1 ତାନ୍‌ପେର୍କେ ଯିଶୀର ଗୁଣ୍ଡିତାଗାଙ୍କ୍‌ ୱେରଡ଼୍‌ ମାଡ଼େ ଆଦ୍‌ତେ ନୁ ଆଦିଙ୍କ୍‌ ମଦଲ୍‌କଞ୍ଜ୍‌ ୱେରଡ଼୍‌ କମେ ପେଇସ୍‌ କାୟା ଆଦିତା; 2 ମେଣ୍ଡେ, ସଦାପ୍ରବୁନ୍‌ ଆତ୍ମା, ଜ୍ଞାନ ନୁ ଏର୍କେତେ ଆତ୍ମା, ମନ୍ତର୍‌ ନୁ ଶକ୍ତିତେ ଆତ୍ମା, ପେର୍ସିତ୍‌ ନୁ ସଦାପ୍ରବୁ ବିଷୟତେ ୱେର୍‌ତେ ଆତ୍ମା ଅନାଗ୍‌ମାନ୍ତେ; 3 ସଦାପ୍ରବୁ ବିଷୟତେ ୱେର୍‌ଦେ ଅନ୍‌ ୱେଡ଼୍‌କେ ଆଦ୍‌ତେ; ମେଣ୍ଡେ, ଅଣ୍ଡ୍‌ ନିଜେତ୍‌ କଣ୍ଡେତେ ଦୃଷ୍ଟି ଲେକାମ୍‌ ବିଚାର୍‌ ମାଡ଼ଣ୍ଡ୍‌, କି ନିଜେତ୍‌ କେୱୁଦେ କେଞ୍ଜାନଙ୍କ୍‌ ତିଆର୍‌ ଆୟଣ୍ଡ୍‌, 4 ମାତର୍‌ ଅଣ୍ଡ୍‌ ଦର୍ମତେ ଗରିବ୍‌ନଡ଼୍‌ ବିଚାର୍‌ ମାଡ଼ିତଣ୍ଡ୍‌ ନୁ ପୃତିବିତେ ସରଲ୍‌ ନାରୁଡ଼୍‌ ସେଙ୍ଗେ ନ୍ୟାୟତାଗ୍‌ ମାନ୍‌ ୱାଟିତଣ୍ଡ୍‌; ମେଣ୍ଡେ, ଅଣ୍ଡ୍‌ ନିଜେତ୍‌ ମକମ୍‌ତେ କେତାନାଦିନ୍‌ତଡ଼୍‌ ଆଦ୍‌ ଦଣ୍ଡ୍‌ତଡ଼୍‌ ପୃତିବିତିଙ୍କ୍‌ ରେଃତିତଣ୍ଡ୍‌ ନୁ ତାନ୍‌ ପାୟୁର୍‌ତାଲାନ୍‌ ନେସ୍କାନ୍‌ନେ ଦୁଷ୍ଟଡ଼୍‌କିଙ୍କ୍‌ ଆୱୁକିତଣ୍ଡ୍‌। 5 ଦର୍ମ ତାନ୍‌ ଟିକିଡ଼୍‌ତେ ବେଲ୍‌ଟ୍‌ ନୁ ବିଶ୍ୱାସ୍ତେ ତାନ୍‌ ଟିକିଡ଼୍‌ତେ ସାର୍‌ ପାକେତ୍‌ ବେଲ୍‌ଟ୍‌ ଆଦ୍‌ତେ। 6 ମେଣ୍ଡେ, ଗଣ୍ଡ୍‌ରାସ୍‌ ମେଣ୍ଢ୍‌ପିଲାନ୍‌ତଡ଼୍‌ ଅଣ୍ଡୟ୍‌ତାଗ୍‌ ବାସେ ମାଡ଼ିତେ ନୁ ସିଂହଡୁୱୁ ମେକାପିଲେତଡ଼୍‌ ଉଞ୍ଜିତେ; ପେୟେ, ଲେୟେ ଡୁୱୁ ନୁ ଦାମ୍‌ଦାମା ମେନ୍ଦୁଲ୍‌ ମାନ୍ଦାନ୍‌ ପଶୁ ଅଣ୍ଡୟ୍‌ତାଗ୍‌ ମାନ୍ତା; ମେଣ୍ଡେ, ୱେରଡ଼୍‌ ସୁଦୁର୍‌ ପିଲେ ଅଡ଼୍‌କିଂଙ୍କ୍‌ ମୁସିଦ୍‌ତେ। 