1 ହୋ କାର୍‌ୱିନ୍‌ ନାରୁଡ଼୍‌ ସାରେତଡ଼୍‌, ମିଡ଼୍‌ ଏର୍‌ ଗାରେ ୱାଡ଼ାଟ୍‌, ମେଣ୍ଡେ ବେନନାଦ୍‌ ବାତେ ଡାବୁକ୍‌ ଇଲ୍ଲେ, ଅଣ୍ଡ୍‌ ୱାଡ଼ିଣ୍ଡ୍‌, ମିଡ଼୍‌ ୱାଡ଼ାଟ୍‌, ଆସାଟ୍‌ ନୁ ତିନୁଟ୍‌; ହଁ, ୱାଡ଼ା, ଇତ୍କେ ନାନେ ଦାମ୍‌ ଇଲ୍ଲୱେ ଅଙ୍ଗୁର୍‌ରସ୍‌ ନୁ ପାଲ୍ ‌ଆସ୍‌ସା। 2 ପିନ୍ଦ୍‌ୱେ କାଦିତ୍‌ ସେଙ୍ଗେ ବାତ୍‌ତିଙ୍କ୍‌ ରୁପା ୱାମ୍‌ମ ମିନ୍ଦେଡ଼ି ? ବାତେ ଡଙ୍କେ ନିଣ୍ଡାନାଦ୍‌ ଆୟ, ଆଦିନ୍‌ ମାଇଦିଙ୍କ୍‌ ବାତ୍‌ତିଙ୍କ୍‌ ମିଡ଼୍ ତିପାଲ୍‌ ମାଡ଼ୁତିଡ଼୍‌ ? ମାନ୍‌ଇସ୍‌ ମା ଗଟି କେଞ୍ଜାଟ୍‌ ନୁ ଲେକେତ୍‌ କାଦି ତିନୁଟ୍‌ ନୁ ମେନ୍ଦୁଲ୍‌ ଆଦାନ୍‌ କାଦି ମିୟାଦ୍‌ ଜିଊତିଙ୍କ୍‌ ଶାନ୍ତି ଆଦାନଙ୍କ୍‌ ଇମୁଟ୍‌। 3 କେୱୁ ତାରାଟ୍‌ ନୁ ମା ପାକେ ୱାଡ଼ାଟ୍‌; କେଞ୍ଜାଟ୍‌, ଆସୁଙ୍କ୍‌ ମିୟାଦ୍‌ ଜିୱେ ଗେଲ୍ସିତ୍‌; ମେଣ୍ଡେ, ମାମେ ମି ତଡ଼୍‌ ୱେରଡ଼୍‌ ସାରେଦିନାମ୍‌ ମାନ୍ଦାନାଦ୍‌ ନିୟମ୍‌, ଇତ୍କେ, ଦାଉଦନ୍‌ ପରୁ ନିଜାମ୍ ଦୟା ସାରେଦାମ୍‌ ମାଡ଼ିକାଡ଼୍‌। 4 ଉଡ଼େ, ମାମେ ଅଙ୍କ୍ ଗୋଷ୍ଟିତେ ସାରେତଡ଼୍‌ ସାକ୍ଷି ଲେକାମ୍‌, ଗୋଷ୍ଟିତେ ବେଡ଼ିୟଣ୍ଡ୍‌ ମୁନେ ନୁ ଆଦେଶ୍‌ ଇଦାନନ୍‌ ଲେକାମ୍‌ ହେଞ୍ଚିମିନ୍ଦେମ୍‌। 5 ଉଡ଼େ, ବେନ୍‌ ଗୋଷ୍ଟିତିଙ୍କ୍‌ ନିମେ ପୁନ୍‌ୱିନ୍‌, ଅଙ୍କ୍‌ ମାମେ କାର୍‌ଙ୍ଗିତିଡ଼୍‌ ନୁ ବେନ୍‌ ଗୋଷ୍ଟିତିଙ୍କ୍‌ ପୁନ୍‌ନଡ଼୍‌, ଆଦ୍‌ ମି ପାକେ ମିରିତେ, ସଦାପ୍ରବୁ ମି ପରମେଶ୍ୱର୍‌ ନୁ ଇସ୍ରାଏଲ୍‌ତେ ଦର୍ମଲେକେତଡ଼୍‌ ସେଙ୍ଗେ ଇଦ୍‌ ଗଟେମ୍‌ ଆଦ୍‌ତେ; ବାତେଙ୍କ୍‌ଇତ୍କେ ଅଣ୍ଡ୍‌ ମିକିଙ୍କ୍‌ ଗୌରବ୍‌ ମାଡ଼ି ମିନ୍ଦେଣ୍ଡ୍‌। 6 ବେସୁଙ୍କ୍‌ ଆୟିନା ସଦାପ୍ରବୁଙ୍କ୍‌ ଆଦେସ୍‌ତେ, ଆସୁଙ୍କ୍‌ ଆୟିନା ମିଡ଼୍‌ ଅନ୍‌ ପେର୍କେ ଆନୁଟ୍‌, ବେସୁଙ୍କ୍‌ ଆୟିନା ଅଣ୍ଡ୍‌ ଗାରେ ମିନ୍ଦେଣ୍ଡ୍‌, ଆସୁଟ୍‌ ଆୟିନା ଅନାଗେ ପ୍ରାତନା ମାଡ଼ାଟ୍‌। 