ዛማረታ ሀላቃስ ፃፈትዳ ዳዊታ ማዝሙረ

"ናአ ሀይቆን" ጌተትያ ጩን የፀትያ ማዝሙረ

1 አቤት ጎዳዉ፥ ታ ነና ታ ኩመ ዎዛናፐ ጋላታና፤

ኔኒ ኦዳ ማላልስያ ኦሶ ኡባ ኦዳና።

2 ታኒ ነናን ኡፋይታና ሀሹ ጋና።

ኡባፈ ቃ ፆሳዉ፥

ታኒ ነ ሱንስ ጋላታ ማዝሙረ የፃና።

3 ታ ሞርከት ጉየ ስምያ ዎደ፥

ነ ስንፈ በትድ ያና።

4 ነ አራታን ኡታዳ ታዉ ፅሎ ፕርዳሳ፤

ታ ሞቱዋ ነ ፅሎተን ኦይካዳሳ።

5 ኔኒ ካዎተታ ሴራዳሳ፤

ኢታታ ይሳዳሳ።

ኔኒ ኤንታ ሱን መርናዉ ቁቻዳሳ።

6 ሞርከት መርናዉ ይዶሶና፤

ኤንታ ካታማታ ኩመ ላላዳሳ፤

ኤንቲ ኩመ ዶገትዶሶና።

7 ሽን ጎዳይ መርናዉ ካዎትድ ደኤስ፤

እ ባ አራታ ፕርዳስ ጊግስስ።

8 ሀ ሳኣ ፅሎተን ፕርዳና፤

ደረታ ሱረተን አይሳና።

9 ጎዳይ ኡንኤትዳይሳታስ አትያ በሲ፤

መቶ ዎደ ገልድ አትያ ቆታ።

10 ነና ኤረይሳት ነናን አማነቶሶና፤

ጎዳዉ፥ ነና ኮየይሳታ የጋ አጋካ።

11 ፅዮነን ካዎትዳ ጎዳ ጋላትተ፤

እ ኦዳ ኦሱዋ አሳ ኡባስ ኦድተ።

12 ሀሎ ከይያ ፆሳይ ጉክዳ ፅሎ ሱ ዶገና፤

ቦረትዳይሳታ ዋሱዋ ቀል ጌና።

13 አቤት ጎዳዉ፥ ታዉ ቃታ፤

ታ ሞርከት ታ ቦላ ኤህያ መቱዋ በአ፤

ሀይቆፐ ታና አሻ።

14 ፅዮነ አሳ ግዶን ታኒ ኤቃዳ፥

ነ ጋላታ ኦዳና፤

ነ አቶተን ኡፋይታና።

15 ካዎተት ባንታ ቦክዳ ኦላን

ባንታዉ ኩንድዶሶና፤

ኤንቲ ዎዳ ፅሄይ ኤንታ ቶሁዋ ኦይክስ።

16 ጎዳይ ባ ፅሎ ፕርዳን ኤረትስ፤

ኢታ አሳይ ባንታ ኢታ ኦሱዋን ኦይከትዶሶና። ሳላህ

17 ኢታት ዱፎ ባና፤

ፆሳ ዶግያ ካዎተት ኡባይ ኤንታዳ ሀናና።

18 ማንቆይ ኡባ ዎደ ዶገትድ አተና፤

መቶታንቹዋ ኡፋይሳይ መርናዉ የና።

19 አቤት ጎዳዉ ደንዳ፤ አስ ፆኖፖ!

ካዎተት ነ ስንን ፕርደቶ።

20 አቤት ጎዳዉ ኤንታ ኔኒ ያሽሳ፤

ካዎተት አሰ ግደይሳ ኤሮ። ሳላሀ።