1 Ɛ kɔŋ, ɛ yela dee kpee kenyaŋee nɔɔneŋ fa Degbeŋgyoo,

ɛ yela dɛɛ fae yeesa keŋkeŋ fa da nyeekelɛɛ kpanaŋ ŋon.

2 Ɛ yela dɛɛ mo karaŋ kefa kɔŋ ɔ siaman,

na dɛɛ mo nɔɔneŋ kekpee gate ɔ yele.

3 Nawolo nyi Degbeŋgyoo yɛna Wurubuarɛ dinaa,

Gyoo Dinaa wurubuarɛse pou dɔɔ.

4 Ɔ nyiŋmaa man te tɛɛle dɔɔ abɔɔ pou doo,

bulase dɔɔ abɔɔ pou yɛɛ ɔ wui.

5 Ɛpo yɛɛ ɔ wui, nawolo nyi ŋon yɛɛna ke,

ɔ nyiŋmaase te ɔ moowɔ yɛɛ tɛɛle dowolosa keŋ.

6 Ɛ kɔŋ, ɛ yela dee buŋ som e,

ɛ yela dee tisi buŋ da doona dɔɔ Degbeŋgyoo ŋon ɔ be yɛɛ daa nɛ siaman.

7 Nawolo nyi ŋon yɛna de Wurubuarɛ,

de yɛɛ balaŋ baŋ ɔ ne kɛɛ de dɔɔ

de yɛɛ namense baŋ ɔ ne kɛɛ de dɔɔ.

Akpaa ɛ nyii ɔ woya gyɛŋ nɛ,

8 Ɛ naa yɛɛ konɔɔyuŋ ŋgba mena keŋ ɛ be yɛɛ Meriba,

na mena keŋ ɛ be yɛɛ Maasa wee kenaŋ depampaa keŋ man nɛ ya.

9 Botɔɔ te ɛ naanaɔ kɛɛse maŋ kɛɛ,

doo nyi be naa keŋ mɔɔ yɛɛ koraŋ nɛ, ba teese me nɔɔman.

10 Ma gyeŋa baŋ do mena kalola kegyakaare man balaŋ benaŋ kulutooneŋ sɔŋola (40),

Me yakowɔ nyiaa, <<Be yɛɛ balaŋ baŋ be konɔɔse ba yo gbɛɛ,

be ta gyeŋ me gbɛɛneŋ ya.>>

11 Mena dɔɔ ma gyeŋa baŋ kaŋ ntam nyiaa,

<<Bɔɔ gyae baa gyoo ma kefɛɛfo man korakora ya.>>