1 Ɛferayim kyeŋkyeŋkɔɔ saboe, keŋ Eferayim soloŋ nyɔɔra na mo gate ba wose,

kyeŋkyeŋkɔɔ kyeote keŋ ke gyoorobiiri ne kpiisi,

te ke doo detaŋgya kpaakpaa keŋ nyeeman,

na baŋ waen be wɔlɛɛ wɔ donɔɔ dinaa keŋ man nɛ baa laako.

2 Kɛɛ, Degbeŋgyoo dana ŋon ɔ dana doŋ nideli,

ŋgba akpeleŋkpeleŋbia ŋan ne yale na feliŋ keŋ ne wɔlɛɛ abɔɔ nɛ,

waa mo doŋ tisina ke kɔŋ tɛɛle dɔɔ,

ŋgba ɔga dinaa keŋɛɛ keŋ na mo loŋ kewuu kɔŋ tɛɛle dɔɔ nɛ.

3 Baa sakatee kyeŋkyeŋkɔɔ saboe,

keŋ dɔɔ Ɛferayim soloŋ nyɔɔra ne gate ba wose nɛ.

4 Mena kyeŋkyeŋkɔɔ kyeote keŋ ke gyoorobiiri be kpiisi,

keŋ doo detaŋgya kpaakpaa keŋ nyeeman nɛ,

gyae ke yɛɛ ŋgba fiigi bia ŋan be taŋgbɛɛ yɛɛ pɛ weenɛɛ kekɛrɛɛ kelii nɛ,

balaŋ de naa ŋa pɛ na bɛɛ kɔ ŋa,

na be te di ŋa deboman.

5 Wee kenaŋ Degbeŋgyoo Dekpataakpere ŋon,

waa yɛɛ gyoorobiiri gyooro kotɔtɔɔ,

na kyeŋkyeŋkɔɔ saboe kyeote,

fa ɔ balaŋ baŋ bɔɔ kaa be kyaa.

6 Waa yɛɛ nombia kedi kegbɛɛ dɔɔ feliŋ,

fa ŋon waa kyaa di nombia,

na waa fa wɔ doŋ,

keŋ baa mo tɔ yoo nɔɔ donɔɔ dinaa keŋ denaanɔɔ man.

7 Gbalara na saese ne kpaŋte lee waen kenyɔɔ dɔɔ,

soloŋ doŋte te yele be dɔŋ wogbaa.

Bɛɛ bɛɛle lee soloŋ doŋte dɔɔ,

waen te wɔlɛɛ wɔ,

soloŋ doŋte te yele be dɔŋ wogbaa,

be naa nombia na, be sia ne yɛɛ wɔ moamoa,

be gyaŋee bɛɛ mo nyeempɔ na bee wuku.

8 Ba te tɔe wɔlɛɛ be tebuluse pou dɔɔ,

yenaŋ daale te kaa keŋ ayimɛɛ be doo ya.

9 <<Amɔte yaa ɔ ne gyae waa wola e nombia?

Amɔte yaa ɔ na lese ɔ nombia man waa fa?

Bia baŋ bɔɔ tira wɔ dide,

yaa baŋ bɔɔ lese dide lee be nɔɔman deboman?

10 Nawolo nyi ke yɛɛ,

Yɛɛ kei, yɛɛ kenaŋ,

kei wui mmaraa, kenaŋ wui mmaraa,

kɛbo kyomii, botɔɔ mɔ kyomii.>>

11 Ke gbagba na, Wurubuarɛ waa mo deise wɔlɛɛ, na baŋ bee wuku nɛ laakemse,

kolosi fa balaŋ kɛwɔ.

12 Ɔ yako wɔ nyiaa,

<<Kɛbo yɛna defɛɛfoe, ɛmɛɛ baŋ ɛ be kaa nɛ ɛ fɛɛfo,

kɛbo yɛna botɔɔ keŋ ɛ wose gyae ke fɛɛ ŋon,>>

mɔna be te nyii e ya.

13 Mena dɔɔ Wurubuarɛ nombia gyae kekɔŋ fa wɔ nyiaa,

Yɛɛ kei, yɛɛ kenaŋ,

kei wui mmaraa, kenaŋ wui mmaraa,

kɛbo kyomii, botɔɔ kyomii.>>

na nyi bee gyu na baa lee yala wɔlewɔle,

baa gooli na baa gyoo kɔta man na baa kyaŋ wɔ.

14 Mena dɔɔ ɛmɛɛ baŋ ɛ ne kulu balaŋ,

te ɛ ne di balaŋ kɛwɔ dɔɔ Yerusalɛm nɛ, ɛ nyii Degbeŋgyoo nombia.

