1 Weera dɔɔ te tɛɛlese ne bake nombiakumɛɛ,

te balaŋ ne bake nombia yakaa?

2 Tɛɛle kei dɔɔ gyooneŋ na koro,

te baŋ bee di balaŋ dɔɔ nɛ,

ne yɛɛ nɔɔ yilaa seŋ tia Degbeŋgyoo na balaŋ baŋ ɔ be tiu wɔ nuŋ nɛ nyiaa,

3 <<Ɛ yela dee tirii ba agbaraagbaraase ŋan,

na dɔɔ som wɔ bela ya.>>

4 Ŋon ɔ kyaa ɔ gyooro gbeli dɔɔ Adido nɛ na boŋo.

Degbeŋgyoo ne kulu wɔ.

5 Ɔ ne kalena wɔ baŋ man,

te ɔ ne ŋmaase wɔ ɔ baŋ nedoŋ man nyiaa,

6 <<Me ta see me gyoo

Siyɔn, me bula fereŋkyeŋ keŋ dɔɔ.>

7 Maa kolosi lee Degbeŋgyoo kawola keŋ wose man.

Ɔ yako maŋ nyiaa, <<Nyaŋ yɛna me bu,

gyɛŋ me ta bese n kya.

8 Bɔɔse maŋ,

na maa yela tɛɛlese pou ka bese n dedii,

na tɛɛle ɔto ka bese n wui.

9 Nyaŋ ka mo nyeele bibiini gbutu tekerii wɔ,

nyaŋ ke yɛlɛɛ wɔ bogobogo ŋgba saabu nɛ.>>

10 Mena dɔɔ, ɛmɛɛ gyooneŋ, ɛ sia dɛɛ kara,

ɛmɛɛ baŋ ɛ ne di tɛɛle dɔɔ nɛ, ɛ see deŋele.

11 Ɛ mo keyee som Degbeŋgyoo,

na ɛ ka mo wose keseree nyaŋee.

12 Ɛ buŋ ɔ bu ŋon, na mena ya na waa gyeŋ baŋ,

na ɛ gbɛɛneŋ ka mo ŋon gyu kewɔlɛɛ man,

nawolo nyi waa tale gyeŋ baŋ karatetee dokoloŋ.

Ɛmɛɛ baŋ ɛ ne yeu kagyoo e nɛ ɛmɛɛna nyeebam.