1 ଆଦ୍‌ ଦିନେ ସଦାପ୍ରବୁ ନିଜେତେ ଦୟାଇଲ୍‌ୱେ, ବେଡ଼ିୟାଦ୍‌ ନୁ ଶକ୍ତିତାଦ୍‌ ଚୁର୍‌ତଡ଼୍‌ ଉର୍‌ଗିନ୍‌ ଆଦାନ୍‌ ତାଡ଼ାମ୍‌ ଲିବୀୟାତନତିଙ୍କ୍‌ ନୁ ୱାଙ୍ଗ୍‌ତେ ତାଡ଼ାମ୍‌ ଲିବୀୟାତନତିଙ୍କ୍‌ ମାଡ଼୍‌ତେ କାୟେ ଇଦ୍‌ତତେ; ମେଣ୍ଡେ, ଅଣ୍ଡ୍‌ ସମୁଦ୍ରତେ ନାର୍ଗେମାନ୍ଦାନ୍‌ ଜିୱାକିଙ୍କ୍‌ ନଷ୍ଟ ମାଡ଼ିତଣ୍ଡ୍‌। 2 ଆଦ୍‌ ଦିନାମ୍‌ତେ ୱେରଡ଼୍‌ ଅଙ୍ଗୁର୍‌ୱାୟେ ମିନ୍ଦେ, ମିଡ଼୍‌ ଆଦିନ୍‌ ଲେକାମ୍‌ ପାଟେ ପାରାଟ୍‌। 3 "ମାମେ ସଦାପ୍ରବୁ ଆଦ୍‌ ରକ୍ଷା ମାଡ଼ିତମ୍‌; ମାମେ ସାରେ ଦିନାମ୍‌ ଆଗେ ଏର୍‌ ଇଲ୍‌ସ୍କ୍‌ତମ୍‌; ବେନ ବେଲାନ୍‌ ଆଦିନ୍‌ କ୍ଷତି ମାଡ଼୍‌ମାକିଣ୍ଡ୍‌, ଆଦିନ୍‌ ସେଙ୍ଗେ ମାମେ ନାର୍କାପାୟାଲ୍‌ ଆଦିଙ୍କ୍‌ ରକ୍ଷା ମାଡ଼ିତମ୍‌। 4 ମାନାଗେ କପାମ୍‌ ଇଲେ; ଆ, ଯଦି ପାର୍‌ୱେଲି ବା କୟେ ମାଡ଼ାକ୍‌ସାରେ ଯୁଦ୍ଦ୍‌ତାଗ୍‌ ମାନ୍‌ପାକେ ଆୟେ ! ଆଲେକେ ମାନାଡ଼୍‌ ଆକ୍ରମନ୍‌ ମାଡ଼ି ଆୱୁ ସାରେତାୱିଙ୍କ୍‌ ଅଣ୍ଡୟ୍‌ଦାମ୍‌ ଗୁଣ୍ଡାଲ୍‌ ମାଡ଼େଡ଼୍‌। 5 ଇଲୁକ୍‌ ମାନ୍‌ ସାଙ୍ଗେ କାୟିଲାନଙ୍କ୍‌ ଅଣ୍ଡ୍‌ ମାନ୍‌ ପରାକ୍ରମତେ ପାଲନ୍‌ ମାଡ଼ିଣ୍ଡ୍‌; ହଁ, ଅଣ୍ଡ୍‌ ମାନ୍‌ ସାଙ୍ଗେ କାୟିଲିଣ୍ଡ୍‌। 6 ବବିଷ୍ୟତ୍‌ କାଲାମ୍‌ତେ ଯାକୁବ ମାଡାଉଟିତଣ୍ଡ୍‌; ଇସ୍ରାଏଲ୍‌ତାଗ୍‌ ମଡ଼୍‌ସ୍‌ ନୁ ନାର୍ଗେ ପୁଙ୍ଗା ପୁଇତିତା ନୁ ଅଡ଼୍‌ ବୁମ୍‌ଦାଗ୍‌ କାୟାନେ ନିଣ୍ଡିତା।" 7 ଅଙ୍କ୍‌ ତିପାଲ୍‌ମାଡ଼୍‌ତେନଡ଼୍‌ ଅଣ୍ଡ୍‌ ବେଲାନ୍‌ ତିପାଲ୍‌ ଆତ୍‌ତଣ୍ଡ୍‌, ଆଦ୍‌ଲେକାମ୍‌ ଅଣ୍ଡ୍‌ କି ଅଙ୍କ୍‌ ତିପାଲ୍‌ ମାଡ଼ିମିନ୍ଦେଣ୍ଡ୍‌ ? କି, ଆଦିନ୍‌ତଡ଼୍‌ ଡଲ୍‌ତେ ନାରୁଡ଼୍‌ ଲେକାମ୍‌ ଅଣ୍ଡ୍‌ କି ଡଲି ମିନ୍ଦେଣ୍ଡ୍‌ ? 8 ମିଡ଼୍‌ ଆଦିଙ୍କ୍‌ ପେସ୍ପିଦାନ୍‌ ୱେଲେ ପରିତ୍ରାଣଲେକାମ୍‌ ଆଦିନ୍‌ତଡ଼୍‌ ରାମ୍‌କ ମାଡ଼ମିନ୍ଦେନି; ଅଣ୍ଡ୍‌ ମୁନେତ୍‌ ପାକେତ୍‌ ଗାଲ୍‌ ଦିନାମ୍‌ତେ ନାର୍ଗେ ଗାଲ୍‌ତଡ଼୍‌ ଆଦିଙ୍କ୍‌ ୱେର୍‌ ଜାଗେତାଗ୍‌ ମାଡ଼ିମିନ୍ଦେଣ୍ଡ୍‌। 