15 Ɛ na wola ɛ wose nyiaa, <<Daa na yeŋ te bakenɔɔsee,

daa na woyadɛɛ te bake sɛɛ dɔŋa,

nyi akpaa deŋele kewɔŋ kum de kɔŋ nɛ,

be gyae ke lii de gyaŋ ya,

nawolo nyi de ta mo dekara yɛɛ da keyeu kagyoo,

te da moo akɛrɛɛ yɛɛ de dayoe.>>

16 Mena dɔɔ Degbeŋgyoo Doŋ Pou Nyee kpa,

<<Kɛɛ, ma te baŋ boe daale Siyɔn, boe keŋ bɔɔ kɛɛse ke kɛɛ,

kebɔtala man boe koyadoŋte, fa mokɔɔ kasee keŋ seŋɛɛ keŋkeŋ,

ŋon ɔ mo ɔ wose lɔ ke dɔɔ nɛ,

ɔ wɔe be gyae kelɔ e korakora ya.

17 Maa mo nombia kedi kegbɛɛ dɔɔ yɛɛ kemaa ŋmeleŋ,

na maa mo katenee yɛɛ naetɔɔse,

akpeleŋkpeleŋbia gyae ke wɔlɛɛ ɛ dekara keyeu kagyoo keŋ,

na loŋ ke waale mo ɛ dayoe keŋ.

18 Ɛmɛɛ na yeŋ nɔɔkebakesee keŋ gyae ke wɔlɛɛ,

ɛmɛɛ na woyadɛɛ kebake sɛɛ dɔŋa be gyae ka seŋ ya.

Nyi deŋele kewɔŋkum keŋ de kɔŋ na,

ke gyae ke wɔlɛɛ ŋon pou.

19 Debaŋ kamasɛ keŋ ka de kɔŋ na gyae ka mo ŋon,

nawolo nyi nebo kamasɛ, wee man na nelim na,

ke gyae ke kɔŋ.>>

Nombii kei man kenyii,

gyae ka do ŋon gyakoloŋ.

20 Nawolo nyi dofoŋoŋ gyae ke yɛɛ duguŋ keŋ nyi n be tale tenee n wose ya,

kuŋtuŋ gyae ke yɛɛ peperee keŋ ba yee neŋ kewuu ya.

21 Degbeŋgyoo waa fokaa ɔ wose, ŋgba ɔ ke yɛɛ Perasim bula dɔɔ nɛ,

waa wosi ɔ wose ŋgba ɔ ke yɛɛ Gibeon detaŋgya man nɛ,

na waa yɛɛ ɔ tom, ɔ tom keŋ ke dana gyakoloŋ,

na waa yɛɛ ɔ tom, keŋ ke yɛɛ kpoo.

22 Nɛnɛɛ ɛ tina ɛ balaŋ kekulu yela,

na mena ya na ɛ kaale gyae ka bo kpu,

Degbeŋgyoo, Degbeŋgyoo Dekpataakpere te yako me te nyii,

kewɔlɛɛ keŋ ɔ bakesee lee tɛɛle kei pou wose man.

23 Ɛ tei na ɛ ke nyii ma woya,

ɛ see deŋele nideli na ɛ ke nyii keŋ mɛɛ yako.

24 Nyi wɔɔfarale de fara tɛɛle nyi waa duu abɔɔ na, ɔ na bese fara ke bela?

Nyi ɔ pupui tɛɛle nyi waa duu abɔɔ na, ɔ na bese pupui ke bela?

25 Akpaa ɔ tala tɛɛle keŋ taŋ nɛ,

ɔ ne duu kayigbe na nkaŋgyaa kpoo,

na ɔ te ŋmatee aboŋ na kameese kpoo,

na ɔ te duu wamela wɔɔ keŋ nɔɔnɔɔ.

26 Ɔ Wurubuarɛ na wolana e,

gbɛɛ kpaakpaa keŋ dɔɔ waa mo.

27 Bɔɔ na mo okpokpo tuku kayigbe,

yaa nyeele anefiileŋ nawɔɔ tuku nkaŋgyaa ya,

bɛɛ mo dambila tuku kayigbe bo,

gbutu te bɛɛ mo tuku nkaŋgyaa.

28 Bɛɛ naŋ wamela mo yɛɛ bodobodo,

mɔna ŋolo bee tuku ke kekpaakekpaa ya.

Baa tale mo nyeele anefiileŋ nawɔɔ ta ŋe dɔɔ,

mɔna bɔɔ na mo dɛɛkyɔŋse naŋ ke ya.

29 Kɛŋa pou lee Degbeŋgyoo Dekpataakpere ŋon gyaŋ,

ɔ nyeeman kebake dana gyakoloŋ,

te ɔ nyansa liiwɔ nideli.