1 ତେଦାଟ୍‌, ୱେଇସ୍‌ ଆୟ୍‌ମୁଟ୍‌, ବାତେଙ୍କ୍‌ଇତ୍କେ ମିୟାଦ୍‌ ୱେଇସ୍‌ ମିନ୍ଦେ ନୁ ସଦାପ୍ରବୁନ୍‌ ୱେଇସ୍‌ ମିଇ ପରୁ ୱାସ୍‌ମିନ୍ଦେ। 2 ମାତର୍‌, ଉଡ଼େ, ଇକାଡ଼୍‌ ପୃତିବିତିଙ୍କ୍‌ ନୁ ଅଦିକ୍‌ ଇକାଡ଼୍‌ ଗୋଷ୍ଟିତେ ନାରୁଡ଼୍‌କିଙ୍କ୍‌ ମୁସିତ୍‌; ମାତର୍‌ ମିଇ ପରୁ ସଦାପ୍ରବୁ ୱାଦ୍‌ତଣ୍ଡ୍‌ ନୁ ଅନାଦ୍‌ ୱେସ୍‌ ମିଇ ପରୁ ତନ୍ଦିତେ। 3 ମେଣ୍ଡେ, ୱେରେ ଦେଶ୍‌ତେନଡ଼୍‌ ମିୟାଦ୍‌ ୱେଇସ୍‌ ଗାରେ ନୁ ରାଜାନଡ଼୍‌ ମିଇ ପରିତ୍ରାଣ ୱେଇସ୍‌ତେ ପାକେ ୱାଦ୍‌ତଡ଼୍‌। 4 ମିଡ଼୍‌ ସାରେପାକେ ଉଡ଼ାଟ୍‌, ଅଡ଼୍‌ ସାରେତଡ଼୍‌ ଅଣ୍ଡୟ୍‌ତାଗ୍‌ ଆସମିନ୍ଦେଡ଼୍‌, ଅଡ଼୍‌ ମି ପାକେ ୱାଦୁତଡ଼୍‌; ମିଇ ମାର୍କ୍‌ ଦୂରାମ୍‌କଞ୍ଜ୍‌ ୱାଦ୍‌ତଡ଼୍‌ ନୁ ମିଇ ମାୟାସ୍କ୍‌ ଅଡ଼୍‌ ପିଲାଙ୍କ୍‌ ପୟିତେ ଲେକାମ୍‌ ହେତି ତାତିତଡ଼୍‌। 5 ଆସୁଟ୍‌ ମିଡ଼୍‌ ଆଦ୍‌ ଉଡ଼ି ୱେଇସ୍‌ ଆଦ୍‌ତିଡ଼୍‌ ନୁ ମିୟାଦ୍‌ ହୃଦୟ ଦୁକ୍‌ ଦୁକ୍‌ଆସ୍‌ ୱେଡ଼୍‌କେତେ ନିଣ୍ଡିଆଦ୍‌ତେ; ବାତେଙ୍କ୍‌ଇତ୍କେ ସମୁଦ୍ର ଲୋପେ ମାନ୍ଦାନ୍‌ ସାରେ ମିଇପାକେ ମାଲ୍ସ୍‌ ୱାଦ୍‌ତା, ୱେରେ ଦେଶ୍‌ତେନଡ଼୍‌ ସମ୍ପତ୍ତି ମିଇ ପାକେ ୱାଦ୍‌ତା। 6 ଅପାର୍‌ତେ ଉଟ୍‌କ୍‌, ମିଦୟନ୍‌ ନୁ ଐଫାର୍‌ତେ ଉର୍‌ଗିଙ୍କ୍‌ ତାକାନ୍‌ ଲେୟେ ଉଟ୍‌କ୍‌, ମିକିଙ୍କ୍‌ କାଇଲିତା; ଆୱୁସାରେ ଶିବା ଦେଶ୍‌ତାଗାଙ୍କ୍‌ ୱାତ୍‌ତା; ଅଡ଼୍‌ ସୁନାତାୱୁ ଉପହାର୍‌ ତାତିତଡ଼୍‌ ନୁ ସଦାପ୍ରବୁଙ୍କ୍‌ ପ୍ରଶଂସା ପ୍ରଚାର୍‌ ମାଡ଼ିତା। 