ପରମେସର୍ ମୋଶାକେ କାବା ରକମ୍ନେ ବପୁ ବିକେ
1 ଆତ୍ବା ମୋଶା ଉତର୍ ଡିଙ୍ଗ୍କେ, "କେଲାପା, ମେଇଂ ଆନେଙ୍ଗ୍କେ ବିସ୍ବାସ୍ ଆଡିଂ ଆର୍ ବାରି ନେଙ୍ଗ୍ ସାମୁଆଁ ଆଦ୍ରିଗ୍ଆର୍ ଣ୍ଡୁ, ମାତର୍ ମେଇଂ ବାସଙ୍ଗ୍ଆର୍ଏ, ମାପ୍ରୁ ଆନାକେ ଦର୍ସନ୍ ଆବିକେ ଣ୍ଡୁ ?"
2 ତେଲା ମାପ୍ରୁ ଆମେକେ ବାସଙ୍ଗ୍କେ, "ନା ନ୍ତିଅରିଆ ଆତେନ୍ ମେଃନି ?" ମେଁ ବାସଙ୍ଗ୍କେ, "ଡୁଡୁ ।"
3 ଆତ୍ବା ମାପ୍ରୁ ବାସଙ୍ଗ୍କେ, "ଆମେକେ ତୁବନିଆ ଆଲ ।" ତେଲା ମେଁ ଆତେନ୍ ଡୁଡୁକେ ତୁବନିଆ ଆଲଃକେ, ଆତ୍ବା ଆତେନ୍ ଡୁଡୁ ବୁବ ଡିଂକେ; ତେସାଃ ମୋଶା ବୁବଃ ଡାଗ୍ରାବାନ୍ ଲାଗ୍ଡକେ । 4 ଆତେନ୍ ବେଲା ମାପ୍ରୁ ମୋଶାକେ ବାସଙ୍ଗ୍କେ, "ମେଙ୍ଗ୍ନେ ନ୍ତାଞ୍ଜାଇଂନେ ମାପ୍ରୁ ପର୍ମେସର୍, ଡାଗ୍ଲା, ଅବ୍ରାହାମ୍ନେ ପର୍ମେସର୍, ଇସାକ୍ନେ ପର୍ମେସର୍ ଆରି ଯାକୁବ୍ନେ ପର୍ମେସର୍ ଜେ ଆନାକେ ଦର୍ସନ୍ ବିବକେ, ଆକେନ୍ ଡିରକମ୍କି ମେଇଂ ବିସାସ୍ ଡିଂଆର୍ଏ । 5 ଆତେନ୍ସା ନା ନାନେ ନ୍ତି ଏତେ ମେଁନି ପ୍ଲାଃ ସାଃ," ଆତ୍ବା ମେଁ ନ୍ତି ଏତେ ଆମେକେ ସାଃକେ, ତେସାଃ ମେଁନେ ନ୍ତିନିଆ ଡୁଡୁ ଡିଂୱେକେ ।
6 ଆତ୍ବା ମାପ୍ରୁ ଆମେକେ ବାରି ବାସଙ୍ଗ୍କେ, "ନା ନାନେ ନ୍ତି ଗ୍ରିଅରିଆ ବ ।" ଆତ୍ବା ମେଁନେ ନ୍ତି ଗ୍ରିଅରିଆ ବଚେ ବାରି ନ୍ତିକେ ଆଲ ଆଃଜାର୍କେ, କେଲାପା, ମେଁନେ ନ୍ତି ଆରେଣ୍ଡ୍ୟାଃ ବାନା ରକମ୍ କୁଷ୍ଟ ରଗ୍ ରକମ୍ ଡିଂୱେଗେ । 7 ଆତ୍ବା ମେଁ ବାସଙ୍ଗ୍କେ, "ନା ବାରି ମୁଇଂତର୍ ନାନେ ନ୍ତି ଗ୍ରିଅରିଆ ବ; ମେଇଂ ଜଦି ଆନାକେ ବିସାସ୍ ଆଡିଂଆର୍ ଣ୍ଡୁ । 8 ବାରି ନାନେ ଆତେନ୍ ପର୍ତୁମ୍ ଚିନା କେଚେ ଆମ୍ୟାଃଆର୍ ଣ୍ଡୁ, ତେଲା ବାରିମୁଇଂ ଚିନ୍କେ କେଚେ ବିସ୍ବାସ୍ ଡିଂଆର୍ଏ ।" ତେଲା ମେଁ ବାର୍ମୁଇଂତର୍ ମେଁନେ ନ୍ତି ଗ୍ରିଅରିଆ ବଚେ ଆଲ ଆଜର୍ଲା, କେଲାପା, ଆତେନ୍ ଚିଲି ଡିଂୱେଗେ । 