୍ରିଗ୍‌ଡିଆ ଡାଚେ ଲେଃଗେ । ଆକେନ୍‌ ଇଡ଼ିଙ୍ଗ୍‌ ମାପ୍‌ରୁ ଗୁ ଦିନା ତ୍ରିଗ୍‌ଡିଆବାନ୍‌ ମୋଶାକେ ୱାକେ । 17 ଆତ୍‌ବାନ୍‌ ଇସ୍ରାଏଲ୍‌ ରେମୁଆଁଇଂନେ ସାମ୍‌ନେ କଣ୍ଡା ଟିପେ ଡୁଆଡିଂକ୍ନେ ସୁଆ ରକମ୍‌ ମାପ୍‌ରୁନେ ତାର୍କିଗ୍‌ ତ୍ନାକେ । 18 ବାରି ମୋଶା ତ୍ରିଗ୍‌ଡିଆ ବିତ୍‌ରେ ଗାଚେ କଣ୍ଡା ଆଡ଼ାତ୍ରା ଡେଃଚେ ଆତେନ୍ କଣ୍ଡା ଆଡ଼ାତ୍ରା ଚାଲିସ୍‌ ଦିନ୍‌ ଚାଲିସ୍‌ ମିଡିଗ୍‌ ଜାକ ଲେଃଗେ ।