Nɔɔneŋ 58

Kefane fa Wurubuarɛ na waa wɔŋ kɔlara deŋele

1 Ɛmɛɛ kegyiise ne kolosi nombii na anokoare?

Ɛ ne di balaŋ nombia kegbɛɛ dɔɔ?

2 Koa, ɛ konɔɔse man na ɛ ne tulii nombia,

te ɛ na mo ɛ nyiŋmaase do awudiini nombia keyɛɛ man tɛɛle dɔɔ.

3 Akpanyanyaŋtena yoo gbɛɛ leenaŋ dokyoa man,

leenaŋ be naɔ tɔɔman te ba yoo gbɛɛ bee dii akɛrɛɛ.

4 Be dana teekum ŋgba dom wui nɛ,

ŋgba wurale ŋon ɔ be gate ɔ nyee nɛ.

5 Ɔ bee nyii teete koraŋ kefae ya,

be famenɛ na mena keŋ ɔ gyeŋ kekaŋtee ya.

6 Ao Wurubuarɛ, tekerii be kela be nɔɔse man,

Ao Degbeŋgyoo, kulii dinaatese benaŋ kela.

7 Yela baa yo ŋgba loŋ keŋ be lam nɛ,

akpaa be wɔŋ be baŋdaŋse na, tekerii ŋa nyeela ŋan nɔɔse.

8 Yela baa yɛɛ ŋgba dowelee ŋon ɔ detɛe ba yoo nɛ,

ŋgba biikyaa ŋon bɔɔ lese e tɔɔ, keŋ ɔ te naa weese ya nɛ.

9 Pɛna sɔɔse ke kpa laŋe saabuse nɛ,

yela baa gberaa wɔ leki ŋgba ŋalese nalaŋ yaa awolɛɛ ŋan ne kpaa nɛ.

10 Nyi n tɔ akpanyanyaŋtena kom,

te baŋ ba tenɛɛ de tɛɛ be fatabo man nɛ, gyae ke yɛɛ wɔ gyoŋ.

11 Kenaŋ na balaŋ baa yako nyiaa,

<<Ampaŋ bɛɛ tɔ baŋ ba tenɛɛ nɛ kom,

ampaŋ Wurubuarɛ ŋolo kyaa keŋ ɔ ne di nombia tɛɛle kei dɔɔ.>>