7 ମେଣ୍ଡେ ପେୟେ ନୁ ହେଡ଼୍‌ଜ୍‌ ଅଣ୍ଡ୍‌ୟ୍‌ଦାମ୍‌ ମେୟିତା ଆୱିନ୍‌ ପିଲା ସାରେ ଅଣ୍ଡୟ୍‌ତାଗ୍‌ ଉଞ୍ଜିତା; ମେଣ୍ଡେ, ସିଂହଡୁୱ୍‌ ବାର୍‌ରେ ଲେକାମ୍‌ ପିସିଲ୍‌ ତିନ୍ଦେ। 8 ମେଣ୍ଡେ, ପାଲ୍‌ଉନ୍ଦାନ୍‌ ପିଲେ ୱିସାମ୍‌ ତାଡ଼ାମ୍‌ତେ ନୁ ପୁତ୍‌ବସେତ୍‌ ପରୁ କାର୍ସିତେ, ପାଲ୍‌ୱିଡ଼୍‌ସ୍‌ତେ ପେକାଲ୍‌ ପୁତ୍‌ବସେତ୍‌ ପରୁ କାଇ ୱାଟିତଣ୍ଡ୍‌। 9 ଅଡ଼୍‌ ମାନ୍‌ ପବିତ୍ର ମେଟେତେ ବେନେବା ପଡ଼ିୟେତାଗ୍‌ ହିଂସା କି ନଷ୍ଟ ମାଡ଼ଡ଼୍‌; ବାତେଙ୍କ୍‌ଇତ୍କେ ସମୁଦ୍ର ବେଲାନ୍‌ ଏର୍‌ଦେ ନିଣ୍ଡିମିନ୍ଦେ, ପୃତିବୀ ଆଦ୍‌ଲେକାମ୍‌ ସଦାପ୍ରବୁ ବିଷୟକି ଜ୍ଞାନ୍‌ତେ ନିଣ୍ଡି ମାନ୍‌ତଣ୍ଡ୍‌।

10 ମେଣ୍ଡେ, ଆଦ୍‌ ଦିନାମ୍‌ତେ ଗୋଷ୍ଟିନାରୁଡ଼୍‌ ପତ୍‌କା ଲେକାମ୍‌ ତିଆର୍‌ ଆତ୍‌ତେ ଯେ ଯିଶୀର୍‌ତେ ଗଣ୍ଡି, ୱେରେ ୱେରେ ଦେଶ୍‌ତେନଡ଼୍‌ ଅଙ୍କ୍‌ ମେହେଃକିତଡ଼୍‌; ମେଣ୍ଡେ, ଅନ୍‌ ରମାନ୍‌ ପଡ଼ିୟେ ଗୌରବ୍‌ ଆଦ୍‌ତେ। 11 ମେଣ୍ଡେ, ଆଦ୍‌ ଦିନେତେ ପ୍ରବୁ ତାନ୍‌ ନାରୁଡ଼୍‌କିଙ୍କ୍‌ ଅଦ୍‌ତଣ୍ଡ୍‌ ଅଶୂରତାଗାଙ୍କ୍‌, ମିସର୍‌ତାଗାଙ୍କ୍‌, ପଥ୍ରୋଷତାଗାଙ୍କ୍‌, କୂଶରୁତାଗାଙ୍କ୍‌, ଏଲମ୍‌ତାଗାଙ୍କ୍‌, ଶିନିୟର୍‌ତାଗାଙ୍କ୍‌, ହମାତ୍‌ତାଗାଙ୍କ୍‌ ନୁ ସମୁଦ୍ରତେ ଦ୍ୱୀପତାଗାଙ୍କ୍‌ ରକ୍ଷାମାଡ଼ି ତାତାନ୍‌ ସେଙ୍ଗେ ମେଣ୍ଡନ୍‌ଦାମ୍‌ ରେଣ୍ଡ୍‌ଦାମ୍‌ ନିଜେତ୍‌ କାଇ ଆତିତଣ୍ଡ୍‌। 12 ମେଣ୍ଡେ, ଅଣ୍ଡ୍‌ ଗୋଷ୍ଟିତଡ଼୍‌ ସେଙ୍ଗେ ୱେରଡ଼୍‌ ପତ୍‌କା ତେଏତିତଣ୍ଡ୍‌ ନୁ ପୃତିବିତେ ସାରେପାକେଙ୍କ୍‌ ଇସ୍ରାଏଲ୍‌ତେ ତଲିଆତେନଡ଼୍‌କ୍‌ ଅଣ୍ଡୟ୍‌ତାଗ୍‌ ମାଡ଼ିତଡ଼୍‌ ନୁ ଯିହୁଦାତେ ଏକାମ୍‌ ଆତ୍‌ତେ ନାରୁଡ଼୍‌କିଙ୍କ୍‌ ଅଣ୍ଡ୍‌ୟତାଗ୍‌ ମାଡ଼ିତଣ୍ଡ୍‌। 