1 Me Wurubuarɛ, wii me waraŋase,

nawolo nyi me kɔlara te tɔ maŋ do,

wee kamasɛ na be gyakaa bee yoo maŋ.

2 Me kɔlara ne kuu kyaa me dɔɔ wee kamasɛ,

balaŋ burum ne yoona maŋ wose kegate man.

3 Nyi gyakoloŋ da gyoo maŋ na, mɛɛ mo ma wose lɔ n dɔɔ.

4 Wurubuarɛ ŋon mɛɛ kɛlɛɛ ɔ nɔɔwoya,

mɛɛ mo ma wose lɔ Wurubuarɛ dɔɔ te mɔɔ ne yee ya.

Woŋ yaa deniwalaŋ waa tale yɛɛ maŋ?

5 Wee kamasɛ na bee tulii me nɔɔwoya,

nyeempɔkum te bɛɛ moo lee ma wose man.

6 Bɛɛ yɛɛ nɔɔ yilaa bake ma nyeeman,

bɛɛ gyene me nawɔɔ kekulii,

gyakaa loo nyi baa ko maŋ.

7 Lee ba akpanyanyaŋ nombia dɔɔ,

wɔŋ ba deŋele tɔ kom,

O Wurubuarɛ, mo n baŋ wɔlɛɛ mena balaŋ benaŋ pou.

8 Ŋmarase me waraŋase kedi see,

mo me siasaraŋ do nyɔ ogele man.

Ŋa be doo n tɔne man yee?

9 Nyi me baake neŋ nyi nyaa kyɔ maŋ nɛ,

kenaŋ na me kɔlara baa bese be wɔle.

Botɔɔ te maa gyeŋ nyi Wurubuarɛ seŋɛɛ me wɔle.

10 Wurubuarɛ ŋon mɛɛ kɛlɛɛ ɔ nombii,

Degbeŋgyoo ŋon mɛɛ kɛlɛɛ ɔ nombia.

11 Wurubuarɛ dɔɔ te mɛɛ mo ma wose lɔ te mɔɔ ne yee ya.

Woŋ yaa walaŋ waa yɛɛ maŋ?

12 Ao me Wurubuarɛ, ma te sɛɛ kom fa neŋ,

maa tɔ me karaŋ kefa alaŋaŋ fa neŋ.

13 Nawolo nyi n te lɛɛ maŋ lee yeŋ man,

n te yele maa gyɔ me nae ya,

na maa ta Wurubuarɛ siaman,

nyeedoŋ keŋmaŋee keŋ man.