1 ଉଡ଼ାଟ୍‌, ପ୍ରବୁ, ସାରେତିଙ୍କ୍‌ ଆନ୍‌ ବେଡ଼ିୟ୍‌ ସଦାପ୍ରବୁ ଯିରୁଶାଲେମ୍‌ ନୁ ଯିହୁଦାତାଗାଙ୍କ୍‌ କାଦି ନୁ ଏର୍‌, ଇତ୍କେ, ଅନ୍ନ ଲେକାମ୍‌ ସାରେ କାଦି ନୁ ଏର୍‌ଦାଗ୍‌ତାୱୁ ସାରେ କାଦି ଦୁର୍‌ ମାଡ଼ମିନ୍ଦେଣ୍ଡ୍‌; 2 ବୀର, ଯୁଦ୍ଧ୍‌ଦାଲ୍; ବିଚାର୍‌କର୍ତ୍ତାଲ୍‌, ବବିଷ୍ୟଦ୍‌ବକ୍ତାଲ୍‌, ମନ୍ତ୍ରଜ୍ଞ, ପ୍ରାଚୀନ; 3 ପଚାଶ ସେନାପତିଡ଼୍‌, ସମ୍ଭ୍ରାନ୍ତ ନାରୁଣ୍ଡ୍‌, ମନ୍ତ୍ରୀ, ତିଆର୍‌ତେ ଶିଳ୍ପତେ ନୁ ନିପୁଣ ଯାଦୁବିଦ୍ୟାଲଡ଼୍‌ (ଦୂର୍‌ ଆଦ୍‌ତଡ଼୍‌)। 4 "ମାମେ ପେକଡ଼୍‌କିଙ୍କ୍‌ ଅଡ଼୍‌ ଅଦିପତି ମାଡ଼ିକାଡ଼୍‌ ନୁ ପିଲାକି ଅଡ଼୍‌ ପରୁ ଶାସନ୍‌ ମାଡ଼ିତଡ଼୍‌। 5 ମେଣ୍ଡେ, ନାରୁଡ଼୍‌ ୱେରଣ୍ଡ୍‌ ନାରୁଣ୍ଡ୍‌ ୱେରେ ନାରୁଡ଼୍‌ ତଡ଼୍‌ ନୁ ସାରେତଡ଼୍‌ ନାରୁଡ଼୍‌ ନିଜେତ୍‌ ପାକେତଡ଼୍‌ ଆଦ୍‌ଲେକାମ୍‌ ଆଦ୍‌ତଡ଼୍‌; ପେକାଲ୍‌ ପ୍ରାଚୀନ୍‌ତେ ବିରୁଦ୍ଦ୍‌ତେ ନୁ ଅଧର୍ମ ନାରୁଣ୍ଡ୍‌ ସମ୍ଭ୍ରାନ୍ତ ନାରୁଡ଼୍‌ ବିରୁଦ୍ଦ୍‌ତେ ଗର୍ବ ବ୍ୟବହାର୍‌ ମାଡ଼ିତଡ଼୍‌। 6 ବେନ ବେନ ନିଜେତ୍‌ ତାମୁଡ଼ାଗାଙ୍କ୍‌ ୱେରଙ୍କ୍‌ ତାମୁଙ୍କ୍‌ ତାନ୍‌ ଆନିଦାଦିଡ଼୍‌ ଲନ୍‌ ପଇସ୍‌ କେତିତଡ଼୍‌, ନିୟାଦ୍‌ ସିଲା ମିନ୍ଦେ, ନିମେ ମା ଶାସନକର୍ତ୍ତା ଆୟିମ୍‌, ମେଣ୍ଡେ, ଆ ଚିନ୍‌ବିନ୍‌ ଆସ୍‌ ମାନ୍ଦାନ୍‌ (ରାଜ୍ୟ) ନି କାଇଦେ ଅଦିକାର୍‌ ଆୟି; 7 ଅଣ୍ଡ୍‌ ଆଦ୍‌ଦିନେ ନିଜେତ୍‌ ଲେଙ୍ଗ୍‌ ଟେଣ୍ଡି କେତିତଣ୍ଡ୍‌ ନାନେ ସାହାଜ୍ୟ ମାଡ଼ନ୍‌; ବାତେଙ୍କ୍‌ଇତ୍କେ ନା' ଲୋନ୍‌ କାଦୀ କି ସିଲେ ଇଲା; ମିଡ଼୍‌ ନାକିଙ୍କ୍‌ ନାରୁଡ଼୍‌ ଶାସନକର୍ତ୍ତାଲ୍‌ ମାଡ଼୍‌ମାଟ୍‌।" 8 ବେଲାନ୍‌କି ଯିରୂଶାଲେମ୍‌ ନଷ୍ଟ ନୁ ଯିହୁଦା ମିସି ଆସ୍‌ମିନ୍ଦେ; ବାତେଙ୍କ୍‌ଇତ୍କେ ସଦାପ୍ରବୁନ୍‌ କାମେ ଲେକେତ୍‌ କଣ୍ଡାଙ୍କ୍‌ କପାମ୍‌ ମାଡ଼ାନ୍‌ ସେଙ୍ଗେ ଅଡ଼୍‌ ୱାଞ୍ଜେର୍‌ ନୁ କାମ୍‌ ଅଡ଼୍‌ ବିରୁଦ୍ଦ୍‌ ଆଦ୍‌ତେ। 9 ଅଡ଼୍‌ ପାୟୁର୍‌ ଅଡ଼୍‌ ବିରୁଦ୍ଦ୍‌ତେ ସାକ୍ଷ ଇଦ୍‌ତେ; ମେଣ୍ଡେ, ଅଡ଼୍‌ ସଦୋମ୍‌ତେ ନ୍ୟାୟ ନିଜେତାଦ୍‌ ପାପ୍‌ ସ୍ୱିକାର୍‌ ମାଡ଼ି ମିଞ୍ଜ୍‌ସ୍ପଡ଼୍‌। ଅଡ଼୍‌ ଜିଉନ୍ ଡଲାନାଦ୍‌ ସନ୍ତାପ ଆଦ୍‌ତେ ! ବାତେଙ୍କ୍‌ଇତ୍କେ ଅଡ଼୍‌ ନିଜେତ୍‌ତେ କାରାପ୍‌ ନିଜେ ମାଡ଼ିମିନ୍ଦେଡ଼୍‌। 10 ମିଡ଼୍‌ ଦାର୍ମିକ୍‌ତେ ବିଷୟତେ କେଲ୍‌ମୁଟ୍‌ ଯେ, ତାନ୍‌ ସାୟେ ଆଦ୍‌ତେ, ବେଲାନ୍‌ କି ଅଡ଼୍‌ ନିଜେ ନିଜେ କାମ୍‌ତେ କାୟେ ପାହେମ୍‌ ଆଦ୍‌ତଡ଼୍‌। 11 ଦୁଷ୍ଟ ନାରୁନ୍‌ ଦଣ୍ଡ ଆଦ୍‌ତେ ! ଅନାଦ୍‌ କାରାପ୍‌ ଗଟେମ୍‌ ଆଦ୍‌ତେ; ବାତେଙ୍କ୍‌ଇତ୍କେ ଅନ୍‌ କାଇମାଡ଼ିମାନ୍ଦାନ୍‌ କାମ୍‌ତେ କାୟେ ଅଙ୍କ୍‌ ଇଦ୍‌ତଡ଼୍‌। 