1 ଉଡ଼ାଟ୍‌, ୱେରଣ୍ଡ୍‌ ରାଜା ଦାର୍ମିକ୍‌ତେ ରାଜତ୍ୱ ମାଡ଼ିତଣ୍ଡ୍‌ ନୁ ଅଦିପତିଡ଼୍‌କ୍‌ ନିୟମ୍‌ତେ ସାରେ ଶାସନ୍‌ ମାଡ଼ିତଡ଼୍‌। 2 ମେଣ୍ଡେ, ନାର୍ଗେ ତୁପାନ୍‌କଞ୍ଜ୍‌ ମାନ୍ଦାନ୍‌ ପଡ଼ିୟେ ନୁ ୱାଡ଼୍‌ସାମ୍‌ତେ ମାନ୍ଦାନାଦ୍‌, ୱାସ୍ତେ ପଡ଼ିୟେତାଗ୍‌ ଏର୍‌ପଡ଼ିୟେ, ଲେକେତ୍‌ ଆଦାନ୍‌ ବୁମ୍‌ତାଗ୍‌ ବେଡ଼ିୟାଦ୍‌ କାଲ୍‌କେତ୍‌ ନିଡ଼୍‌କେ ଲେକାମ୍‌ ଆଦ୍‌ତେ। 3 ମେଣ୍ଡେ, ଉଡ଼ାନଡ଼୍‌ କଣ୍ଡା ଜାପ୍‌ ଜାପ୍‌ ଆୟ ନୁ ଆଗେ ମାନ୍ଦାନ୍‌ ନାରୁଡ଼୍‌ କେୱୁକ୍‌ ମାନ୍‌ ଇଦ୍‌ତଡ଼୍‌। 4 ମେଣ୍ଡେ, ବୁଦ୍‌ ଇଲ୍‌ୱେନଡ଼୍‌ ଲେକେତ୍‌ ବୁଦ୍ଦ୍‌ ୱାଦ୍‌ତେ ନୁ ତକାନଡ଼୍‌ ୱେଞ୍ଜେର୍‌ ଲେକେତ୍‌ ଗଟି କେତିତଡ଼୍। 5 ମୁର୍କ ନାରୁଡ଼୍‌ ମହାନ୍‌ ଇଞ୍ଜ ଆଦ୍‌ତଡ଼୍‌ ନୁ ଦୁଷ୍ଟ ନାରୁଡ଼୍‌ ସନ୍‌ମାନ୍‌ ଇଦ୍‌ତଡ଼୍‌। 6 ବାତେଙ୍କ୍‌ଇତ୍କେ କାରାପ୍‌ ବେବାର୍‌ ମାଡ଼ାନଣ୍ଡ୍‌ ମାଇଦିନ୍ ନୁ ସଦାପ୍ରବୁଙ୍କ୍‌ ବିରୁଦ୍ଦ୍‌ତେ ବୁଲ୍‌କା ମାଡ଼ାନ୍‌ ଗଟି କେତାନଙ୍କ୍‌, କାର୍‌ୱିନ୍‌ ଜିୱୁନ୍‌ ଶୂନ୍ୟ ମାଡ଼ାନଙ୍କ୍‌ ନୁ ଉନ୍ଦେୱାତ୍‌ତେନଙ୍କ୍‌ ଏର୍‌ ତାଲ୍‌କାନଙ୍କ୍‌ ମନା ମାଡ଼ାନଙ୍କ୍‌ ମୁର୍କ ନାରୁଣ୍ଡ୍‌ ଦୁଷ୍ଟତାୱୁ ଗଟି କେତିତଣ୍ଡ୍‌ ନୁ ଅନାଦ୍‌ ହୃଦୟ୍‌ ଅଦର୍ମ ଏର୍କେ ମାଡ଼ିତଣ୍ଡ୍‌। 