13 ମେଣ୍ଡେ, ଇଫ୍ରୟିମତେ କପାମ୍‌ ଦୂର୍‌ ଆଦ୍‌ତେ ନୁ ଯିହୁଦାତା ତିପାଲ୍‌ ଇଦାନ୍‌ ନାରୁଡ଼୍‌ ତେଦିଆଦ୍‌ତଡ଼୍‌; ଇଫ୍ରୟିମ୍‌ ଯିହୁଦାତିଙ୍କ୍‌ ବେସୁଙ୍କ୍‌ କପାମ୍‌ ଆୟଣ୍ଡ୍‌ ନୁ ଯିହୁଦାତା ଇଫ୍ରୟିମତିଙ୍କ୍‌ ତିପାଲ୍‌ ଇୱଡ଼୍‌। 14 ମେଣ୍ଡେ, ଅଡ଼୍‌ ପଡ଼ଦ୍‌ ଆଦାନ୍‌ପାକେ ପଲେଷ୍ଟିୟନଡ଼୍‌ ଆଟେତ୍‌ ପରୁ ତୁଲ୍‌ଲି ରେଃତିତଡ଼୍‌; ଅଡ଼୍‌ ଅଣ୍ଡୟ୍‌ତାଗ୍‌ ଆସ୍‌ ପୂର୍ବଦେଶ୍‌ତେ ପିଲାକିନ୍‌ ଦ୍ରବ୍ୟ ଲୁଟ୍‌ ମାଡ଼ିତଡ଼୍‌; ଅଡ଼୍‌ ଇଦୋମ୍‍ ନୁ ମୋୟାବ ପରୁ କାଇ ଆତିତଡ଼୍‌ ନୁ ଅମ୍ମୋନତେ ନାରୁଡ଼୍‌ ଅଡ଼ାଦ୍‌ ଗଟ୍‌ମାନେମ୍‌ ଆଦ୍‌ତଡ଼୍‌। 15 ମେଣ୍ଡେ, ସଦାପ୍ରବୁ ମିସ୍ରୀୟ ସମୁଦ୍ରତେ ୱାଞ୍ଜେର୍‌ ସାରେତିଙ୍କ୍‌ ନଷ୍ଟ ମାଡ଼ିତଡ଼୍‌ ନୁ ନିଜେତାଗାଙ୍କ୍‌ ପେଇତାନ୍‌ ଗାଲ୍‌ତଡ଼୍‌ ବେଡ଼େତେପରୁ ନିଜେତ୍‌ କାଇ ଉଃତିତଡ଼୍‌, ମେଣ୍ଡେ, ଆଦିଙ୍କ୍‌ ରେଃସ୍‌ମିକା ସାତ୍‌ଟାନ୍‌ ବେଡ଼େମ୍‌ ମାଡ଼ିତଣ୍ଡ୍‌ ନୁ ନାରୁଡ଼୍‌କିଙ୍କ୍‌ ୱାସ୍ତେ ଗପିନାଲାନ୍‌ ଇସ୍‌ ଅଦ୍‌ତଣ୍ଡ୍‌। 16 ମେଣ୍ଡେ, ଇସ୍ରାଏଲ୍‌ ମିସର୍‌ ଦେଶ୍‌ତାଗାଙ୍କ୍‌ ପେଇସ୍‌ ମିକା ୱାଦାନ୍‌ ୱେଲେ ବେଲାନ୍‌ ଆଦିନ୍‌ ସେଙ୍ଗେ ଆସ୍‌ମାତେ, ଆଦ୍‌ଲେକାମ୍‌ ତାନ୍‌ ନାରୁଡ଼୍‌ ଦୁଡ଼େତ୍‌ ଦୁଡ଼େ ସେଙ୍ଗେ, ଇତ୍କେ, ଅଶୂର ଦେଶ୍‌ତାଗାଙ୍କ୍‌ ଦୁଡ଼େତ୍‌ ଦୁଡ଼େ ନାରୁଡ଼୍‌ ସେଙ୍ଗେ ୱେରଡ଼୍‌ ବାଡ଼ୟାଦ୍‌ ଆର୍‌ ଆଦ୍‌ତେ।