7 କେଦାର୍‌ତେ ସାରେ ମେଣ୍ଢାମାନ୍ଦେ ମିଇ ପାକେ ଅଣ୍ଡୟ୍‌ତାଗ୍‌ ଆଦ୍‌ତା, ନବାୟୋତ୍‌ତେ ମେକାସାରେ ମିକିଙ୍କ୍‌ ହେଞ୍ଚିତା; ଆୱୁ ଗ୍ରହନ୍‌ ଆସ୍‌ ମାନ୍‌ ବେଦିତ୍‌ ପରୁ ୱାଦ୍‌ତା, ମେଣ୍ଡେ ମାମେ ନିଜେତ୍‌ ଲିକିଆତ୍‌ତେ ଲତ୍‌ତିଙ୍କ୍‌ ତିଆର୍‌ ମାଡ଼ିକାଡ଼୍‌। 8 ମାବ୍‌ ମୟଲ୍‌ ଲେକାମ୍‌ ନୁ ନିଜେ ନିଜେତ୍‌ ୱେଲୁମ୍‌ତିଙ୍କ୍‌ ପାର୍‌ତାନ୍‌ ପାର୍‌ୱା ଲେକାମ୍‌ ପାର୍‌ସ୍‌ ୱାସମିନ୍ଦେ ଯେ, ଇଡ଼୍‌ ବେନଡ଼୍‌। 9 ନିଜାମ୍‌ ସମୁଦ୍ର ନାଡ଼୍‌ମେ ବାସେ ମାଡ଼ାନଡ଼ି ମାକିଙ୍କ୍‌ କେପିତଡ଼୍‌, ମେଣ୍ଡେ ତର୍ଶୀଶତେ ଜାହାଜସାରେ ନିଜେତ୍‌ ସାରେ ନିଜେତ୍‌ ନିଜେତ୍‌ ତଡ଼୍‌ଦେ ଅଡ଼୍‌ ରୂପା ନୁ ସୁନା ଅସ୍‌, ମୀଇ ପିଲାକିଙ୍କ୍‌ ଦୁରାମ୍‌କଞ୍ଜ୍‌ ତାତ୍‌ତଡ଼୍‌, ନିମେ ପରମେଶ୍ୱର୍‌ତେ ସଦାପ୍ରବୁନ୍‌ ପେଦେର୍‌ ସେଙ୍ଗେ ନୁ ଇସ୍ରାଏଲ୍‌ତେ ଦର୍ମଲେକାମ୍‌ ୱାଦ୍‌ତେ, ବାତେଙ୍କ୍‌ଇତ୍କେ ଅଣ୍ଡ୍‌ ମିକିଙ୍କ୍‌ ମହିମା ମାଡ଼୍‌ତଣ୍ଡ୍। 10 ମେଣ୍ଡେ, ବିଦେଶିୟନଡ଼୍‌ ମି ନେଟେ ତିଆର୍‌ ମାଡ଼ିତଡ଼୍‌ ନୁ ଅଡ଼୍‌ ରାଜାନଡ଼୍‌ ମିଇ ସେବା ମାଡ଼ିତଡ଼୍‌; ବାତେଙ୍କ୍‌ଇତ୍କେ ମାମେ ନିଜେତ୍‌ କପାମ୍‌ତେ ମିକିଂଙ୍କ୍‌ ରେଃତମ୍‌, ମାତର୍‌ ନିଜେତ୍‌ ମହିମାତେ ମାମେ ମିଇ ପରୁ ଦୟା ମାଡ଼ିମିନ୍ଦେମ୍‌। 11 ୱେରେ ଦେଶ୍‌ତେନଡ଼୍‌ ସମ୍ପତ୍ତି ନୁ ଆୱିନ୍‌ ସାଙ୍ଗେ ଅଡ଼୍‌ ରାଜାନଡ଼୍ ବନ୍ଦୀ ଆସ୍‌ ବେଲାନ୍‌ ମି ପାକେ ତାତିତଡ଼୍‌, ଆଦିଙ୍କ୍‌ ମିଡ଼୍‌ ନଗର୍‌ତେ ଦ୍ୱାର୍‌ସାରେ ସାରେ କୁଲାମାନ୍ତା, ନାର୍କାପାୟାଲ୍‌ ଆୱୁ ସାରେ ବନ୍ଦ ଆୟ। 12 ବାତେଙ୍କ୍‌ଇତ୍କେ ବେନ୍‌ଦେଶ୍‌ ନୁ ରାଜ୍ୟ ମି ସେବା ମାଡ଼କ୍‌, ନିଜାମ୍‌ ଆୱୁ ଦେଶ୍‌କ୍‌ ନଷ୍ଟ ଆଦ୍‌ତା, ହ ଆଦ୍‌ ଦେଶ୍‌ସାରେ ୱିଡ଼୍‌ସ୍ତେ ଲେକାମ୍‌ ଦଂସ ଆଦ୍‌ତେ। 