7 ଦୁଷ୍ଟ ନିଜେତ୍‌ ଆର୍‌ ନୁ ଅଦାର୍ମିକ୍‌ ନିଜେତ୍‌ ସାରେ କାମ୍‌ ୱିଡ଼୍‌ସିଣ୍ଡ୍‌, ମେଣ୍ଡେ, ଅଣ୍ଡ୍‌ ସଦାପ୍ରବୁନ୍‌ ପାକେ ମାଲ୍‌ୱିଣ୍ଡ୍‌, ଆସୁଟ୍‌ ଅଙ୍କ୍‌ ଅଣ୍ଡ୍‌ ଦୟା ମାଡ଼ିତଣ୍ଡ୍‌; ମେଣ୍ଡେ, ଅଣ୍ଡ୍‌ ମା ପରମେଶ୍ୱର୍‌ତେ ପାକେ ମାଲ୍‌ୱିଣ୍ଡ୍‌, ବାତେଙ୍କ୍‌ଇତ୍କେ ଅଣ୍ଡ୍‌ ନାର୍ଗେ ଲେକାମ୍‌ ପାପ୍‌ କ୍ଷମା ମାଡ଼ିତଣ୍ଡ୍‌। 8 ଆଦିଙ୍କ୍‌ ସଦାପ୍ରବୁ କେତିତଣ୍ଡ୍‌, ମାୟାଦ୍‌ ଉପାୟ ମିୟାଦ୍‌ ଉପାୟ ଲେକାମ୍‌ ଆୟ, କି ମାୟାଦ୍‌ ଆର୍ର୍‌ସାରେ ମିୟାଦ୍‌ ଆର୍ର୍‌ ଲେକାମ୍‌ ଆୟ। 9 ବାତେଙ୍କ୍‌ଇତ୍କେ ପୃତିବିତିଙ୍କ୍‌ ୱିଡ଼୍‌ସି ମାବ୍‌ମୟଲ୍‌ ବେଲାନ୍‌ ଡେଙ୍ଗ୍‌, ଆଦ୍‌ଲେକ୍‌ ମାୟାଦ୍‌ ଆର୍ର୍‌ସାରେ ମି ଆର୍ର୍‌ ତାଗାଙ୍କ୍‌ ନୁ ମା ଉପାୟ ସେଙ୍ଗେ ମିୟାଦ୍‌ ଉପାୟ ତାଗାଙ୍କ୍‌ ଡେଙ୍ଗ୍‌ତାଦ୍‌ ଆଦ୍‌ତେ। 10 ବେଲାନ୍‌ ୱାଡ଼୍‌ସାମ୍‌ ନୁ ଗୁମାମ୍‌ ମାବ୍‌ତାଗ୍‌ ମଦଲ୍‌ ୱାଦ୍‌ତେ ନୁ ଆଗେ ମାଲ୍‌ସ୍‌ ଆନ୍‌ନ, ମାତର୍ ବୁମ୍‌ଦିଙ୍କ୍‌ ନାତିତ୍‌, ମେଣ୍ଡେ କାୟା ଆଦାନାୱୁ ନୁ ଗାଡ଼୍‌ ପେସ୍ପି କାର୍‌ୱିନ୍‌ ମାନ୍ଦାନଡ଼୍‌କିଙ୍କ୍‌ ୱିଜେ ୱିତାନଣ୍ଡ୍‌ ନୁ ତିନ୍ଦାନଡ଼୍‌କିଙ୍କ୍‌ ସାକୁର୍‌ ଇଦ୍‌ତେ; 11 ମା ମକମ୍‌ତାଗାଙ୍କ୍‌ ପେଇତେ ବାକ୍ୟ ଆଦ୍‌ଲେକାମ୍‌ ଆଦ୍‌ତେ; ଆଦ୍‌ ବେକାର୍‌ ଆସ୍‌ ମା ପାକେ ମାଲ୍‌ସ୍‌ ୱାଡ଼, ମାତର୍‌ ମାମେ ବାତେ ଆଦ୍‌ ଇଚ୍ଛା ମାଡ଼ିତମ୍‌, ଆଦ୍‌ ପୁରା ମାଡ଼ିକାଡ଼୍‌ ନୁ ବେନ୍‌ କାମ୍‌ତେ ସେଙ୍ଗେ ମାମେ ମାଲ୍‌ପ୍‌ତମ୍‌, ଆସୁଙ୍କ୍‌ ନିଜାମ୍‌ ଆଦ୍‌ତେ। 12 ଆଦିଙ୍କ୍‌ ମିଡ଼୍‌ ୱେଡ଼୍‌କେତେ ପେଇସ୍‌ ଶାନ୍ତିତେ ମୁନେ ମୁନେ ଅଦ୍‌ତଡ଼୍‌; ମେଟା ନୁ ବେଡ଼ିୟେ ମେଟା ମି ମୁନେ ଗାଟିଲେଙ୍ଗ୍‌ଦେ ପାଟେ ପାରିତା ନୁ ୱାୟା ନୁ ମାଡ଼ାକ୍‌ କାଇକ୍‌ ପେଞ୍ଚିତା। 13 କୟେ ମାଡ଼େତ୍‌ ବାଦୁଲ୍‌ତେ ଦେବଦାରୁ ନୁ ପାର୍ୱେଲ୍‌ କୟେ ମାଡ଼େତ୍‌ ବାଦୁଲ୍‌ତେ ମେହେନ୍ଦି ମାଡ଼େ ପେଇତିତ୍‌ତେ; ମେଣ୍ଡେ, ଆଦ୍‌ ସଦାପ୍ରବୁନାଦ୍‌ ଆରାଦନା ଲେକାମ୍‌ ନୁ ତେର୍‌ୱାଦ୍‌ ସାରେଦିନାମ୍‌ତାଦ୍‌ ଚିହ୍ନେ ଲେକାମ୍‌ ଆଦ୍‌ତେ।