1 Degbeŋgyoo, maa fa neŋ karaŋ lee me konɔɔ man.

Maa yako gyakoloŋ nombia ŋan pou n be yɛɛ nɛ.

2 Gyae ke yɛɛ maŋ gyoŋ na maa nyaŋee lee n yele man,

Ao Degbeŋgyoo Adidote, maa kpee nɔɔneŋ lese n yele.

3 Me kɔlara ta bese be wɔle,

ba leewɔ yala te ba yekeewɔ n siaman.

4 Nawolo nyi n ta lese me nombia ŋan doona ke gbɛɛ nɛ wola,

n kyaawɔ n gyoorogbeli dɔɔ di nombia katenee man.

5 N te kalena tɛɛlese te n wɔlɛɛ nombiakumɛɛ yɛɛra,

n ta feefo ba yela kekpaakekpaa.

6 Me kɔlara te munu kekpaakekpaa,

be donɔɔse dinaana pou te wɔlɛɛ,

ŋolo bɛɛ tɔɔse wɔ bela ya.

7 Degbeŋgyoo ne diina gyoori kekpaakekpaa,

ɔ ta see ɔ gyoorogbeli waa di nombia.

8 Ɔ ne di tɛɛle kei dɔɔ katenee man,

ɔ ne di balaŋ nombia kyɛɛkyɛɛ.

9 Degbeŋgyoo yɛna baŋ bɛɛ ŋere wɔ do nɛ keyeu kagyoo,

ŋon yɛna baŋ ba wose be kyaŋ wɔ nɛ keyeu kagyoo.

10 Baŋ ba gyeŋ n yele nɛ na mo ba wose lɔ n dɔɔ,

nawolo nyi nyaŋ Degbeŋgyoo, n te bɛɛta baŋ bɛɛ kɛo neŋ nɛ ya.

11 Ɛ kpee nɔɔneŋ lese Degbeŋgyoo ŋon ɔ ne di gyoori Siyɔn nɛ yele,

ɛ yako tɛɛlese abɔɔ ŋan ɔ be yɛɛ nɛ.

12 Ɔ ne wɔŋ baŋ bɛɛ koe balaŋ nɛ deŋele,

te ɔ bee wolee baŋ bɛɛ naase wɔ diyem nɛ kewii baake ya.

13 Ao Degbeŋgyoo, wii me waraŋase,

kɛɛ mena keŋ me kɔlara ne naase maŋ diyem,

lese maŋ lee yeŋ anaanɔɔse man,

14 na maa nyiŋ kolosi lee n yele kalese

Siyɔn alebu ŋon anaanɔɔse man,

na maa nyaŋee lee n nyeekelɛɛ dɔɔ.

15 Tɛɛlese te yale gyoo bɔɔ keŋ bɔɔ wulu nɛ man,

te be nawɔɔ ka gyoowɔ kɔta keŋ baŋ gbagba be nyɔɔ weese nɛ man.

16 Degbeŋgyoo ta lese ɔ wose wola lee ɔ nombia kedi kegbɛɛ dɔɔ man,

te balaŋ kumɛɛ nyiŋmaa man tomse besenaa kɔta kyaŋ baŋ gbagba.

17 Balaŋ kumɛɛ baa tisi gyu woyadɛɛ,

tɛɛlese baŋ pou bɔɔ wolee Wurubuarɛ nɛ.

18 Mɔna Wurubuarɛ be gyae waa wolee ayematena korakora ya,

baŋ bɛɛ naase wɔ diyem nɛ lookegyakaa be gyae ke yɛɛ yakaa ya.

19 Ao Degbeŋgyoo koro, naa yele denibalaŋ ke yoodi ya,

yela baa di tɛɛlese nombia n siaman.

20 Ao Degbeŋgyoo, yela gyakoloŋ ka gyoo wɔ,

yela tɛɛlese ka gyeŋ nyi, be yɛɛ denibalaŋ yakaa.