1 Ɛ kpee nɔɔneŋ wɔle fa Degbeŋgyoo,

nawolo nyi ɔ te yɛɛ gyakoloŋ nombia,

ɔ dunoluŋ nyiŋmaa na ɔ bam fereŋkyeŋ keŋ,

te yele ɔ te yoodi.

2 Degbeŋgyoo ta lese ɔ nyeekelɛɛ wola,

te ɔ lese ɔ katenee wola tɛɛlese balaŋ.

3 Ɔ te tɔɔse ɔ kegyae,

na wa anokoare kedi fa ɔ balaŋ Iseraetena.

Tɛɛle ɔto pou naa,

de Wurubuarɛ nyeekelɛɛ.

4 Tɛɛle pou ɛ nyaŋee fae yeesa fa Degbeŋgyoo,

ɛ fae yeesa kpee kenyaŋee nɔɔneŋ lese ɔ yele.

5 Ɛ mo adolɛɛ kpee nɔɔneŋ fa Degbeŋgyoo,

adolɛɛ na nɔɔneŋ kekpee dee wii.

6 Ɛ wola kaberɛse na nambaale woi,

ɛ fae yeesa nyaŋee Degbeŋgyoo Gyoo ŋon siaman.

7 Ɛpo na ŋan pou doo ke man nɛ dɛɛ fae,

tɛɛle na baŋ pou be kyaa ke man nɛ.

8 Ɛ yela booneŋ ke gyɔ ŋe nyiŋmaase,

ɛ yela bulase pou ke yɛɛ nɔɔ nyaŋee kpee nɔɔneŋ.

9 Baa kpee nɔɔneŋ Degbeŋgyoo siaman,

nawolo nyi ɔ ne kɔŋ ɔ kaa di tɛɛle nombia.

Waa di tɛɛle nombia kegbɛɛ dɔɔ,

na waa di balaŋ nombia kyɛɛkyɛɛ.