9 ଆକେନ୍ ମ୍ୱାକ୍ଲିଗ୍ ଚିନ୍କେ ଜଦି ମେଇଂ ବିସ୍ବାସ୍ ଆଡିଂଆର୍ ଆରି ନା ନାବାସଙ୍ଗ୍କ୍ନେ ସାମୁଆଁ ଆଦ୍ରିଗ୍ଆର୍, ତେଲା ନା ନିଲ ଲଣ୍ଡିଆନେ ଣ୍ଡିଆବାନ୍ ଇକୁଡ଼ା ରାଙ୍ଗ୍ୱେଚେ ନ୍ସୁଆର୍ ଲାଏକ୍ନେ ତୁବନିଆ କିଗ୍; ଆତ୍ବା ନା ଲଣ୍ଡିଆବାନ୍ ଆଣ୍ଡିନେ ଣ୍ଡିଆ ରାଙ୍ଗ୍ନାପାଂକେ, ଆତେନ୍ ନ୍ସୁଆର୍କ୍ନେ ତୁବନିଆ ମ୍ୟାଃ ଡିଂଏ ।
10 ଆତ୍ବା ମୋଶା ମାପ୍ରୁକେ ବାସଙ୍ଗ୍କେ, "ଅ ମାପ୍ରୁ, ଆକେନ୍ ବେଲା ସେନୁଗ୍, ନା ନାନେ ନିଜର୍ ଦାସ ଏତେ ନିମାଣ୍ଡା ନାବାଲିର୍କ୍ନେ ଇଡ଼ିଂ ଆଃ ନେଙ୍ଗ୍ ନିମାଣ୍ଡା ବାବ୍ରେ ବାସଙ୍ଗ୍ ମାୟାକ୍ନେ ରେମୁଆଁ ରକମ୍, ମାତର୍ ନେଙ୍ଗ୍ ତଃତ୍ଲା ରେମୁଆଁ ।"
11 ଆତ୍ବା ମାପ୍ରୁ ଆମେକେ ବାସଙ୍ଗ୍କେ, ରେମୁଆଁନେ ତୁମୁଁଆଃ ଜା ଆରେ ବକେ ? ବାରି ରେମୁଆଁକେ କନ୍ଦାଗୁଲା ବାରି ବଇରା ବାରି ମ୍ମୁଁଆଃ କେନେ ବାରି ମାକେନେ ଜା ଆଡିଂବକେ ? ନେ ମାପ୍ରୁ କି ଆତେନ୍ ନେଡିଙ୍ଗ୍ ? 12 ତେସାଃ ଏବେ ୱେଲା, ନେ ନା ତୁମୁଁଆଃ ବିଚେ ଆନାକେ ଡିରକମ୍ ବାସଙ୍ଗ୍ନେ ଡିଂଏ ଆତନ୍ ସାମୁଆଁ ଆନାକେ ଣ୍ଡ୍ରାଃସିକେଏ ।
13 ଆତ୍ବା ମେଁ ବାସଙ୍ଗ୍କେ, "ଅ ମାପ୍ରୁ, ନେଙ୍ଗ୍ ସାର୍ଲ ଣ୍ଡିଙ୍ଗ୍କେ, ଜାନେ ବାନ୍ ବେନେ ପଡ଼େଏ, ମେଁ ବାନ୍ ବେ ।"
14 ଆତ୍ବା ମୋଶା ଆଡ଼ାତ୍ରା ମାପ୍ରୁ ଜାବର୍ ରିସା ଡିଂକେ; ତେସାଃ ମେଁ ବାସଙ୍ଗ୍କେ, "ଲେବୀୟ ହାରୋଣ ନାନେ ବୟାଁ ଣ୍ଡୁ ? ନେଙ୍ଗ୍ ମ୍ୟାଃନ୍ଲାଏକେ ଯେ, ମେଁ ନିମାଣ୍ଡା ବାବ୍ରେ ବ୍ନାଲିର୍ ବାସଙ୍ଗ୍ଣ୍ଡ୍ରେ । ବାରି କେଲା, ମେଁ ନା ଏତେ ମିସୁନ୍ସା ପାଂଡିଙ୍ଗ୍କେ; ବାରି ଆନାକେ କେଚେ ମେଁ ସାର୍ଦା ଡିଂଏ । 15 ନା ଆମେକେ ନାବାସଙ୍ଗ୍ଏ ବାରି ମେଁ ତୁମୁଆଃନିଆ ବାସଙ୍ଗ୍ନେ ବ୍ନାଲିର୍ ନାବିଏ; ବାରି ନେ ନା ବାସଙ୍ଗ୍ନେ ତୁମୁଆଃନ୍ନିଆ ବାରି ମେଁ ବାସଙ୍ଗ୍ନେ ତୁମୁଁଆଃ ଗାଲିକେର ଆପେକେ ସପଲ୍ ଡିଂନେ କାମ୍ ବିସଏରେ ସିକ୍ୟା ନେବିଏ । 