9 ଆଦିଙ୍କ୍‌ ଇଦିନ୍‌ତଡ଼୍‌ ଯାକୁବ୍‌ତେ ଅପରାଦ୍‌ ସାରେ କ୍ଷମା ଆଦ୍‌ତେ ନୁ ଅନ୍‌ ପାପ୍‌ ଜେକା ଆଦାନାଦ୍‌ ସାରେ କାୟେ ଆତ୍‌ତେ ଇଦ୍‌; ଅଣ୍ଡ୍‌ ଯଜ୍ଞବେଦିତେ ନେଟେ ସାରେତିଙ୍କ୍‌ ଚୂନ୍‌ତେ ଉର୍ଙ୍ଗ୍‌ତେ ନେଟେ ଲେକାମ୍‌ ମାଡ଼୍‌କେ, ଆଶେରା ମୁର୍ତ୍ତି ନୁ ପଡ଼ଦ୍‌ତେ ପୁତ୍‌ଲାମ୍‌ ସାରେ ମେଣ୍ଡେ ତେଦ। 10 ବାତେଙ୍କ୍‌ଇତ୍କେ ଗାଟିଡ଼ୁଟାଙ୍କ୍‌ତେ ନଗର୍‌ ଉସ୍କ ବୂମ୍‌ତେ ଲେକାମ୍‌ ବାତ୍‌ତେ ଇଲେ, ନାରୁଡ଼୍‌ ଇଲ୍‌ୱାଦ୍‌ ପଡ଼ିୟେ ନୁ ମାନ୍ଦାନ୍‌ ଗୁଡ଼ିୟେମ୍ ଲେକାମ୍‌ ଆସ୍‌ମିନ୍ଦେ; ଆଦ୍‌ ପଡ଼ିୟେତାଗ୍‌ ଗଡ଼୍‌ପିଲା ମେୟିତା ନୁ ଉଞ୍ଜିତା, ମେଣ୍ଡେ, ମାଡ଼େତେ କମାସାରେ ତିନ୍ତା। 11 ତାନ୍‌ପେର୍କେ କମାସାରେ ୱାସ୍‌କେ ଉଃତିତଡ଼୍‌; ନାଟାକି ୱାସ୍‌ ଆଗେ କିସ୍‌ ପସ୍ପିତା; ବାତେଙ୍କ୍‌ଇତ୍କେ ଅଡ଼୍‌ ନାରୁଡ଼୍‌ ବୁଦ୍ଦ୍‌ଇଲ୍‌ୱେନଡ଼୍‌; ଆଦିଙ୍କ୍‌ ବେନ ଅଡ଼୍‌କିଂଙ୍କ୍‌ ତିଆର୍‌ ମାଡ଼୍‌ତଣ୍ଡ୍‌, ଅଣ୍ଡ୍‌ ଅଡ଼୍‌ ପରୁ ଦୟା ମାଡ଼ଣ୍ଡ୍‌ ନୁ ବେନ ଅଡ଼୍‌କିଂଙ୍କ୍‌ ତିଆର୍‌ମାଡ଼୍‌ତଣ୍ଡ୍‌, ଅଣ୍ଡ୍‌ ଅଡ଼୍‌ପରୁ ଅନୁଗ୍ରହ ମାଡ଼ଣ୍ଡ୍‌। 12 ଆଦ୍‌ ଦିନେ ସଦାପ୍ରବୁ ପ୍ଲାବିତ୍‌ ବେଡ଼େମ୍‌ତେ ଗାରେତ୍‌ ମିସର୍‌ତେ ଚାନ୍ଦ୍‌ହେଉନା ନିଜେତ୍‌ କାୟା ଅଃଲିତଡ଼୍‌, ମେଣ୍ଡେ, ହୋ ଇସ୍ରାଏଲ୍‌ତେ ପିଲାନଡ଼ି, ମିଡ଼୍‌ ୱେର ୱେର ଆସ୍‌ ଗୁଡ଼ିତିଡ଼୍‌। 13 ମେଣ୍ଡେ, ଆଦ୍‌ ଦିନାମ୍‌ତେ ୱେରଡ଼୍‌ ବେଡ଼ିୟାଦ୍ ମୟିର୍‌ ନେକିତ୍‌; ମେଣ୍ଡେ, ଅଶୂର୍‌ ଦେଶ୍‌ତାଗ୍‌ ନଷ୍ଟ ଆତ୍‌ତେନଡ଼୍‌ ନୁ ମିସର୍‌ ଦେଶ୍‌ତାଗ୍‌ ତଲି ଆସ୍‌ମାନ୍ଦାନ୍‌ ନାରୁଡ଼୍‌ ୱାଦ୍‌ତଡ଼୍‌; ମେଣ୍ଡେ, ଅଡ଼୍‌ ଯିରୂଶାଲେମ୍‌ତେ ପବିତ୍ର ମେଟେତାଗ୍‌ ସଦାପ୍ରବୁଙ୍କ୍‌ ମଡ଼୍‌କିତଡ଼୍‌।