1 ଆଦ୍‌ ଦିନେ ସାତ୍‌ଜାନ୍‌ ନାଟା ୱେରଣ୍ଡ୍‌ ମାନେଇତିଙ୍କ୍‌ ପଇସ୍‌ କେତିତା, "ମାମେ ନିଜେତ୍‌ କାଦି ତିନ୍ଦ୍‌ତମ୍‌ ନୁ ନିଜେତ୍‌ ସିଲେ କେର୍‌ତମ୍‌; ମାତର୍‌ ମି ପେଦେର୍‌ତେ ମାକିଙ୍କ୍‌ ସାରେପାକେ ପୁନ୍ଦ୍‌ତଡ଼୍‌; ମିଡ଼୍‌ ମାୟାଦ୍‌ ଅପମାନ୍ ଦୂର୍‌ ମାଡ଼ିତିଡ଼୍‌।"

2 ଆଦ୍‌ ଦିନେ ଇସ୍ରାଏଲ୍‌ ମିକା ଏକାମ୍‌ ଗେଲ୍‌ସାନ୍‌ ନାରୁଡ଼୍‌ ସେଙ୍ଗେ ସଦାପ୍ରବୁନ୍‌ କମା ସୁନ୍ଦର୍‌ ଆଦ୍‌ତା ନୁ ଗୌରବ୍‌ ଆଦ୍‌ତେ, ମେଣ୍ଡେ ଦେଶ୍‌ତେ କାୟା ଲେକେତ୍‌ ଆଦ୍‌ତା ନୁ ଲେକେତ୍‌ ମିଙ୍ଗ୍‌ତାୱୁ ଆଦ୍‌ତା। 3 ମେଣ୍ଡେ, ପ୍ରବୁ ବେସୁଙ୍କ୍‌ ବିଚାର୍‌ ମାଡ଼ାନ୍‌ଆତ୍ମା ନୁ ନିଡ଼୍‌ତାନ୍‌ ଆତ୍ମାତଡ଼୍‌ ସିୟୋନ୍‌ତେ ନାଟାକି ମୁର୍କ୍‌ ନର୍ସ ଆଦ୍‌ତା ନୁ ଯିରୁଶାଲେମ୍‌ ମିକା ଆଗେତ୍‌ ନେତୁର୍‌ ଦୂର୍‌ ମାଡ଼ିଦ୍‌ତା; 4 ତାନ୍‌ପେର୍କେ ସିୟୋନ୍‌ତେ ବେନଆୟି ମାନ୍‌ତଣ୍ଡ୍‌ ନୁ ଯିରୁଶାଲେମ୍‌ ମାନ୍‌ତେ, ଇତ୍କେ, ଯିରୁଶାଲେମ୍‌ତାଗ୍‌ ଜିୱେମାନ୍ଦାନ୍‌ ନାରୁଡ଼୍‌ ମିକା ଯେ ସାରେତଡ଼୍‌ ପେଦେରି ଲେକା ଆଦ୍‌ତେ, ଅଣ୍ଡ୍‌ ପବିତ୍ର ଇଞ୍ଜ ସାରେପେକେ ଆଦ୍‌ତେ। 5 ମେଣ୍ଡେ, ସଦାପ୍ରବୁ ସିୟୋନ୍‌ତେ ମେଟେତେ ସାରେତାଗ୍‌ ମାନ୍ଦାନଡ଼୍‌ ନୁ ତାନ୍‌ ସାରେ ଦିନାକିନ୍‌ ପରୁ ଦିନାମ୍‌ ମାବ୍‌ ନୁ ଗୁମାମ୍‌ ନୁ ନାର୍କେ ନିଡ଼୍‌ତାନ୍‌ କିସ୍‌ତେ କାମ୍‌କେ ତିଆର୍‌ ମାଡ଼ିତଣ୍ଡ୍‌; ବାତେଙ୍କ୍‌ଇତ୍କେ ସାରେ କାମ୍‌କେତ୍‌ ପରୁ ନେଲ୍‌ଞ୍ଜ୍‌ ୱେସ୍‌ତେ ସାରେ ଏକାମ୍‌ ଆଦ୍‌ତେ। 6 ମେଣ୍ଡେ, ଦିନାମ୍‌ତେ ଏଦ୍‌ତେ ସେଙ୍ଗେ ନିଡ଼୍‌କେ, ମେଣ୍ଡେ ୱାଡ଼୍‌ସାମ୍‌ତାଗାଙ୍କ୍‌ ରମାନ୍‌ ପଡ଼ିୟେ ଆଦ୍‌ତେ ନୁ ମୁସ୍‌ତେ ପଡ଼ିୟେ ଲେକାମ୍‌ ଆଦାନ୍‌ ସେଙ୍ଗେ ୱେରଡ଼୍‌ ରକ୍ଷାପାହେମ୍‌ ଆଦାନ୍‌ ପଡ଼ିୟେ ଆଦ୍‌ତେ।