1 Me lɔɔ nɔɔ keŋkeŋ baake Degbeŋgyoo,

me gyinaa ma woya baake Degbeŋgyoo nyi waa wii me waraŋase.

2 Ma moo me nombia ŋan ne takaa maŋ see ɔ siaman,

me yako ma wose kekyaŋ nombia ɔ siaman.

3 Nyi ma wose de tekerii maŋ na,

nyaŋ ne kɛɛna ma keta man.

Ba te nyɔɔ maŋ kɔtase,

gbɛɛneŋ ŋan dɔɔ me dɔŋ nɛ man.

4 Kɛɛ na n kena nyi ŋolo be kyaa me dunoluŋ dɔɔ ya,

ŋolo be famenɛna maŋ ya.

Mɔɔ dana keyeu kagyoo ya,

ŋolo be famenɛna ma nyeedoŋ ya.

5 Degbeŋgyoo, mee wii baake neŋ,

me yakowɔ nyiaa, <<Nyaŋ yɛna ma keyeu kagyoo,

me wui dedii deni balaŋ tɛɛle dɔɔ.>>

6 Nyii me kewii baake,

nawolo nyi ma wose te kyaŋ maŋ nideli,

lɛɛ maŋ lee baŋ bee gegi maŋ nɛ nyiŋmaa man,

nawolo nyi be dana doŋ nideli kela maŋ.

7 Lese maŋ lee me kaale man,

na maa nyiŋ lese n yele.

Kenaŋ na baŋ ba tenɛɛ baa yilaa kilisi maŋ,

lee n deeli keŋ n be yɛɛ fa maŋ nɛ dɔɔ.