Salmos 46

ፆሳይ ኑራ ደኤስ

ቆረ ናይት ዛማረታ ሀላቃስ ፃፍዳ ማዝሙረ

"ጌላኦ ናይታ የ" ጌተትያ ጩን የፀትዳ ማዝሙረ

1 ፆሳይ ኑ ቆሰትድ አትያ፥

በሰነ ኑ ዎልቃ።

ኑና መቶይ ጋክያ ዎደ፥

እ ኑና ማዳናዉ ኡባ ዎደ ኑ ማታን ደኤስ።

2 ሄሳ ግሾ፥ ቢታይ ቃፅያኮካ፥

ደረት አባን ኩንድያኮካ፥

ኑኒ ያዮኮ።

3 አባይ ጉምድ ጎፖንትኮካ፥

እያ ዎልቃማ ዙልያን ደረት ኮኮርያኮካ፥

ኑኒ ዳጋሞኮ። ሳላሀ።

4 ኡባፈ ቃ ፆሳይ ደእያ፥ ፆሳ ካታማ፥

ጌሻ በሳ፥ ኡፋይስያ እስ ሻፍ ደኤስ።

5 ፆሳይ እያ ግዶን ደእያ ግሾ፥

ሄ ካታማይ ቃፀና፤

ዎንታ ጉራ ፆሳይ እያ ማዳና።

6 ደረይ ዳጋምስ፤ ካዎተት ቃፆሶና፤

ፆሳይ ባ ቃላ ስስስ፤ ቢታይ ትልእስ።

7 ኡባፈ ዎልቃማ ጎዳይ ኑራ ደኤስ፤

ያይቆባ ፆሳይ ኑ ቆሰትድ አትያ በሰ። ሳላሀ

8 ሃ ዪተ፤ ጎዳ ኦሱዋ ፄልተ፤

ቢታ ዋትድ ይስዳኮ በእተ።

9 እ ቢታ ቦላ ደእያ ኦላ ኡባ ተቄስ፤

ዶንገነ ቶራ መንስ፤

ጎንዳልያ*46:9 ጎንዳልያ፦ እብራወ ዶናን ሀረ ጋረ ጌተቴስ። ታማን ፁጌስ።

10 ዎፑ ጊተ፤ ታኒ ፆሰ ግደይሳ ኤርተ፤

ታኒ ካዎተታ ግዶን ቁ ቁ ጋና፤

ቢታ ቦላካ ቁ ቁ ጋና።

11 ኡባፈ ዎልቃማ ጎዳይ ኑራ ደኤስ፤

ያይቆባ ፆሳይ ኑ ቆሰትድ አትያ በሰ። ሳላሀ።