1 Me dana nombii daale me konɔɔ man keŋ lee Wurubuarɛ gyaŋ,

lee akpanyanyaŋte dukum keyɛɛ wose man,

Wurubuarɛ keyee

be doo be man ya.

2 Baŋ gbagba gyaŋ na bee gyina ba wose

beiŋ keŋ bɔɔ ne naa yaa baa kɔla dukum ya.

3 Be nɔɔman nombia yɛɛ akpanyanyaŋ na akɛrɛɛ bo,

ba te bɛɛ nyansa nombia na nombia kpaakpaa keyɛɛ yela.

4 Be doo ba afoŋoŋse dɔɔ koraŋ na bɛɛ bake nombiakumɛɛ,

bɛɛ mo ba wose do nombiakumɛɛ keyɛɛ man,

bɔɔ ne bɛɛ kpene keŋ be dei nɛ ya.

5 Degbeŋgyoo, n balaŋ kegyae ne lii adido adido,

nya anokoare kedi mɔ ne lii ŋɔma man.

6 N katenee yɛɛ ŋgba bula keŋ ka korɛɛ kela bulase pou nɛ,

n nombia kedi kegbɛɛ dɔɔ yɛɛ ŋgba ɛpo siiliŋ nɛ,

Degbeŋgyoo nyaŋ ne kɛɛna balaŋ na wonembia pou dɔɔ.

7 Ao Wurubuarɛ, n balaŋ kegyae keŋ taŋ ɔto ya nɛ na lee koya nideli.

Balaŋ ne yeu kaa gyoo n beŋkelɛɛ wuluŋ man.

8 Bee di be nɔɔ lee weenɛɛ ŋan be gbigi n dekpaŋalaŋ man nɛ dɔɔ,

n ne fa wɔ loŋ bɛɛ nyɔɔ lee n kenyaŋee boo keŋ man.

9 Nyaŋ yɛna nyeedoŋ pou nyee,

n keŋmaŋee man te dɛɛ naa keŋmaŋee.

10 Gyae baŋ ba gyeŋ neŋ nɛ debaŋ kamasɛ,

na n ke yɛɛ katenee fa baŋ be konɔɔse man dei nɛ.

11 Naa yele baŋ bee gyina ba wose adido nɛ nae kaa tia maŋ,

yaa akpanyanyaŋte nyiŋmaa ke gegi maŋ ya.

12 Kɛɛ mena keŋ balaŋ kumɛɛ be yale be doo,

Be te fuŋ wɔ lɔ keŋ bɔɔ ne tale baa koro ya!