1 ጎዳይ ታ ዋሱዋነ ታ ዎሳ ስእዳ ግሾ፥

ታኒ እያ ዶሳይስ።

2 እ ባ ሀይ ታኮ ዛርዳ ግሾ፥

ታ ደኦ ላይ ኡባን እያ ፄጋና።

3 ሀይቆይ ፅሄዳ ታና ተቅስ፤

ዱፎ ህርጋይ ታና ኦይክስ፤

ኡንእነ መቶይ ታና ቃችስ።

4 ሄ ዎደ፥ "አቤት ጎዳዉ፥ ታና አሻ"

ያጋዳ ጎዳ ሱን ፄጋስ።

5 ጎዳይ ኬሀነ ፅሎ፤

ኑ ፆሳይ ቃቴስ።

6 ጎዳይ አሽከታ ናጌስ፤

ታ መቶትዳ ዎደ ታና አሽስ።

7 ጎዳይ ነዉ ኬሀ ግድያ ግሾ፥

ህዛ ታ ሸምፐ፥ ዎፑ ጋ።

8 ጎዳይ ታ ሸምፑዋ ሀይቆፐ፥

ታ አይፍያ አፉፈ፥

ታ ቶሁዋ በፐ አሽስ።

9 ታኒ ደኦን ደኤይሳታ ግዶን፥

ጎዳ ስንን ሄመታይስ።

10 ታኒ፥ "ዳሮ ዋየታስ" ግዳ ዎደ፥

ታ አማኑዋ አጋብከ።

11 ታዉ ሳእ ሀድርዳ ዎደ፥

"አስ ኡባይ ዎርዳንቾ" ያጋስ።

12 እ ታዉ ኬህዳ ኬሀተ ግሾ

ጎዳስ አይ ቃንፃናዉ ዳንዳእያና?

13 ጎዳይ ታና አሽዳ ግሾ ጋላታና፥

ፁአ ዎይነ ኡሻ ያርሾ ኦዳ ሺሻና።

14 እያ አሳ ኡባ ስንን

ታ ቃንገ ጎዳስ ጋና።

15 ጌሻታ ሀይቆይ

ጎዳ ስንን፥ ዳሮ አልኦ።

16 አቤት ጎዳዉ፥ ታኒ ነ አይለ፤

ታኒ ነ አይለ፥ ነ ጋንደ ናኣ፤

ታና ቃሾፐ ነ ብርሻዳሳ።

17 ጎዳዉ፥ ታ ጋላታ ያርሾ ነዉ ያርሻና፤

ነ ሱን ፄጋና።

18 አሳ ኡባ ስንን

ታ ቃንገ ጎዳስ ጋና።

19 የሩሳላመን ደእያ ፆሳ ኬ ዳባባን፥

ታ ቃንገ ጋና።

ጎዳ ጋላትተ።