1 ታ አሳዉ፥ ታ ትምርትያ ስእተ፤

ታ ዶናፐ ከይያ ቃላ ሀይዝድ ስእተ።

2 ታኒ ታ ዶና ሌምሶን ዶያና፤

በንፐ ጌምዳ ፁራ ቆንጭሳና።

3 ኑኒ ስእዳይሳነ ኤርዳይሳ፥

ኑ አዋት ኑስ ኦድዳይሳታ ኦዳና።

4 ሄሳታ ኑኒ ኤንታ ናይታፐ ቆሶኮ፤

ጎዳስ በሲያ ጋላታ፥

እያ ዎልቃነ ማላልስያ እያ ኦሱዋ፥

ያና የለታስ ኦዳና።

5 እ ያይቆባ ዘረስ ኪታ፥

እስራኤለ አሳስ ህግያ እሚስ።

ካሰ ኑ አዋት ባንታ ናይታ

ሄ ህግያ ታማርሳና መላ ኪትስ።

6 ካልያ የለታይ ሄሳ ኤራና መላ፥

ኤንታ ናይትካ ባንታ ናይታስ

ቡሮ የለታና ናይታስ ኤርሳናሳ።

7 ሄ ዎደ ኤንቲ ፆሳን አማነተና፤

እ ኦዳባ ባሎኮና፤ እያ ኪታ ናጋና።

8 ኤንቲ ካሰ ባንታ አዋታዳ ዎዛና ሙመ የለታ፥

ጌላነ አማነቶና የለታ፥

ፆሳን ምንድ ኤቀና የለታ ግዶኮና።

9 ኤፍሬማ አሳይ ዶንገ ዳንጭኮካ፥

ኦላ ጋላስ ጉየ ስምዶሶና።

10 ኤንቲ ፆሳ ጫቁዋ ናግቦኮና፤

እያ ህግያን ሄመቶና እፅዶሶና።

11 ኤንቲ እ ኦዳ ኦሱዋነ

እ በስዳ ማላታ ዶግዶሶና።

12 እ ኤንታ አዋታ ስንን ግብፀ ቢታን፥

ፆኣነ ደንባን ማላታ ኦስ።

13 አባ ሻክድ ግዶራ ኤንታ ፕንስ፤

ሃ ሻክድ ያን ሀን ጎዳዳ ኤስስ።

14 እ ኤንታ ጋላስ ሻራን፥

ቃማ ታማ ፖኦን ካለስ።

15 እ መላ ቢታን ዛላ ጳልቅድ፥

አባዳ ዳሮ ሃ ኤንታ ኡሽስ።

16 ዛላፈ ሃ ፑልትስድ፥

ሻፋ ሃዳ ጎግስስ።

17 ሽን ኤንቲ እያ ቦላ ናጋራ ጉጅድ ኦዶሶና፤

ኡባፈ ቃ ፆሳ ቦላ መላ ቢታን ማካልዶሶና።

18 ባንታ አሞትዳ ካ ኦይችድ፥

ፆሳ ኤርሸ ፓጭዶሶና።

19 ኤንቲ ፆሳ ቦላ ሀይሳዳ ያግድ ሃሳይዶሶና፤

"መላ ቢታን ፆሳይ ኑስ ካ ጊግሳናዉ ዳንዳኢ?

20 ዛላ ሾጭን ፑልቶይ ከይድ

ሻፋ ሃ ጎግስ፤

ሽን እ ኑስ ካ እማናዉ ዳንዳኢ?

