1 Degbeŋgyoo, n te kɛo me man,

te n gyeŋ maŋ.

2 N gyeŋ me ke tisi kyaa na me ka koro,

n kyaa lemlem koraŋ na, n gyeŋ ma nyeempɔ man.

3 N na gyene me ka lee, na me ke tisi doo,

n gyeŋ me gbɛɛneŋ keta man pou.

4 Degbeŋgyoo, pɛ nombii ka lee me nɔɔman nɛ,

na nyaŋ wulaa n gyeŋ ke pou.

5 N te kilisi maŋ me siaman na me wɔle pou,

te n moo n nyiŋmaa doŋte keŋ gyakaa me dɔɔ.

6 Mena nombia kagyeŋ kei dana maŋ gyakoloŋ nideli,

ke dana yuŋ keŋ mɔɔ tale nyii ke man ya.

7 Aleŋ yaa maa lee n feliŋ ŋon gyaŋ gyu?>

Aleŋ yaa maa yeu lee n siaman gyu?

8 Nyi akpaa ma gyem gyu adido na, n kyaa botɔɔ,

nyi akpaa me lɔ ma dofoŋoŋ woyadɛɛ koraŋ na. n kyaa botɔɔ.

9 Nyi akpaa me karatɛɛ nebo nebo furufu,

gyu ke kyaa ɛpo ɔto koraŋ na,

10 n nyiŋmaa gyae ke sila maŋ gyu botɔɔ,

n dunoluŋ nyiŋmaa gyae ke kyaŋ maŋ keŋkeŋ.

11 Akpaa me yako nyi, <<Detiŋtɛɛ gyae ka weese maŋ,

te keŋmaŋee da bese nelim kilisi maŋ nɛ,>>

12 detiŋtɛɛ kenaŋ koraŋ be gyae ke yɛɛ detiŋtɛɛ fa neŋ ya,

nelim kenaŋ gyae ke ŋmaŋee ŋgba tɛɛkena nɛ,

nawolo nyi detiŋtɛɛ yɛɛ ŋgba keŋmaŋee nɛ fa neŋ.

13 Nawolo nyi nyaŋ yɛɛna ma wose man abɔɔ pou,

nyaŋ maana maŋ me naa tɔɔman.

14 Mɛɛ lese n yele nawolo nyi n yɛɛ maŋ bo keyee na gyakoloŋ gbɛɛ man.

N tomse dana gyakoloŋ,

te ma gyeŋ ke nideli.

15 Debaŋ keŋ bɔɔ yɛɛ maŋ daweesee man,

te bɔɔ yilaa maŋ me naa tɔɔman nɛ,

na me ŋɔɔ ba weesɛɛ neŋ ya.

16 N sia naa maŋ pɛte ma bese walaŋ,

ba te ŋmarase ma weeya ŋan maa di pou do n tɔne man,

pɛte ŋe man dokoloŋ gba kɔŋawɔ.

17 Wurubuarɛ, n nyeempɔ na lee koya fa maŋ nideli,

ŋolo na ŋolo be tale kala ŋa ya.

18 Nyi me yako maa kala ŋa nɛ,

ŋe gyae ka bo kela aŋasa,

nyi me fom na, me sɛɛ me kyaa n gyaŋ.

19 Wurubuarɛ, ma kegyae yɛna nya ko akpanyanyaŋtena,

ɛ lee me gyaŋ ɛmɛɛ baŋ ɛ na koe balaŋ.

20 Bee kolosi nombia kumɛɛ lee n wose man,

n kɔlara na mo n yele yɛɛ nombiakumɛɛ.

21 Degbeŋgyoo, mɔɔ ne kɔla baŋ bɛɛ kɔla neŋ yee?

baŋ bɛɛ seŋ tia neŋ nɛ nombia bɛɛ yɛɛ maŋ duwaare yee?

22 Mɛɛ kɔla wɔ nideli,

mɛɛ kɛɛ wɔ nyi be yɛɛ me kɔlarawɔ.

23 Wurubuarɛ, kɛo me man na n ka gyeŋ me konɔɔ man,

kɛɛse maŋ kɛɛ, na n ka gyeŋ ma nyeempɔ man.

24 Kɛɛ nyi mberem nombiikum daale doo me man,

na n ka mo maŋ ta gbɛɛ keŋ doo kekpaakekpaa nɛ man.