1 Degbeŋgyoo, maa mo me konɔɔ pou lese n yele,

maa kpee nɔɔneŋ lese n yele wurubuarɛse siaman.

2 Maa buŋ mo me sia tee nyɔ ɔsom deni dinaa fereŋkyeŋ keŋ,

na maa lese n yele,

lee n kegyae keŋ taŋ ɔto ya, na nya anokoare kedi dɔɔ,

nawolo nyi n te gyina n yele na n nombia adido,

kela kpene kamasɛ.

3 Me baake neŋ na, n kpaa maŋ,

n doo maŋ doŋ te ma seŋawɔ me nawɔɔ dɔɔ.

4 Degbeŋgyoo, akpaa tɛɛle kei dɔɔ gyooneŋ pou de nyii n nɔɔman nombia na,

baa lese n yele.

5 Baa kpee nɔɔneŋ lee ŋan Degbeŋgyoo be yɛɛ nɛ wose man,

nawolo nyi Degbeŋgyoo gyoorobiiri boe nideli.

6 Doo nyi Degbeŋgyoo kyaa adido adido koraŋ nɛ, ɔ ne kɛɛ baŋ bɛɛ yɔkɔse ba wose nɛ,

mɔna ɔ ne naa baŋ bɛɛ gate ba wose nɛ lee lemlem.

7 Nyi me dɔŋ wose kekyaŋ man koraŋ na,

n ne gyee ma nyee,

n na tenee n nyiŋmaa me kɔlara baŋ bɛɛ gyeŋ baŋ do maŋ nɛ dɔɔ,

n na mo n dunoluŋ nyiŋmaa lɛɛ maŋ.

8 Degbeŋgyoo waa yɛɛ keŋ ɔ be yakosee lee ma wose man nɛ fa maŋ,

Degbeŋgyoo, n kegyae doo kekpaakekpaa,

naa bɛɛ n nyiŋmaa man tomse ŋan ya.