7 ମେଣ୍ଡେ, ରାମ୍‌କ୍‌ ନାରୁନାଦ୍‌ ଉପାୟିସାରେ କାରାପ୍‌; ଅଣ୍ଡ୍‌ ସାୟେତ୍‌ ନାରୁଙ୍କ୍‌ ଇତ୍କେ, ଲେକେତ୍‌ ଗଟି କେତାନ୍‌ ୱେଲେ ଗରିବ୍‌ ନାରୁତିଙ୍କ୍‌ ବୁସା ଗଟିନେ କାରାପ୍‌ ମାଡ଼ାନଙ୍କ୍‌ ବେନେ ଆୟିଗଟ୍‌ତିଙ୍କ୍‌ କେତିତଣ୍ଡ୍‌। 8 ମାତର୍‌ ମହାନ୍‌ ନାରୁନ୍‌ ମଆନ୍‌ତେ ଗଟି କେତିତଣ୍ଡ୍‌ ନୁ ଅଣ୍ଡ୍‌ ଆତ୍ମାତଡ଼୍‌ ଜଯୋନାତେ ତିଆର୍‌ ମାନ୍‌ତଣ୍ଡ୍‌।

9 ଅ ସାନ୍ତିତେ ନାଟାନଡ଼ି, ମିଡ଼୍‌ ତେଦି ନାୟାଦ୍‌ ଲେଙ୍ଗ୍ କେଞ୍ଜାଟ୍, ହୋ ଚିନ୍ତେଇଲ୍‌ୱେ ପିକିନଡ଼ି, ନା' ବାକ୍ୟତାଗ୍‌ କେୱୁତାରାଟ୍‌। 10 ହୋ ଚିନ୍ତେଇଲ୍‌ୱେ ନାଟାନଡ଼ି, ମିଡ଼୍‌ ଅଣ୍ଡ୍ ୱାଡ଼୍‌ସାତ୍‌ ପର ବେସ୍କଦିନା ଉଦ୍‌ବିଗ୍ନ ଆଦ୍‌ତିଡ଼୍‌; ବାତେଙ୍କ୍‌ଇତ୍କେ ଅଙ୍ଗୁରକାୟା ଅବାବ୍‌ ଆଦ୍‌ତା, କାୟା ପାଣ୍ଡାନ୍‌ ଦିନାମ୍‌ ୱାଡ଼ ଆଦ୍‌ତେ। 11 ହୋ ସାନ୍ତିତେ ନାଟାନଡ଼ି, ମିଡ଼୍‌ ବିଦ୍‌ବିଦା ଆୟ୍‌ମୁଟ୍‌; ହୋ ଚିନ୍ତେଇଲ୍‌ୱେ, ଉଦ୍‌ବିଗ୍ନ ଆୟିମୁଟ୍‌; ସିଲେ ଟେଣ୍ଡି ବଣ୍ଡଆଇମୁଟ୍‌ ନୁ ମିୟାଦ୍‌ ଟିକିଡ଼୍‌ତେ ସୁଦୁରାଦ୍‌ ବାସ୍ତେ ଚକେ ତଃମୁଟ୍‌। 12 ଆୱୁ ମନ୍‌ଆତ୍‌ତେ ୱାୟି ନୁ ଲେକେତ୍‌ କାୟାଆଦାନ୍‌ ଅଙ୍ଗୁର୍‌ୱାୟେ ସେଙ୍ଗେ ଗୁଣ୍ଡେତାଗ୍‌ ରେଃତିତା। 13 ମା ନାରୁଡ଼୍ ବୂମ୍‌ କୟେ ନୁ ପାର୍‌ୱେଲ୍‌ ଜିପ୍‌ ଆଦ୍‌ତା; ହୋ, ୱେଡ଼୍‌କେତଡ଼ି ନଗର୍‌ତେ ସାରେତଡ଼୍‌ ୱେଡ଼୍‌କେ ଲନ୍‌ ଏର୍କେ ଆଦ୍‌ତେ; 14 ବାତେଙ୍କ୍‌ଇତ୍କେ, ରାଜପୁରି ୱିଡ଼୍‌ସି