1 Degbeŋgyoo, nyii maŋ na n ke kpa maŋ,

nawolo nyi me yɛɛ diyemte e, te me nombia dana waraŋase.

2 Gyee ma nyee, nawolo nyi mee di anokoare fa neŋ,

lɛɛ n tobaale ŋon ɔ na mo ɔ wose lɔ n dɔɔ nɛ.

Nyaŋ yɛna me Wurubuarɛ,

3 Degbeŋgyoo, wii me waraŋase,

nawolo nyi nyaŋ te mɛɛ baake wee pou.

4 Degbeŋgyoo, yela n tobaale ke nyaŋee,

nawolo nyi mɛɛ mo me loo gyakaa n dɔɔ.

5 Degbeŋgyoo, n dei te n na mo nombia kyɛɛ,

n ne gyae baŋ pou bɛɛ baake neŋ nɛ nideli.

6 Degbeŋgyoo, nyii ma kefane,

tei me kasola.

7 Ma wose kekyaŋ man, me baake neŋ,

nawolo nyi n ne kpa maŋ.

8 Degbeŋgyoo, wurubuarɛse pou man na, ŋolo be kyaa ŋgba nyaŋ ya,

ŋolo be tale yɛɛ tomse ŋan nyaŋ ne yɛɛ nɛ ya.

9 Degbeŋgyoo, tɛɛlese baŋ pou n be yɛɛ nɛ,

baa kaa buŋ som neŋ,

na baa mo obuo fa n yele.

10 Nawolo nyi n boe, te n ne yɛɛ gyakoloŋ nombia,

nyaŋ nyaageŋ yɛna Wurubuarɛ.

11 Degbeŋgyoo, wola maŋ n gbɛɛneŋ,

na maa nyiŋ ta nya anokoare man,

yela maa mo me konɔɔ gyakaa nyaŋ nyaageŋ dɔɔ,

na maa nyiŋ yee n yele.

12 Degbeŋgyoo me Wurubuarɛ, maa mo me konɔɔ pou lese n yele,

maa kɛlɛɛ nya akelegyi kekpaakekpaa.

13 Nawolo nyi n ne gyae maŋ nideli,

nyaŋ lesena maŋ lee yeŋ man,

lee woyadɛɛ.

14 Wurubuarɛ, baŋ bɛɛ gate ba wose nɛ ne yoo maŋ,

akpanyanyaŋtena ne gyae baa ko maŋ,

bɔɔ ne kala neŋ do kolo man ya.

15 Mɔna nyaŋ Degbeŋgyoo yɛna Wurubuarɛ, ŋon n ne wii balaŋ te n na boele wɔ,

n bɛɛ gyeŋ baŋ bileŋbileŋ ya, balaŋ kegyae na anokoare kedi doo n man nideli.

16 Besena n sia kɛɛ maŋ, na n ke wii maŋ,

lese n doŋ wola n tobaale,

lɛɛ ma nyee nawolo nyi mɛɛ som neŋ,

ŋgba mena keŋ me naa be yɛɛ nɛ.

17 Yɛɛ kolo na ka wola nyi n ne gyae maŋ,

na me kɔlara kena na desɛŋ kekyaŋ wɔ,

nawolo nyi nyaŋ Degbeŋgyoo kyɔɔna maŋ te n fɛɛ me wɔe.