16 ମେଁ ରେମୁଆଁଇଂନେ ଡାଗ୍ରା ନା ବାସଙ୍ଗ୍ନେ ଜାଗାନ୍ନିଆ ମେଁ ବାସଙ୍ଗ୍ଏ; ମେଁ ନାନେ ତୁମୁଁଆଃ ରକମ୍ ଡିଂଏ ବାରି ନା ମେଁନେ ପର୍ମେସର୍ ରକମ୍ ନାଡିଂଏ । 17 ବାରି ନା ନାନେ ନ୍ତିବାନ୍ ଆକେନ୍ ଡୁଡୁକେ ସା, ମେଃଡାଗ୍ଲା ଆକ୍ମେ ବାନ୍ ନା ସାପା ଚିନ୍ ନାରାଃସୁଏଃଏ ।"
ମୋଶା ମିସର୍ନିଆ ବାର୍ମୁଇଂତର୍ ଆଣ୍ଡେନେ
18 ଆତ୍ବା ମୋଶା ମେଁନେ ମ୍ମଙ୍ଗ୍ଡେ ଯିଥ୍ରୋ ଡାଗ୍ରା ୱେଚେ ବାସଙ୍ଗ୍କେ, ନେଙ୍ଗ୍ ସାର୍ଲ ଣ୍ଡିଙ୍ଗ୍କେ, ମିସର୍ନିଆ ଲାଏକ୍ନେ ନେଙ୍ଗ୍ନେ ବୟାଁଇଂ ଡାଗ୍ରା ଏବେ ବାର୍ମୁଇଂତର୍ ୱେନ୍ସା ବାରି ମେଇଂ ଏବେ ଜାକ ମ୍ବ୍ର ଲେଃଆର୍କେ ଲେଃ ଣ୍ଡୁ, ଆତେନ୍ କିକେନ୍ସା ଆନେଙ୍ଗ୍ ୱେନେ ବିଃଲା । ଆତ୍ବା ଯିଥ୍ରୋ ମୋଶାକେ ବାଲିର୍କେ, ନିମାଣ୍ଡା ୱେଲା ।
19 ବାରି ମାପ୍ରୁ ମିଦିୟନ୍ନିଆ ମୋଶାକେ ବାଲିର୍ବଗେ, ନା ମିସର୍ ଦେସ୍ ଆଣ୍ଡେ ୱେଲା; ମେଃଡାଗ୍ଲା ମୁଡ଼ି ରେମୁଆଁଇଂ ଆନାକେ ବାଗୁଏନ୍ସା ତୁର୍ଆର୍ଡିଂଗେ, ମେଇଂ ସାପାରେ ଗୁଏଃ ଲେଃଆର୍କେ । 20 ଆତ୍ବା ମୋଶା ମେଁନେ କୁନେଡ଼େ ଆରି ଗଡ଼େଇଂକେ ଗଦ ଆଡ଼ାତ୍ରା ଆଡେଚେ ମିସର୍ ଦେସ୍ ଆଣ୍ଡେ ୱିଗ୍ଆର୍କେ; ବାରି ମେଁ ନିଜର୍ ନ୍ତିନିଆ ପର୍ମେସର୍ନେ ଆତେନ୍ ଡୁଡୁ ରାଙ୍ଗ୍ୱେଆର୍କେ ।
21 ଆତ୍ବା ମାପ୍ରୁ ମୋଶାକେ ବାଲିର୍କେ, ସାବ୍ଦାନ୍, ନା ମିସର୍ ନାୱେଲା, ନେ ନାନେ ନ୍ତିନିଆ ଆଣ୍ଡିନେ ସାପା କାବା କାମ୍ ଡିଙ୍ଗ୍ନେସା ବିନେବକେ, ଆତେନ୍ ଫାରୋନେ ସେଃମଁ ନାଡିଙ୍ଗ୍ଏ; ମାତର୍ ନେ ମେଁନେ ମନ୍ ଡାଟ୍ ନେରାଡିଂଏ; ତେଲା ମେଁ ରେମୁଆଁଇଂକେ ଆନ୍ତାର୍ ଆବି ଣ୍ଡୁ । 22 ବାରି ନା ଫାରୋକେ ନାବାସଙ୍ଗ୍ଏ, ମାପ୍ରୁ ବାସଙ୍ଗ୍ଡିଂକେ, ଇସ୍ରାଏଲ୍ ନେନେ ଉଂ, ନେନେ ମ୍ନାଃ ଉଂ; 23 ନେ ଆନାକେ ବାସଙ୍ଗ୍ନେବକେ, ଆନେକେ ସେବା ଡିଂନେସା ନା ନେଉଂକେ ଆନ୍ତର୍ବି; ମାତର୍ ନା ଆମେକେ ଆନ୍ତାର୍ନେ ମନା ଡିଂନାଡିଂକେ; କେଲା, ନେ ନାଉଂକେ ଆରି ନାନେ ପର୍ତୁମ୍ ଜନମ୍ ଡିଂକ୍ନେ ଉଂକେ ନେବାଗୁଏଃଏ ।