13 ଲିବାନୋନ୍‌ତେ ମହିମା ମି ପାକେ ୱାଦ୍‌ତେ, ଦେବଦାରୁ, ତିଦର, ତାଶୂର ମାଡ଼ାକ୍‌ ଅଣ୍ଡୟ୍‌ତାଗ୍‌ ଆସ୍‌ ମାନ୍‌ ପବିତ୍ର ପଡ଼ିୟେ ସୁନ୍ଦର୍‌ ମାଡ଼ାନଙ୍କ୍‌ ୱାଦ୍‌ତଡ଼୍‌, ମେଣ୍ଡେ ମାନାଡ଼୍‌ ନିଜ ୱିକାନ୍‌ ପଡ଼ିୟେ ମହିମା ମାଡ଼ିତଡ଼୍‌। 14 ବେନଡ଼୍‌ ମିକିଙ୍କ୍‌ କଷ୍ଟ ଇଦ୍‌ତଡ଼୍‌, ଅଡ଼୍‌ ପିଲାକି ମଦଲ୍‌ ଆସ୍‌ ମିୟାଗ୍‌ ୱାଦ୍‌ତଡ଼୍‌ ନୁ ବେନଡ଼୍‌ ମିକିଙ୍କ୍‌ ପାସ୍କ୍‌ତଡ଼୍‌, ଅଡ଼୍ ସାରେତଡ଼୍‌ ମି ଡେକେତ୍‌ ମଦଲ୍‌ ମଡ଼୍‌କିତଡ଼୍‌; ମେଣ୍ଡେ, ଅଡ଼୍‌ ମିକିଙ୍କ୍‌ ସଦାପ୍ରବୁନ୍‌ ନଗର୍‌ତେ, ଇସ୍ରାଏଲ୍‌ତେ ଦର୍ମଲେକାତେ ସିୟୋନ୍‌ ଇଞ୍ଜ କେତିତଣ୍ଡ୍‌। 15 ମିଡ଼୍‌ ୱିଡ଼୍‌ସି ମାନ୍ଦାନଡ଼ି ନୁ ପାସ୍‌କି ଆୟିନାଙ୍କ୍‌ ବେନ ମି ନାଡ଼୍‌ମେଙ୍କ୍‌ ଆଦା ୱାଦା ମାଡ଼ଡ଼୍‌, ଆଦିଙ୍କ୍‌ ସେଙ୍ଗେ ନାନେ ମିକିଙ୍କ୍‌ ସାରେ କାଲା‌ମ୍‌ତେ ଗୌରବ୍‌ ନୁ ନାର୍ଗେ ମାନେଇ ପରମ୍ପରା ୱେଡ଼୍‌କେ ଲେକାମ୍‌ ମାଡ଼ିକାଡ଼୍। 16 ୱେରେ ଦେଶ୍‌ତେ ଗୋଷ୍ଟିତଡ଼୍‌ ରାଜାନଡ଼୍‌ ମିକିଙ୍କ୍‌ ପଡ଼୍‌ପିତଡ଼୍‌ ବେଲାନ୍‌ ୟାୟ ତାନ୍‌ ପିଲାକିଙ୍କ୍‌ ଯତନ୍‌ ମାଡ଼ିତେ ଆଦ୍‌ଲେକାମ୍‌ ରାଜାନଡ଼୍‌ ନିଜେତ୍‌ ରାଜ୍ୟତିଙ୍କ୍‌ ଯତନ୍‌ ଅଦ୍‌ତଡ଼୍‌। ଆସୁଙ୍କ୍‌ ମାମେ ଯେ ସଦାପ୍ରବୁ ମି ତ୍ରାଣକର୍ତ୍ତାଲ୍‌ ନୁ ମି ମୁକ୍ତିଦାତାଲ୍‌, ଯାକୁବ୍‌ତେ ଶକ୍ତିଦାତା ଆଦ୍‌ତମ୍‌, ଇଦ୍‌ ମିଡ଼୍‌ ପୁନ୍ଦ୍‌ତିଡ଼୍‌। 