1 Maa hiraa Degbeŋgyoo debaŋ kamasɛ,

maa mo me nɔɔ lese ɔ yele kekpaakekpaa.

2 Degbeŋgyoo dɔɔ te mɛɛ gyɔ konɔɔ,

ŋon ɔ ne naa diyem nɛ, waa nyii na waa nyaŋee.

3 Ɛ kpuna maŋ na dɛɛ lese Degbeŋgyoo yele,

ɛ yela dɛɛ yɛɛ nɔɔ gyina ɔ yele adido.

4 Me baake Degbeŋgyoo, te ɔ kpaa maŋ,

ɔ lese maŋ lee me gyakoloŋ pou man.

5 Baŋ be sia gyakaa ɔ dɔɔ nɛ siagbɛɛ ŋmaŋɛɛ,

desɛŋ be gyae ke kyaŋ wɔ ya.

6 Diyemte kei baakewɔ, te Degbeŋgyoo nyii e,

ɔ lese e lee ɔ wose kekyaŋ pou man.

7 Degbeŋgyoo kpilare ne gyee baŋ bee yee e nɛ,

te ɔ ne lɛɛ wɔ.

8 Ɛ gyoo ɔ man kɛɛ na, ɛ kena nyi Degbeŋgyoo dei,

ŋon ɔ ne yeu kagyoo e nɛ, ŋonna nyeebam.

9 Ɛmɛɛ Degbeŋgyoo balaŋ fereŋkyeŋ ɛ yee e,

nawolo nyi kolo bee hia baŋ bee yee e nɛ ya.

10 Tanam gyae ka ko dinaate bia na ba te gbalase,

mɔna baŋ bɛɛ mo ba wose lɔ Degbeŋgyoo dɔɔ nɛ, kolo kpaakpaa kamasɛ be gyae ke hia wɔ ya.

11 Me bia, ɛ kɔŋ, ɛ tei maŋ,

na maa wola ŋon Degbeŋgyoo keyee.

12 Ɛ man ɔkamasɛ ŋon ɔ ne gyae nyeedoŋ,

na waa kyaa kyare na,

13 waa do ɔ laakem dokɔŋ lee nombiakumɛɛ man,

na ɔ nɔɔ lee akɛrɛɛ kedi man.

14 Wɔŋ n wose lee dukum man, na n ke yɛɛ deeli,

kɛo wosefɛɛreŋ na n ke sila ke.

15 Degbeŋgyoo sia gyakaa baŋ ba tenɛɛ nɛ dɔɔ,

te ɔ deŋela ne nyii be kewii.

16 Mɔna Degbeŋgyoo ne yase ɔ sia do baŋ bɛɛ yɛɛ nombiakumɛɛ nɛ,

nyi waa munu wɔ lee tɛɛle dɔɔ, keŋ ŋolo be tɔɔse wɔ bela ya.

17 Baŋ be tenɛɛ nɛ ne wii baake, na Degbeŋgyoo te nyii wɔ,

ɔ na lese wɔ lee be kaale pou man.

18 Degbeŋgyoo benaana baŋ bɔɔ yala koyololo nɛ,

te ɔ ne lɛɛ baŋ bɔɔ dana loo kegyakaa ya nɛ.

19 Walaŋ ŋon ɔ tenɛɛ nɛ kaale boe,

mɔna Degbeŋgyoo na lese e lee ŋe popou man.

20 Ɔ ne gyee ɔ ŋɔɔ pou,

ŋe man dokoloŋ gba be tekeri ya.

21 Dukum gyae ka ko akpanyanyaŋte,

baa wɔlɛɛ baŋ bɛɛ kɔla ŋon ɔ tenɛɛ nɛ.

22 Degbeŋgyoo waa lɛɛ ɔ tewulɛɛ,

ɔ be gyae waa bu ŋon ɔ ne yeu kaa gyoo e nɛ fɔɔ ya.