ዎይኮ ባ አሳስ አሾ እማናዉ ዳንዳኢ?" ያግዶሶና።

21 ጎዳይ ሄሳ ስእዳ ዎደ ዳሮ ሀንቀትስ፤

ያይቆባ ኮቻታ ቦላ ታም ኤፅስ፤

እስራኤለ ቦላ እያ ሀንቆይ ዳርስ።

22 ሄስካ ኤንቲ ፆሳን አማንቦኮና፤

ዎይኮ እያ አሹዋን አማነትቦኮና።

23 ግዶሽን፥ ቃ ሳሉዋ ኪትስ፤

ሳሎ ፐንግያ ዶይስ።

24 ኤንታ ሙዛናዉ ማና ቡክስስ፤

ሳሎ ካ ኤንታዉ እሚስ።

25 ኪታንቾታ ካ አሳይ ምስ፤

ፆሳይ ኤንታዉ ምያባ ዳርስድ እሚስ።

26 ዶሎሀ ጫርኮይ ጫርካና መላ ኦስ፤

ባ ዎልቃን ዱገሀ ጫርኩዋ ደንስ።

27 እ አሳስ አሾ ቢታ ከስስ፤

ፓልያ ካፎታ አባ ጋፃ ሻፈዳ ቡክስስ።

28 ኤንቲ ደእያ በሳን፥

ዱንካንያ ዩሾን ዎስስ።

29 ኤንቲ አሞትዳይሳ ኤንታዉ እሚስ፤

ምድ ባንታ ጋንጅያ ጋዶሶና።

30 ሽን ኤንቲ ባንታ አሙዋ አና ደእሽን፥

አሾይ ኤንታ ዶናን ቡሮ ደእሽን፥

31 ፆሳ ሀንቆይ ኤንታ ቦላ ዎስ፤

ኤንታ ግዶፈ ዎልቃማ አሳታ ዎስ፤

እስራኤለፐ ናአተታ ክስ።

32 ሄ ኡባይ ሀንንካ ናጋራ ኦሶ አግቦኮና፤

ዳሮ ማላታ ኦንካ አማንቦኮና።

33 ሄሳ ግሾ፥ እ ኤንታ ጋላሳታ ሀዳ ኦስ፤

ኤንታ ላይታ ዳጋማን ኦንግስ።

34 ፆሳይ ኤንታፈ ባጋ ዎያ ዎደ

እያ ኮይዶሶና፥

ባንታ ናጋራ ፓፅድ እያኮ ስምዶሶና።

35 ፆሳይ ኤንታ ዛላ ግደይሳ፥

ኡባፈ ቃ ፆሳይ ኤንታ ዎዘይሳ፥

ግደይሳ ሀሳይዶሶና።

36 ሽን ኤንቲ ባንታ እንፃርሳን ዎርዶትዶሶና፤

ባንታ ዶናን ጭምዶሶና።

37 ኤንታ ዎዛናይ ፆሳን ምንድ ኤቀና፤

እያ ጫቁዋስ አማነቶኮና።

38 ሽን እ ኤንታ ማርስ ኤንታ ናጋራ አቶ ግስ፤

ኤንታ ይስቤና።

ዳሮ ዎደ ባ ሀንቁዋ ተቅስ፤

ባ ጋዱዋ ኩመ ኤንታ ቦላ የድቤና።

39 ኤንቲ ሀይቅያ አሾ ግደይሳነ

ከይድ ስሞና ሸምፖ ግደይሳ አኬክስ።

40 ኤንቲ መላ ቢታን እያ ቦላ አፑን ቶሆ ማካልዶና!

መላ ቢታን እያ አፑን ቶሆ ላንጭስዶና!

