1 Ke dei nyi baa lese Degbeŋgyoo yele,

Ao Adidote, dei nyi baa kpee nɔɔneŋ lese n yele.

2 Baa gyɔ n kegyae keŋ dekpeŋkpeŋ nebo,

na nya anokoare kedi nelim,

3 adolɛɛ ŋmeeseŋ kufute,

na akyakaa nɔɔneŋ dɔɔ.

4 Nawolo nyi Degbeŋgyoo, nya ayɛɛsa dana maŋ gyoŋ.

Me kpee nɔɔneŋ nyaŋee lee n nyiŋmaa man tomse dɔɔ.

5 Degbeŋgyoo, n tomse boe nideli,

n nyeempɔ man nombia dana siiliŋ.

6 Baŋ bɔɔ gyeŋ nombia ya nɛ ba gyeŋ ya,

ayiŋtena bee nyii nombia man ya,

7 nyi akpanyanyaŋtena da potee ŋgba ŋalese,

te nombiakumɛɛ yɛɛra de nyiŋ ba wose ŋgba kyeŋkyeŋkɔɔse koraŋ nɛ,

baa wɔlɛɛ wɔ kekpaakekpaa.

8 Mɔna Degbeŋgyoo, n kerɛɛ kekpaakekpaa.

9 Ao Degbeŋgyoo, kɛɛ n kɔlara,

ampaŋ n kɔlara baa munu,

nombiakumɛɛ yɛɛra pou baa yaasee.

10 N te yele me te nyiŋ doŋ ŋgba ŋale man nam nɛ,

n ta mo nuŋ kpaakpaa woli maŋ.

11 Me sia te naa mena keŋ mɔɔ di me kɔlara dɔɔ,

ma deŋela te nyii akpanyanyaŋtena baŋ bɔɔ seŋ tia maŋ nɛ yeesa.

12 Baŋ ba tenɛɛ nɛ baa nyiŋ ba wose ŋgba baa nɛ,

baa bee ŋgba Lebanɔn sida daase,

13 ŋan bɔɔ duu Degbeŋgyoo dekpaŋalaŋ man nɛ,

baa nyiŋ ba wose de Wurubuarɛ dekpaŋalaŋ man.

14 Baa se bia ba keŋmɛ man,

baa yɛɛ ŋgba daase nalaŋ nɛ.

15 Na kawola nyi Degbeŋgyoo gbɛɛneŋ tenɛɛ,

ŋon yɛna me kpanaŋ, te akpanyanyaŋ be doo ɔ man ya.