12 ନା' ନାରୁଡ଼୍‌ ବିଷୟତେ ଉଡ଼୍‌କେ, ପେକଡ଼୍‌ ନା' ନାରୁଡ଼୍‌କ୍‌ କାରାପ୍‌ ବେବାର୍‌ ମାଡ଼ିତଡ଼୍‌ ନୁ ମୁତେକି ଅଡ଼୍‌ପରୁ ଶାସନ ମାଡ଼ିତା। ହୋ ନା ନାରୁଡ଼ି, ମିକିଙ୍କ୍‌ ଆର୍‌ତତାନଡ଼୍‌ ମିକିଙ୍କ୍‌ ଉଡ଼୍‌ସ୍ପିତଡ଼୍‌ ନୁ ମି ତାକାନ୍‌ ଆର୍‌ତିଙ୍କ୍ ନଷ୍ଟ ମାଡ଼ିତଡ଼୍‌। 13 ସଦାପ୍ରବୁ ବିଚାର୍‌ ମାଡ଼ାନଙ୍କ୍‌ ନିତୁତଣ୍ଡ୍‌, ଗୋଷ୍ଟିତେ ନାରୁଡ଼୍‌କିଙ୍କ୍‌ ନ୍ୟାୟ୍‌ ମାଡ଼ାନଙ୍କ୍‌ ନିସ ମିନ୍ଦେଣ୍ଡ୍‌। 14 ସଦାପ୍ରବୁ ନିଜେତ୍‌ ନାରୁଡ଼୍‌ ମାନ୍ଦେତିଙ୍କ୍‌ ନୁ ଅଦିପତିନଡ଼୍‌ ତଡ଼୍‌ ବିଚାର୍‌ତାଗ୍‌ ମି ମୁନେ ଆଦ୍‌ତଡ଼୍‌; ମିଡ଼୍‌ ହିଁ ଅଙ୍ଗୁର୍‌ୱାୟେ ଅଦିକାର୍‌ ମାଡ଼ି ଅସ୍‌ମିନ୍ଦେଡ଼ି; ଗରିବ୍‌ନାରୁଡ଼୍‌ ଡ଼ାଗାଙ୍କ୍‌ ଡଙ୍ଗିମାନ୍ଦାନ୍‌ ସାମାନ୍‌ ମି ଲୋକିନାଗ୍‌ ମିନ୍ଦେ; 15 ମିଡ଼୍‌ ଯେ ମା ନାରୁଡ଼୍‌କିଙ୍କ୍‌ କିସ୍‌କିସା ମାଡ଼ିସ୍‌ମିନ୍ଦେଡ଼ି ନୁ ଗରିବ୍‌ନଡ଼୍‌ ମକମ୍‌ ନକ ମିନ୍ଦେଡ଼ି, ଇଗାଙ୍କ୍‌ ମିୟାଦ୍‌ କାମ୍‌ତେ କାୟେ ବାତେ ? ପ୍ରବୁ, ବାହିନୀନଡ଼୍‌କ୍‌ ସଦାପ୍ରବୁ ଇଦ୍‌ ଗଟ୍‌ କେତିତଣ୍ଡ୍‌। 16 ମେଣ୍ଡେ ସଦାପ୍ରବୁ କେତ୍‌ତଣ୍ଡ୍‌, ସିୟୋନ୍‌ତେ ନାଟାକି ଅହଙ୍କାରି ନୁ ନିଜେ ନିଜେତ୍‌ ଗୁଡ଼ୁଙ୍ଗା ଆସ୍‌ ନୁ କଣ୍ଡାଙ୍କ୍‌ ଇକେ ଆକେ ମାଡ଼ ତାକିତା, ତାକ ତାକ ମେଇଲାନ୍‌ ଡେକେତ୍‌ ପାଞ୍ଜୁଲି ନୁ ଡେକେତାଗ୍‌ କିଲିଙ୍କ୍‌ କିଲିଙ୍କ୍‌ ନେସ୍କିତା; 17 ଆଦିଙ୍କ୍‌ ସିୟୋନ୍‌ତେ ମୁତେକିନ୍‌ ତାଲେତିଙ୍କ୍‌ କର୍‌ୟି ଟେକ ମାଡ଼ିତଣ୍ଡ୍‌ ନୁ ପ୍ରବୁ ଆୱିଙ୍କ୍‌ ଟେକ ମାଡ଼ି ୱିଡ଼୍‌ସିତ୍‌ତଣ୍ଡ୍‌। 