1 Degbeŋgyoo, naa kalena maŋ n baŋ man

yaa n ka mo n baŋ nedoŋ wɔŋ ma deŋele ya.

2 N baŋdaŋ nyeela te sɔkee maŋ,

te n baam gyɔɔ maŋ lɔ.

3 Lee n baŋ dɔɔ ma wose be dana maŋ doŋ ya,

lee me dukum dɔɔ, doŋ be doo me ŋɔɔ man ya.

4 Me dukum ta bese kasolɔ ma nyee dɔɔ,

ŋgba kasolɔ yuŋte keŋ mɔɔ tale seele ya nɛ.

5 Me gyamɛɛ ta poŋporoŋ na lee wɔŋ,

lee me nombiakumɛɛ dɔɔ.

6 Me te tisi buŋ te ma teneewɔ doo tɛɛle man,

wee dibiliŋ pou na me dɔŋ mee di waraŋsa.

7 Kpaŋalaŋ te gyɔ maŋ te ma wose pou na wee maŋ,

kawee dana maŋ nideli.

8 Ma te yɔkɔse te doŋ be doo me man ya,

mɛɛ keketee nawolo nyi mee nyii weeleŋ me konɔɔ man.

9 Degbeŋgyoo, n gyeŋ ŋan pou mɛɛ gyae,

n ne nyii me kakeŋee.

10 Me wɔe ne lɔ maŋ, te me doŋ mɔ te taŋ,

detiŋtɛɛ gba ta gyoo me sia.

11 Me gyamɛɛ dɔɔ me gyoona na me dɔɔna te bɛɛ maŋ,

ma loŋtona mɔ bɛɛ tekaa benaa maŋ ya.

12 Baŋ bɛɛ gyae baa ko maŋ nɛ te nyɔɔ maŋ kɔtase,

baŋ bɛɛ gyae maŋ dukum nɛ ne kolosi lee ma kewɔlɛɛ man,

wee dibiliŋ pou na bɛɛ bake ma nyeeman di dekara.

13 Me yɛɛ ŋgba deŋela atɔɔsate ŋon ɔ bee nyii ya,

yaa ŋgba omumuu ŋon ɔ be tale kolosi ya nɛ.

14 Ma te yɛɛ ŋgba walaŋ ŋon ɔ bee nyii ya,

te ɔ be tale tiranɔɔ ya nɛ.

15 Mɔna Degbeŋgyoo, mɛɛ kɛɛ n siaman,

Degbeŋgyoo me Wurubuarɛ, nyaŋ ne gyaela n ke tiranɔɔ fa maŋ.

16 Nawolo nyi me yakowɔ nyiaa, <<Nyi akpaa me sarakee nɛ,

naa yela baa nyaŋee yaa baa gate ba wose me dɔɔ ya.>>

17 Nawolo nyi mɛɛ gyae maa lee yala,

mee nyii weeleŋ debaŋ kamasɛ.

18 Me ta toro me nombiakumɛɛ keyɛɛ yako,

ta wee maŋ ŋgba mɔɔ yɛɛ dukum nɛ.

19 Balaŋ burum te kaa bese me kɔlara keŋ ma te yɛɛ wɔ kolo ya,

baŋ bɛɛ kɔla maŋ yakaa nɛ boe nideli.

20 Baŋ bɛɛ mo dukum tɔ maŋ me deeli keyɛɛ kom nɛ,

ne kɛrɛɛ nombia gyakaa me dɔɔ,

keŋ mɛɛ gyae maa yɛɛ nombia kpaakpaa dɔɔ.

21 Degbeŋgyoo, naa bɛɛ maŋ ya,

me Wurubuarɛ, naa kyaana lem lee me gyaŋ ya.

22 Me Gbeŋgyoo na ma nyeelɛɛre,

kɔŋ bileŋ na n kaa kyɔ maŋ.