ଆଦ୍‌ତେ ନୁ ନାରୁନ୍‌ ଇଲ୍‌ୱେ ନଗର୍‌ ଚିମ୍‌ଚାମ୍‌ ନାରୁଡ଼୍‌ ଇଲ୍‌ୱେ ଆଦ୍‌ତେ; ଗିରି ନୁ ସୈନ୍ୟଡ଼୍‌ ଲକ୍‌ ସାରେଦିନାତ୍‌ ମାଇଦିଙ୍କ୍‌ ଗୁପେ ଆଦ୍‌ତେ, ମେଟେତେ ଗଦକିନ୍‌ ୱେଡ଼୍‌କେ ବୁମ୍‌ ନୁ ପଶୁକିନ୍‌ ମେଇୟାନ୍‌ ପଡ଼ିୟେ ଆଦ୍‌ତେ;

15 ପେର୍କେ ପରଙ୍କ୍‌ ମାନ୍‌ପରୁ ଆତ୍ମାତଃସ୍‌କେ ବୂମ୍‌ଦାଗ୍‌ ଉସ୍କ କାତାମ୍‌ ୱାୟେ ଆଦ୍‌ତେ ନୁ କାତାମ୍‌ ୱାୟେ ଉସ୍କ ବୂମ୍‌ ଆଦ୍‌ତେ କାତାମ୍‌ ୱାୟେ ଗୁପେ ଇଞ୍ଜ କେତାନଙ୍କ୍‌ ଆଦ୍‌ତେ। 16 ଆସୁଙ୍କ୍‌ ଉସ୍କ ବୂମ୍‌ଦାଗ୍‌ ନ୍ୟାୟ ବିଚାର୍‌ ବାସେ ମାଡ଼ାନଙ୍କ୍‌ ଆଦ୍‌ତେ ନୁ କାତାମ୍‌ ବୂମ୍‌ତାଗ୍‌ ଦାର୍ମିକ୍‌ନଣ୍ଡ୍‌ ମାନ୍‌ତଡ଼୍‌। 17 ମେଣ୍ଡେ, ଦାର୍ମିକ୍‌ତେ ପାଡ଼ିୟ୍‌ ଶାନ୍ତିତେ ଆଦ୍‌ତେ; ମେଣ୍ଡେ, ଦାର୍ମିକ୍‌ତାଦ୍‌ କାୟା ସାରେଦିନାମ୍‌ ଲେକେତାୱୁ ନୁ ସାୟ୍‌ତାୱୁ ଆଦ୍‌ତା। 18 ମେଣ୍ଡେ, ମା ନାରୁଡ଼୍‌ ଶାନ୍ତିତେ ମାନ୍ଦାନ୍‌ ପଡ଼ିୟେତାଗ୍‌, ଡ଼ାଟୁମ୍‌ ପଡ଼ିୟେତାଗ୍‌ ନୁ ଶାନ୍ତିତେ ରମାନ୍‌ ପଡ଼ିୟେତାଗ୍‌ ବାସେ ମାଡ଼ିତଡ଼୍‌। 19 ମାତର୍‌ ଗୁପେତାଗ୍‌ ପଡ଼ିୟାନାଗ୍‌ ଆଦୁର୍‌ଗାଡ଼ାନ୍‌ ୱାର୍‌ସାମ୍‌ ୱାଦ୍‌ତେ ନୁ ନାର୍‌ ସାରେ ଲେକାମ୍‌ ମୁଡ଼୍‌ନ୍ଦି ଆଦ୍‌ତେ। 20 ଏର୍‌ ପଡ଼ିୟେତାଗ୍‌ ୱିଜେ ୱିତୁତିଡ଼୍ ନୁ ଗଡ଼୍‌କ୍‌ ଗଦକିଙ୍କ୍‌ ବାଇଦେ ରତୁତିଡ଼୍‌ ଯେ ମିଡ଼୍‌, ମିଡ଼୍‌ ଦନ୍ୟ।