18 ଆଦ୍‌ ଦିନେ ପ୍ରବୁ ଆୱିନ୍‌ କେର୍‌ଦାନ୍‌ ସାମାନ୍‌ ସାରେ ଡଙ୍ଗି ଅଦ୍‌ତଣ୍ଡ୍‌, କାଇଦାଗ୍‌ କେର୍‌ସମାନ୍ଦାନ୍‌ ମୁର୍ରା, ତାଲେତାଗ୍‌ କେର୍‌ଦାନାଦ୍ କିଲିପ୍‌, ଗୁଡ଼ୁଙ୍ଗେତାଗ୍‌ କେର୍‌ଦାନ୍‌ ନେଡ଼େମ୍‌; 19 କେଉକଟାନାଦ୍‌, କାଇଦେ ଗାଜ୍‌ସ୍କ୍‌, ତାଲେତାଗ୍‌ ମୁସାନ୍‌ ଓଢ଼ନି; 20 ତାଲେଗୁଡ଼୍‌, ଡେକେତ୍‌ ବଲା, ଟିକିଡ଼୍‌ତାଗ୍‌ ତଃତାନାଦ୍‌, ଗାବ୍‌ମାନ୍ଦାନ୍‌ ସାମାନ୍‌ ୱାଟାନାଦ୍‌, ରାସା; 21 କାଇ ମୁଦା, ମସର୍‌ତେ ମୁଦା; 22 ପାଣ୍ଡୁମ୍‌ତେ କେର୍‌ଦାନ୍ ଲାଟିଚକା, ଚକେତ୍‌ ପରୁ କେର୍‌ଦାନ୍‌ ସିଲେ, ସାଲ୍‌, ତୁୱାଲ୍‌; 23 ଦାର୍ପୁନ୍, ପାଲ୍‌ସେ ସିଲେ, ତାଲେତାଗ୍‌ ତହତାନାଦ୍‌ ନୁ ଓଢ଼ନି ଟେଣ୍ଡି ୱାଟିତା। 24 ଆଗେ ଲେକେତ୍‌ଗାବ୍‌ତେ ବାଦୁଲ୍‌ତେ ପିନ୍ଦଲାଦ୍‌ କୁଲୁମ୍‌, ଟିକିଡ଼୍‌ତାଗ୍‌ ତହତାନ୍‌ ସିଲେ ବାଦୁଲ୍‌ତେ ନଡ଼ମ୍‌, ସୁନ୍ଦର୍‌ କେଲ୍‌କିନ୍‌ ବାଦୁଲ୍‌ତେ କେଲ୍‌କ୍‌ ଇଲ୍‌ୱାଦ୍‌ ନୁ ମୁସାନ୍‌ ସିଲେ ବାଦୁଲ୍‌ତେ ବାସ୍ତେ; ସୁନ୍ଦର୍‌ ବାଦୁଲ୍‌ତେ କାର୍‌ୱତେ ଦାଗ ଆଦ୍‌ତେ। 25 ମି ମୁଦ୍‌ପ୍ପାନଡ଼୍‌ ଚୁରିନ୍‌ ଦେବାନେ ନୁ ଆଦ୍‌ ବେଡ଼ିୟେ ଯୁଦ୍ଦ୍‌ତାଗ୍‌ ଡଲିତଡ଼୍‌। 26 ସିୟୋନତେ ନାର୍ଦେ ସାରେୱାୱୁ ନାରୁଡ଼୍‌ ମର୍‌ରେ ମାଡ଼ିତଡ଼୍‌ ନୁ ଅଣ୍ଡ୍‌ ମୁର୍‌ମୁରା ଆସ୍‌ ବୁମ୍‌ଦାଗ୍‌ କୁଦିତଡ଼୍‌।