1 Ɛ lese Degbeŋgyoo me kpanaŋ ŋon yele,

ɔ ne desina maŋ fa yoo,

ɔ na wola maŋ mena keŋ maa yoo.

2 Ŋon yɛna Wurubuarɛ ŋon ɔ ne gyae maŋ, na ma dekagya,

ma dekagya ŋon ɔ ne gyee maŋ na me lɛɛre,

me yoo nyeele pampasaŋ ŋon mee yeu kagyoo,

ŋon ɔ ne yɔkɔse tɛɛlese do me tɛɛ.

3 Degbeŋgyoo, balaŋ yɛna bomɔ te n ne kɛɛ be dɔɔ,

denibalaŋ yakaa keŋ n na gyueŋ be dɔɔ?

4 Be yɛɛ ŋgba weesɛɛ nɛ,

ba weeya yɛɛ ŋgba wɔŋtaa keŋ ne lam nɛ.

5 Degbeŋgyoo, bɛɛse adido man na n ke tisi kɔŋ tɛɛle man,

tina bulase ŋan, na ŋe ka lee nyɔɔse.

6 Yela ɔga keŋmaale ke yaasee kɔlara baŋ,

tɔ n baŋdaŋ nyeela na n ke yaasee wɔ.

7 Tenee n nyiŋmaa lee adido kɔŋ,

lese maŋ na n ke lɛɛ maŋ,

lee booneŋ dinaana man,

lee ŋɔɔla nyiŋmaase man.

8 Akɛrɛɛ te wulu be nɔɔse man,

be dunoluŋ nyiŋmaase na beo.

9 Me Wurubuarɛ, maa kpee nɔɔneŋ wɔle fa neŋ,

maa mo adolɛɛ ŋmeeseŋ kufute kpee nɔɔneŋ fa neŋ.

10 Fa nyaŋ ŋon n ne yele gyooneŋ ne yoodi,

nyaŋ lɛɛna n tobaale Dawide.

Lee yoosila kum nɔɔman. 11 lɛɛ maŋ,

lese maŋ lee ŋɔɔla nyiŋmaase man,

akɛrɛɛ te wulu be nɔɔse man,

be dunoluŋ nyiŋmaase na beo.

12 Kenaŋ na de bia tewulɛɛ tobiiritɛɛ,

gyae ke yɛɛ ŋgba daase ŋan ba bee nideli nɛ,

na de bia alebia ke yɛɛ ŋgba piilase,

ŋan bɔɔ yae baa mo desina gyooro dekpaŋalaŋ nɛ.

13 Weenɛɛ kpookpoo,

gyae ke wulu de kpeese man,

De namense baa lolee kakpoŋse,

na baa wuku kakpoŋ kakpoŋse de tɛɛle dɔɔ.

14 De nunkyuese baa lolee burum,

bɔɔ gyae baa lese tɔɔ ya,

bɔɔ kyaŋ daa yoogbeŋa bela ya,

bɔɔ gyae baa nyii waraŋsa kewii da abɔnterese man ya.

15 Balaŋ baŋ kei de kɔŋ mena fa wɔ na, baŋna nyeebam,

baŋ be Wurubuarɛ yɛna Degbeŋgyoo nɛ, baŋna nyeebam.