1 Amose bu Yesaya nombia ŋan ɔ be naa lee Yuda na Yerusalɛm wose man debaŋ keŋ Usiya na Yotame na Ahase na Hesekiya be dii gyoori Yuda nɛ yaa.

2 Degbeŋgyoo kpa,

<<Nyaŋ adido nyii, Tɛɛle, tei,

Ma te kɛɛle bia be ta bee taŋ,

mɔna be ta koro seŋ tia maŋ.

3 Nunkyue baale gyeŋ ɔ gbeŋgyoo

te afurum gyeŋ ɔ gbeŋgyoo weenɛɛ adakaa,

mɔna Iseraetena ba gyeŋ maŋ ya,

me balaŋ bee nyii nombia man ya.>>

4 Tɛɛle keŋ kɛɛ yɛɛ dukum nɛ dɛɛ laako,

balaŋ baŋ be fɔɔkedi boe,

nombia kumɛɛ yɛɛra bia,

bia baŋ bɔɔ wɔlɛɛ,

Ba te bɛɛ Degbeŋgyoo,

ba te bɛɛ Iserae walaŋ Fereŋkyeŋte Ŋon.

be ta besena be wɔɔle tee e.

5 Woŋ dɔɔ te baa bese tuku ŋon bela?

Woŋ dɔɔ te ɛ gyakaa ɛ ne yɛɛ deŋele doŋ?

Nyee keŋ pou te gooli,

te konɔɔ keŋ pou ne nyii weeleŋ.

6 Lee nyeeman mo kɔŋ nawɔɔtɛɛ,

be dana doŋ ya,

gyaŋtarɛɛ na gyamɛɛ kaageŋ,

na gyamɛɛ ŋan ŋee wii loŋse nɛ,

bɔɔ na nyekee yaa bake ŋa ya,

te bɔɔ na do ŋa tee ya.

7 Ɛ tɛɛle keŋ doo yakaa.

te ba too ɛ donɔɔse dinaana ŋan,

te ŋɔɔla te lɛo ɛ tɛɛlese,

ɛ siaman pɛɛ,

ŋgba mena keŋ ŋɔɔla ne wɔlɛɛ abɔɔ nɛ.

8 Be te tina Siyɔn bu alebu ŋon yela,

ŋgba gerepo wɔɔman kefɛɛ nɛ,

ŋgba kefɛɛ keŋ kyaa kukumba wɔɔman nɛ,

ŋgba donɔɔ dinaa keŋ kɔlara be tɔ wɔ do nɛ.

9 Na Degbeŋgyoo Dekpataakpere ŋon

kaasena daa balaŋ kyomii baale ya na,

nafɔ dɛɛ yɛɛ ŋgba Sodom nɛ,

nafɔ dɛɛ yɛɛ ŋgba Gomora nɛ.

10 Ɛmɛɛ Sodom siamantena,

ɛ nyii Degbeŋgyoo dei.

ɛmɛɛ Gomoratena,

ɛ tei Degbeŋgyoo nombia kawola.

11 Degbeŋgyoo kpa nyiaa,

<<Woŋ te ɛ kedeesase burum ŋan,

gyae ke yɛɛ fa maŋ?

Namense na ɛ wonembia nuŋse,

na katoo kedeesase te poro maŋ,

nunkyuese na namense na asoose fatabose bɛɛ gyɔ maŋ loo ya.

12 Nyi akpaa ɛ kɔŋ me siaman na,

amɔte yakona ŋon nyi,

yaa kɔŋ kaa sakatee ma akpaŋalaŋse man?

13 Ɛ na mo kedeesase ŋan be dana tɔnɔɔ ya nɛ kɔna maŋ ya.

Yɔ oliifi yɛɛ ma anekɔlaŋ.

Mɔɔ tale seŋ kɛɛ ɛ kegyaŋeese,

gyaalaŋ wɔle wee kedi na kefɛɛfowee na ɛ nɔɔkedise ŋaale ŋan be dana tɔnɔɔ nɛ ya.

14 Ma woo ne kɔla ɛ gyaalaŋ wɔle weekedi,

na debaŋ keŋ ɛ na mo di nɔɔkedise ŋaale nɛ.

Ŋa te kaa bese kasolɔ fa maŋ

te ma te kaana ŋa.

15 Nyi akpaa ɛ gyina ɛ nyiŋmaase ɛ ne fane nɛ,

maa lese me sia.

