Alowɔle keyɛɛ nɔɔneŋ
1 Nombii kpaakpaa daale te wulu me konɔɔ,
keŋ mɛɛ gyae maa yako lee gyoo wose man,
me laakem gyae ke taŋee ŋgba ŋon ɔ gyeŋ keŋmarase nideli nɛ.
2 Nyaŋ leena tobiiri baala pou man,
n nɔɔ te kare nideli,
nawolo nyi Wurubuarɛ te hiraa neŋ kekpaakekpaa.
3 Nyaŋ baalebu, kpaŋ n yoosila n teŋa man,
na n ka do gyoorobiiri na yele kelɛɛ.
4 Mo n yele kelɛɛ ta gyu n siaman keyoodi man,
na n ke yoo lɛɛ anokoare na wose keyɔkɔse na nombia ŋan doona ŋe gbɛɛ,
yela n doŋ ka wola gyakoloŋ nombia.
5 Yela n baŋdaŋ nyeela ŋan na bee nideli nɛ ke sɔɔ gyoo kɔlara konɔɔse man,
yela tɛɛlese ke yala n nawɔɔtɛɛ.
6 Oo Wurubuarɛ, n gyoori gyae ke kyaa kekpaakekpaa,
n gyooro gbutu keŋ yɛɛ gyooro gbutu keŋ gyae ke di nombia kegbɛɛ dɔɔ.
7 N ne gyae katenee, te n ne kɔla akpanyanyaŋ,
mena dɔɔ te Wurubuarɛ n Wurubuarɛ moo kenyaŋee nuŋ tiu neŋ,
kela nya akoso pou.
8 Adudo na pɛperɛ na abɔɔ ofoŋnyiŋan na lee ofoŋ n kegbase man,
na n gyooro dekpaŋalaŋ keŋ bɔɔ mo tuukela desina ke nɛ man,
nɔɔneŋ ŋan bɛɛ mo adolɛɛse gyɔ nɛ ne yɛɛ neŋ gyoŋ.
9 Gyoo bia alebia kpuɛ ala baŋ be dana obuo nɛ man,
gyoo wɛɛle doona Ofiiri kɔba yayam abɔɔ ɔ seŋɛɛ n dunoluŋ dɔɔ.
10 Alebu, tei na n ka see deŋele nideli,
wolee n balaŋ na n kya dekpaŋalaŋmantena.
11 Yela gyoo kena n kyeo,
mo obuo fa e nawolo nyi ŋon yɛna n gbeŋgyoo.
12 Tirotena baa mo abɔɔ kefa kɔna neŋ,
baŋ be dana kɔba nɛ baa kɔŋ nyi nyaa wii wɔ.
13 Gyoo bu alebu waa gyoo ɔ deni man gyoorobiiri man,
kɔba yayam ŋmeeseŋ te ba moowɔ gbili ɔ kegba wurikyim keŋ.
14 Ɔ doona kegba keŋ ka loŋse yɛɛ kpookpoo,
ɔ tebia alebia keteŋse silana e,
te ba moo e gyina gyoo.
15 Ba moo kenyaŋee na gyoŋ kɔŋ,
kaa gyoo gyooro dekpaŋalaŋ keŋ man.
16 N bia tewulɛɛ baa kyaa be kyaɔ nawɔɔ man,
n ka mo wɔ see gyooneŋ tɛɛle keŋ pou dɔɔ.
17 Maa yela baa tɔɔse n yele kalola kegyakaare pou man,
mena dɔɔ tɛɛlese baa lese n yele kekpaakekpaa.
/images/a/WG5FS9VaSWVnVmV3VI8yP)
/images/a/a0208299-6f37-40a0-66e1-2576b9435f00)