24 ଏନ୍ଇଡ଼ିଂ ଅଲେଙ୍ଗ୍ନେ ଗାଲିନେ ମଜେ ଲେକ୍ନେ କୁଡ଼ିଆନିଆ ମାପ୍ରୁ ଆମେକେ ଅବାଚେ ବାଗୁଏନ୍ସା ଚେସ୍ଟା ଡିଂକେ । 25 ଆତେନ୍ ବେଲା ସିପ୍ପରା ମୁଇଂ ଡିଗ୍ଲେକ୍ନେ କାଣ୍ଡା ସାଚେ ନିଜେନେ ଉଂକେ ସୁନ୍ନତ ଆଃଡିଂଚେ ମେଁ ଞ୍ଚ ବୁନ୍ଦେ ଜଗ୍ତ୍ଲାଗ୍ଚେ ବାସଙ୍ଗ୍କେ, ନା ସତେଆ ନେଙ୍ଗ୍ନେ ମିୟାଁନେ ଙ୍ଗିର୍ବୁଏ । 26 ଦେକ୍ରକମ୍ ପର୍ମେସର୍ ଆମେକେ ଆନ୍ତାର୍ ବିକେ । ଆତ୍ବା ଆତେନ୍ ସେଲାମ୍ବୁଏଃ ବାସଙ୍ଗ୍କେ, ସୁନ୍ନତ୍ ଡିଂଚେ ନା ନେଙ୍ଗ୍ନେ ମିୟାଁନେ ଙ୍ଗିର୍ବୁଏ ଡିଂନାଲେଃକେ ।
27 ଆତ୍ବା ମାପ୍ରୁ ହାରୋଣକେ ବାଲିର୍କେ, ନା ମୋଶା ଏତେ କୁଡ଼େନ୍ସା ବାଲିଲନିଆ ୱେଲା; ଆତ୍ବା ମେଁ ୱେଚେ ପର୍ମେସର୍ନେ କଣ୍ଡାନିଆ ମେଁ ଏତେ କୁଡ଼େଚେ ଆମେକେ ବୟ୍ନ୍ତାକେ । 28 ଆତେନ୍ ବେଲା ମୋଶା ମାପ୍ରୁ ବେବକ୍ନେ ସାପା ବ୍ନାଲିର୍ ବାରି ମେଁନେ ସାପା ଆଦେସ୍ ବାରି ସାପା ଚିନ୍ ହାରୋଣକେ ଆଃମ୍ୟାକେ । 29 ଆତ୍ବା ମୋଶା ବାରି ହାରୋଣ ୱେଚେ ଇସ୍ରାଏଲ୍ ରେମୁଆଁଇଂନେ ମ୍ନାରେଇଂକେ ମୁଇଂତୁଗ୍ ରାସିଙ୍ଗ୍କେ । 30 ବାରି ହାରୋଣ ଆମେଇଂକେ ମୋଶାବାନ୍ ବାସଙ୍ଗ୍ବକ୍ନେ ମାପ୍ରୁନେ ସାପା ବ୍ନାଲିର୍ ବାସଙ୍ଗ୍କେ, ବାରି ରେମୁଆଁଇଂନେ ସାମ୍ନେ ଆତେନ୍ ସାପା ଚିନ୍ ଆଃସୁଏକେ । 31 ଆତ୍ବା ରେମୁଆଁଇଂ ବିସ୍ବାସ୍ ଡିଂଆର୍କେ, ବାରି ମାପ୍ରୁ ଇସ୍ରାଏଲ୍ ରେମୁଆଁଇଂନେ ଜତନ୍ ଡିଂଚେ ମେଙ୍ଗ୍ନେ ଦୁକ୍ କେବକେ, ଆକେନ୍ ଅଁଚେ ମେଇଂ ଆମେକେ ସାର୍ଲଚେ ପାର୍ତନା ଡିଂଆର୍କେ ।
/images/a/Tcg2NiV7ce24OT6kCIQGR)
/images/a/a0208299-6f37-40a0-66e1-2576b9435f00)