41 ኤንቲ ዛር ዛሪድ ፆሳ ፓጭዶሶና፤

እስራኤለ ጌሻ ይሎይዶሶና።

42 ኤንታና ሞርከታ ኩሸፐ አሽዳ ጋላሳ፥

ኡንኤያ አሳፐ ዎዝዳ ዎልቃ ዶግዶሶና።

43 እ ግብፀን ኦዳ ማላታ፥

ፆኣነ ደንባን ኦዳ

ማላልስያ ኦሱዋ ሀሳይቦኮና።

44 ኤንታ ሻፋ ሃታ ሱ ላምስ፤

ሄሳ ግሾ፥ ግብፀ አሳይ ሻፋታፐ

ኡያናዉ ዳንዳእቦኮና።

45 ኤንታ ዋይስያ ኡዱንፀታነ

ኤንታ ቢታ ይስያ ሾታ ኪትስ።

46 ዶልዳ ካ ዱጎስ፥

ኤንቲ ዳቡርዳ አይፍያ ቦለስ እሚስ።

47 ኤንታ ዎይንያ ሻቻን፥

ኤንታ ባላስያ ጫርኮን ይስስ።

48 ኤንታ መሄታ ሻቻን ዎስ፤

ኤንታ ዶርሳታ ዳዳን ዉርስስ።

49 ይስያ ኪታንቾ ጩጋራ፥

ባ ሱልያ ሀንቁዋ፥ ይሉዋ፥ እፁዋነ

ጋዱዋ ኤንታ ቦላ የድስ።

50 ባ ሀንቁዋስ ኦገ ጊግስስ፤

ኤንታ ዮስ አድ እሚስ፤

ኤንታ ሀይቆፐ አሽቤና።

51 ግብፀ ባይራ ናይታ ኡባ ሾጭስ፤

ካማ ዱንካነን ኮይሮ ናይታ ዎስ፤

52 ሽን ባ አሳ ዶርሳዳ ከስስ፤

ዉደዳ መላ ቢታን ሄምስ።

53 እ ኤንታ ሳሮ ካለዳ ግሾ ባብቦኮና፤

ሽን ኤንታ ሞርከታ አባይ ምትስ።

54 እ ኤንታ ባ ጌሻ ቢታ፥

ባ ኡሻቻ ኩሸን ፆንድ ኦይክዳ ዙማ ቦላ ኤህስ።

55 እ ኤንታ ስንፈ ካዎተታ ጎድስ፤

ኤንታ ቢታ እስራኤለ ኮቻታስ ላታ ኦድ ሻክስ፤

ባ አሳስ ኤንታ ኬ እሚስ።

56 ግዶሽን፥ ኡባፈ ቃ ፆሳ ቦላ ማካልዶሶና፤

እያ ፓጭዶሶና፤ እያ ህግያ ኪተትቦኮና።

57 ኤንቲ ባንታ አዋታዳ ጌላታነ

ምንድ ኤቆና አስ ግድዶሶና፤

ዎበ ቶራዳ ዎራ ዎዶሶና።

58 ቃ ጎይኖ በሳታን እያ ይሎይዶሶና፤

ባንታ ኤቃታራ እያ ቃናትስዶሶና።

59 ፆሳይ ሄሳ ስእዳ ዎደ ሸነትስ፤

እስራኤለ ኡባ ካስ።

60 ሴሎን እ ደእያ ባ በሳ፥

አሳ ግዶን እ ደእያ ባ ዱንካንያ አግስ።

61 ፆሳ ዎልቃስነ ቦንቹዋስ

ማላታ ግድዳ ታቦትያ

ሞርከታ ኩሸን አድ እሚስ።

62 እ ባ አሳ ቦላ ሸነትስ፤

ኤንታ ማሻስ አድ እሚስ።

63 ናአተት ኡባይ ታማን ሜተትዶሶና፤

ጌላኦት አዝና ገሎና አትዶሶና።

64 ኤንታ ካህነት ማሻን ዉርዶሶና፤

ኤንታ ማቸት ዬኮና መላ ድገትዶሶና።

65 ጎዳይ ስኮፈ ባርክያ አሳዳ ደንድስ፤

ዎይነ ኡሻ ማይ አዳ አሳዳ ሀንስ።

66 እ ባ ሞርከታ ጉየ ዛሪድ ሾጭስ፤

ኤንታ መርናዉ ዬላይስ።

67 ዮሰፋ ዱንካንያ ካስ፤

ኤፍሬማ ኮቻ ዶርቤና።

68 ሽን ይሁዳ ኮቻነ

እ ዶስያ ፅዮነ ደርያ ዶርስ።

69 ባ ኬ ሳሎዳ ቁ ኦድ ኬፅስ፤

ሳአዳ መርናዉ ኤስስ።

70 ባ አይልያ ዳዊታ ዶርድ፥

ዶርሰ ሄምያ በሳፈ ኤክስ።

71 ዶርሰ ሄምያ በሳፈ ደንድ፥

ባ አሳ ያይቆባ፥

ባ ላታ እስራኤለ ሄንናዉ ኤህስ።

72 ዳዊቲ ኤንታ ሱረ ዎዛናን ሄምስ፤

ባ ጭንጫተን ካለስ።