17 ମାମେ ପିତ୍ତଲ୍‌ତେ ବାଦୁଲ୍‌ତେ ସୁନା ତାତିକାଡ଼୍‌ ନୁ ଲୁଆତେ ବାଦୁଲ୍‌ତେ ରୂପା, ୱେର୍କ୍‌ ବାଦୁଲ୍‌ତେ ପିତ୍ତଲ୍‌ ନୁ ନେଟେ ବାଦୁଲ୍‌ତେ ଲୁଆ ତାତିକାଡ଼୍‌; ମେଣ୍ଡେ, ମାମେ ମି କେପାନ୍‌ ପଡ଼ିୟେତାଗ୍‌ ଶାନ୍ତିତିଙ୍କ୍‌ ନୁ ମି ଅଦିକାରୀ ପଦତାଗ୍‌ ଦାର୍ମିକ୍‌ତିଙ୍କ୍‌ ହେଞ୍ଚିକାଡ଼୍‌। 18 ମି ଦେଶ୍‌ତାଗ୍‌ ରେଃତାନ୍‌, ନାଡ଼୍‌କାନ୍‌ ଗଟି ନୁ ମିୟାଦ୍‌ ସୀମାତାଗ୍‌ ଜିଡ଼୍‌ତେ ନୁ ଦଂସତେ ଗଟ୍‌ ମେଣ୍ଡେ କେଞ୍ଜାନଙ୍କ୍‌ ଆୟି; ମାତର୍‌ ମିଡ଼୍‌ ନିଜେ ନେଟେତେ ପେଦେର୍‌ ପରିତ୍ରାଣ ନୁ ନିଜେ ନଗର୍‌ତେ ଦ୍ୱାର୍‌ତେ ସାରେ ପେଦେର୍‌ ପ୍ରଶଂସା ନେଃତିତିଡ଼୍‌। 19 ଦିନାମ୍‌ତେ ପଡ଼ଦ୍‌ ମି ୱେସ୍‌ ମେଣ୍ଡେ ଆୟ, କି ୱେସ୍‌ତେ ସେଙ୍ଗେ ନେଲ୍‌ଞ୍ଜ୍‌ ମିକିଙ୍କ୍‌ ୱେସ୍‌ଇୱ; ମାତର୍‌ ସଦାପ୍ରବୁ ମି ପରୁ ଅନନ୍ତ କାଲାମ୍‌ତେ ୱେସ୍‌ ନୁ ମି ପରମେଶ୍ୱର୍‌ ମି ଗୌରବ୍‌ ଲେକାମ୍‌ ଆଦ୍‌ତେ। 20 ମିୟାଦ୍‌ ପଡ଼ଦ୍‌ ମେଣ୍ଡେ ପେୟ, କି ମିୟାଦ୍‌ ନେଲ୍‌ଞ୍ଜ୍‌ ମିକିଂଙ୍କ୍‌ ୱେସ୍‌ ଇୱ; ବାତେଙ୍କ୍‌ଇତ୍କେ ସଦାପ୍ରବୁ ମିୟାଦ୍‌ ଅନନ୍ତ କାଲାମ୍‌ ୱେସ୍‌ ଲେକାମ୍‌ ଆଦ୍‌ତେ ନୁ ମି ଦୁଃକାମ୍‌ତେ ଦିନାମ୍‌ ତେରି ଆଦ୍‌ତେ। 21 ମେଣ୍ଡେ ମି ନାରୁଡ଼୍‌ ସାରେତଡ଼୍‌ ଦାର୍ମିକ୍‌ ଆଦ୍‌ତଡ଼୍‌; ଅଡ଼୍‌ ଅନନ୍ତ କାଲାମ୍‌ ହେୱୁନା ଦେଶ ଅଦିକାର୍‌ ମାଡ଼ିତଡ଼୍‌, ଅଡ଼୍‌ ମାନ୍‌ ଗୌରବ୍‌ତେ ମାନ୍‌ ଉରୁର୍କେ ପଦ୍‌ଲା ନୁ ମାନ୍‌ କାଇଦେ ତିଆର୍‌ ଆତ୍‌ତେ କାମ୍‌ ଆଦ୍‌ତଡ଼୍‌। 22 ଇସୁର୍‌ ୱେରଡ଼୍‌ ହଜାର୍‌ ହଜାର୍‌ ଗୋଷ୍ଠି ଆଦ୍‌ତା ନୁ ଦୁର୍ବଲ୍‌ ନଗର୍‌ ଆଦ୍‌ତେ; ମାମେ ସଦାପ୍ରବୁ ଆଦ୍‌ତମ୍‌, ଅନନ୍ତ କାଲାମ୍‌ତେ ଇଦ୍‌ ଯାପେ ମାଡ଼ିକାଡ଼୍‌।