1 ፆሳይ ደንዶ፤ እያ ሞርከት ላለቶ፤

እያ እፀይሳት እያ ስንፈ ባቃቶ።

2 ጩያይ ጫርኮራ ደንድድ ይስያ መላ፥

ሙቃድ ታማን ትልኤይሳዳ፥

ኢታት ፆሳ ስንፈ ዮ።

3 ሽን ፅሎት ሀሹ ጎ፤

ፆሳ ስንን ኡፋይቶ፤

ኡፋይሳን እልሎ።

4 ፆሳስ የፅተ፤ እያ ሱን ሳቢተ፤

ሻራን በይሳስ ኦገ ከስተ፤

እያ ሱንይ ጎዳ፤ እያ ስንን ኡፋይትተ።

5 ፆሳይ ባ ደእያ ጌሻ በሳን፥

ይኦታስ አዋ፤ አምኤታስ ዳይና።

6 ፆሳይ ብዛታስ ሶ አስ እሜስ፤

ቃሾ ኬን ደኤይሳታ ብርሽድ፥ ዱረተን ዎስ፤

ሽን ማካላንቾት ቃቃ ቢታን ደኦሶና።

7 አቤት ፆሳዉ፥ ኔኒ ነ አሳ ካለዳ ዎደ፥

ነ ኤንታራ መላ ቢታ ካንዳ ዎደ፥ ሳላሀ

8 ሲና ፆሳ ዩሳንነ፥

እስራኤለ ፆሳ ቆንጨን

ቢታይ ቃፅስ፤ ሳሎይ እራ እሚስ።

9 አቤት ፆሳዉ ኔኒ እራ ዳርሳዳ ቡክሳዳሳ፤

ላድዳ ቢታ ዛራዳ ኦራሳ።

10 ነ አሳይ ያን ዱሱ ኦይክስ፤

አቤት ፆሳዉ፥ ነ ኬሀተን ማንቆታስ

ኮሽያባ ጊግሳዳ እማዳሳ።

11 ጎዳይ ኪትስ፤

ዳሮ ማጫሳት ሄ ኪታ ማርካትዶሶና።

12 ካዎትነ ኤንታ ኦላንቾት

ባቃትድ ጉየ ስምዶሶና፤

ሶን አትዳ ማጫሳት ድኦ ሻከትዶሶና።

13 ጶልያ ዎርቃ ቀፈራ ደእያ፥

ብራፐ መትዳ ሆለ ምስለ ድእድ ደምያ ዎደ

ህንተ ዶርሳ ከለን አይስ ዝንእደት?

14 ኡባ ዳንዳእያ ፆሳይ ካዎታ ላልዳ ዎደ፥

ፃልሞና ዙማ ቦላ ሻቻ ቡክስስ።

15 ባሳነ ዙማዉ፥

ዳሮ ፄር ደእያ ባሳነ ዙማዉ፥

16 ዳሮ ፄራት ደእያ ዙማቶ፥

ፆሳይ ዶርዳ ዙማ

ህንተ አይስ ቃናትድ ፄሌቲ?

ጎዳይ እያን መርናዉ ዳና።

17 ፆሳ ኦላ ፓራ ጋረት

ታሙ ሙኩሉ ቶሆ ታሙ ሙኩላን ታይበቴስ፤

ጎዳይ ሲና ዙማፐ ባ ጌሻ በሳ ይስ።

18 ድኤትዳ ዳሮታ ኤክድ፥ ቃ ከይስ፤

አሳፐ፥ ሀር አቶሽን ማካላንቾታፐ እሞ ኤክስ፤

ጎዳይ ፆሳይ ያን ዳና።

19 ጋላስ ጋላስ ኑ ቶሁዋ ቶክያ ጎዳይ ጋላተቶ፤

ፆሳይ ኑና አሸይሳ። ሳላሀ

20 ኑ ፆሳይ ኑና አሽያ ፆሳ ግደኔ?

ሀይቆፐ አሽያ ፆሳይ እያ።

21 ፆሳይ ቱማ ባ ሞርከታ ሁጵያ ትንቻና፤

ናጋራ ኦገን ሄመትያ አሳ፥

ብናናን ካመትዳ ኤንታ ሊጵያ መንና።

22 "ታኒ ህንተ ሞርከታ

ባሳነፐ ዛራዳ ኤሀና፤

ታ ኤንታ ጪሞ አባፈ ከሳዳ ጉየ ኤሀና።

23 ሄስካ፥ ነ ሞርከታ ሱ ነ ቶሆይ የና መላነ

ነ ካናትካ ሞርከ ሱፈ ባንታ ግሹዋ ላጫና መላሳ" ያጌስ ጎዳይ።

24 አቤት ፆሳዉ፥ ነ ሳልፐይ፥

ታ ፆሳይ ታ ካዎይ ሳልፐይ፥

ፆሳ ኬ ገልያ ዎደ ኡባስ በንቴስ።

25 የፀይሳት ስንና፤ ዲፀይሳት ጉየና፤

ቃስ ካራቦ ባቅያ ጌላኦት ግዶና።

26 ህንተ "ፆሳ ግታ ሺቆን ጋላትተ፤

ህንተኖ፥ እስራኤለ አሳዉ፥ ጎዳ ጋላትተ" ያጎሶና።

27 ሄ ሳልፕያን ኡባፈ ካሎ ግድዳ

ብንያመ ኮቻይ ኮይሮ ታይበቶሶና።

ካልድ ይሁዳ ሀላቃት ባንታ ጩጋን ደኦሶና፤

ዉርሰን ዛብሎና ሀላቃትነ

ንፍታለመ ሀላቃት ታይበቶሶና።

28 አቤት ፆሳዉ፥ ነ ዎልቃ ቆንጭሳ፤

ካሰ ነ ኑስ ኦዳይሳዳ፥

ነ ምኖተ በሳ።

29 ሄሳ ግሾ፥ የሩሳላመን ደእያ

ነ ኬ ካዎት ይድ፥

ነዉ እሞታ እማና።

30 ዶአዳ ማቃ ግዶን ደእያ ግብፀ አሳታ ኔኒ ሴራ፤

ቦሩነ ማራ ዉደ ዳንያ ካዎተታ ነ ሀንቀታ።

ኤንቲ ጉልባትድ፥ ባንታ ብራ ነዉ እማና ጋካናዉ፥

ኔኒ ኤንታ ሴራ፤ ኦለታናዉ ዬሞትያ አሳታ ላላ።

31 ኪተትዳ ሀላቃት ግብፀፈ ያና፤

ቶጰይ ባ ኩሽያ ፆሳኮ ምጫና።

32 ህንተኖ፥ ሳኣ ካዎተቶ፥

ፆሳስ የፅተ። ሳላሀ

33 በንፐ ደእያ ሳሎታፐ ቦላራ በይሳስ፤

ባ ዎልቃማ ግርሳን ባ ጉን ስሰይሳስ የፅተ።

34 ፆሳ ዎልቃባ አዋጅተ፤

እያ ግታተይ እስራኤለ ቦላና፤

እያ ዎልቃይካ ሳሎና።

35 ፆሳይ ባ ጌሻ አሳ ቦላ ማላልሴስ፤

እስራኤለ ፆሳይ ባ አሳስ

ምኖተነ ዎልቃ እሜስ።

ፆሳይ ጋላተቶ።