1 ጎዳስ ኦራ ማዝሙረ የፅተ፤

ሳአን ደእያ አሳ ኡባይ ጎዳስ የፅተ።

2 ጎዳስ የፅተ፤ እያ ሱን ሳቢተ፤

እያ አሹዋ ጋላስ ጋላስ ኦድተ።

3 ካዎተታ ግዶን እያ ቦንቹዋ፥

አሳ ኡባ ግዶን እያ ማላልስያ ኦሱዋ አዋጅተ።

4 ጎዳይ ግታ ግድያ ግሾ እያዉ ግታ ጋላቲ በሴስ፤

ፆሳታ ኡባፈ አድ ያየታናዉ በሴስ።

5 ሀራ ካዎተታ ፆሳት ኡባይ ኤቃታ፤

ሽን ጎዳይ ሳሎታ መዳ ፆሳ።

6 ቦንቾይነ ሳብ እያ ዩሾን ደኤስ፤

ምኖተነ ፑላተ እያ ኬን ደኤስ።

7 ቢታን ደእያ አሳ ዛረ ኡባይ ጎዳባ ኦድተ፤

ቦንቾይነ ዎልቅ ጎዳባ ጊተ።

8 እያ ሱንስ በሲያ ቦንቹዋ ጎዳስ ኤህተ፤

ያርሾ ኤክድ እያ ዳባባ ገልተ።

9 እያ ጌሻተ ቴሙዋን ጎዳ ጎይንተ፤

ቢታን ደእያ አሳዉ ኡባይ እያ ስንን ኮኮርተ።

10 ካዎተታ ግዶን፥ "ጎዳይ ካዎትስ!

ሳአይ ምንድ ኤቅስ፤ ቃፀና፤

እ አሳ ቦላ ሱረ ፕርዳና" ያግተ።

11 ሳሎት ኡፋይቶ፤ ሳእካ ሀሹ ጎ፤

አባይነ እያ ግዶን ደእያ ኡባይ ጉሞ።

12 ጎሻይነ እያን ደእያ ኡባይ ኡፋይቶ!

ዎራን ደእያ ም ኡባይ ኡፋይሳን የፆ።

13 ጎዳይ ያ ግሾ እያ ስንን የፆ፤

እ ሳአ ቦላ ፕርዳናዉ ዬስ።

እ ሀ ሳኣ ቦላ ፅሎተን፥

አሳ ቦላ ቱማተን ፕርዳና።