Nyi akpaa ɛ fane kyare koraŋ nɛ,

mɔɔ gyae maa tei ŋon ya.

nawolo nyi ɛ ta koe balaŋ.

16 Ɛ sɔ na ɛ ke gberaa ɛ wose.

Ɛ lese ɛ nombiakumɛɛ keyɛɛ,

lee me siaman,

Ɛ tina nombia kumɛɛ keyɛɛ yela.

17 Ɛ kasee nombia kpaakpaa keyɛɛ, na ɛ ke kɛo nombia kedi kegbɛɛ dɔɔ,

na ɛ ke di baŋ bɔɔ ŋere wɔ do nɛ nombia fa wɔ.

Ɛ seŋ yoyolobiise wɔle

na ɛ ka sola fa liala.

18 Degbeŋgyoo kpa nyiaa,

<<Nɛnɛɛ ɛ kɔŋ na dɛɛ mo nyeempɔ,

doo nyi ɛ dukum yɛɛ ŋgba kanyaŋ yayam koraŋ nɛ,

ke gyae ka wolose ŋgba dukurufa mpuu nɛ.

Nyi akpaa ŋe yasɛɛ ŋgba fatabo koraŋ na,

ŋe gyae ka wolose ŋgba akaralɛɛ nɛ.

19 Nyi akpaa ɛ gyae te ɛ nyii me dei na,

ɛ ke di tɛɛle keŋ dɔɔ abɔɔ kpaakpaa.

20 Mɔ nyi akpaa ɛ yɛɛ deŋele doŋ te ɛ seŋ tia maŋ na,

yoosila gyae ka koe ŋon.>>

Degbeŋgyoo yakola.

21 Kɛɛ mena keŋ donɔɔ dinaa keŋ kee di anokoare nɛ,

ka bese futoolite.

Nafɔ ɔ ne di nombia na kegbɛɛ,

Nafɔ ɔ tenɛɛ,

mɔna nɛnɛɛ awudiina te wulu ke man.

22 N kɔba wolom be dana tɔnɔɔ ya,

be ta mo loŋ kyakale n waen gyaagyi man.

23 N siamantena na koro seŋ tia maŋ,

be gyoona yɛna ŋmɛɛlatena,

be popou ne gyae abɔɔ kayo lɛɛ,

te be silana abɔɔkefa gbɛɛ.

Bɔɔ ne di yoyolobiise nombia fa wɔ ya,

te bɔɔ famenɛna liala nombia ya.

24 Mena dɔɔ Degbeŋgyoo, Degbeŋgyoo Dekpataakpere,

Iseraetena Doŋte ŋon kpa,

<<Maa lese me baŋ wola me kɔlara,

na maa tɔ me kɔlara kom.

25 Maa wɔŋ n deŋele nideli,

maa yalakee neŋ lese ayimɛɛ nideli,

na maa lese nya ayimɛɛ pou.

26 Maa bese see nombiadiira fa neŋ ŋgba gyaŋgba keŋ nɛ,

na siamantena ŋgba kewalaŋ keŋ nɛ.

Kenaŋ wɔle na baa baake neŋ nyi,

donɔɔ dinaa keŋ ka tenɛɛ,

na donɔɔ dinaa keŋ kee di anokoare.>

27 Baa mo nombia kedina kegbɛɛ lɛɛ Siyɔn,

te baŋ bɔɔ kyɛɛkee lee be konɔɔse man nɛ, baa lɛɛ wɔ lee be katenɛɛ dɔɔ.

28 Baa wɔlɛɛ baŋ be dana deŋeledoŋ na nombiakumɛɛ yɛɛra,

te baŋ bɔɔ bɛɛ Degbeŋgyoo nɛ baa munu.

29 Desɛŋ gyae ke kyaŋ ŋon lee kpeli daase ŋan,

ɛ ne nyaŋee som nɛ dɔɔ.

Ɛ sia gyae ka yeŋ lee wɔɔsebia ŋan,

ɛ ba lese nɛ dɔɔ.

30 Ɛ ke yɛɛ ŋgba kpeli daŋ keŋ ke faareŋ be kpiisi nɛ,

ŋgba wɔɔbii keŋ loŋ be doo ke man ya nɛ.

31 Doŋte waa yɛɛ ŋgba faareŋ awolɛɛ nɛ,

te ɔ tom yɛɛ ŋgba boalaŋ katepɛɛpɛɛse nɛ,

ŋe popou gyae ke kpa,

keŋ ŋolo be tale ko ŋa ya.>