1 Ɛmɛɛ baŋ ɛ tenɛɛ nɛ ɛ mo kenyaŋee kpee nɔɔneŋ fa Degbeŋgyoo.

Kaboena nyi baŋ be dei nɛ baa lese ɔ yele.

2 Ɛ mo adolɛɛ lese Degbeŋgyoo yele,

ɛ mo adolɛɛ keŋ ke dana ŋmeeseŋ kufu nɛ kpee nɔɔneŋ fa e.

3 Ɛ kpee nɔɔneŋ wɔle fa e,

ɛ mo adao gyɔ adolɛɛ keŋ na ɛ ka mo kenyaŋee fae yeesa.

4 Nawolo nyi Degbeŋgyoo nɔɔwoya doona ke gbɛɛ, te ŋe yɛɛ anokoare,

ɔ ne di anokoare lee ŋan pou ɔ ne yɛɛ nɛ man.

5 Degbeŋgyoo ne gyae katenɛɛ na keŋ doona kegbɛɛ,

ɔ kegyae keŋ taŋ ɔto ya nɛ te lɛɛ tɛɛle pou.

6 Nɔɔwoya te Degbeŋgyoo moowɔ yɛɛ adido,

ɔ nɔɔman weesɛɛ te ɔ moowɔ yɛɛ adido abɔɔ pou.

7 Ɔ yilaa ɛpo loŋse pou see debodokoloŋ,

ɔ moo siiliŋ see wa abɔɔ dɛɛsee man.

8 Tɛɛle kei pou baa yee Degbeŋgyoo,

tɛɛle kei dɔɔ balaŋ pou baa mo obuo fa e.

9 Nawolo nyi ɔ kolosiwɔ te kɔŋawɔ mena,

ɔ faewɔ do te ka seŋawɔ keŋkeŋ.

10 Degbeŋgyoo ne wɔlɛɛ nombia ŋan tɛɛlese ne bake nɛ,

ɔ ne yele ŋan bɔɔ bake nyi baa yɛɛ nɛ ne yɛɛ yakaa.

11 Mɔna ŋan Degbeŋgyoo be bake nɛ kyaa kekpaakekpaa,

ɔ konɔɔ man nombia doo fa kalola kegyakaare pou.

12 Tɛɛlese baŋ be Wurubuarɛ yɛna Degbeŋgyoo,

na balaŋ baŋ ɔ ba lese wɔ nyi baa yɛɛ ɔ dedii nɛ baŋna nyeebam.

13 Degbeŋgyoo ne kɛɛ lee adido,

ɔ ne naa denibalaŋ pou.

14 Ɔ kyaa ɔ dekyae man adido,

ɔ ne naa balaŋ baŋ pou be kyaa tɛɛle dɔɔ nɛ.

15 Ŋon yɛɛna walaŋ kamasɛ konɔɔ,

ɔ ne naa ŋan pou bɛɛ yɛɛ.

16 Gyoo ŋolo keyoodi be doo ɔ yoonɔɔtena burum man ya,

yoonɔɔte doŋ be tale yela waa yoodi ya.

17 Loo kegyakaa be doo nyi dɛɛkyɔŋ waa lɛɛ neŋ ya,

keŋ na ɔ doŋ koraŋ ɔ be gyae waa tale lɛɛ neŋ ya.

18 Mɔna Degbeŋgyoo sia gyakaa baŋ bee yee e,

na baŋ be loo gyakaa ɔ kegyae keŋ taŋ ɔto ya nɛ dɔɔ,

19 nyi waa lɛɛ wɔ lee yeŋ man,

na waa yela baa nyiŋ nyeedoŋ tanam keyala man.

20 De loo gyakaa Degbeŋgyoo dɔɔ,

ŋon yɛna de kyɔɔre na de yoo nyeele pampasaŋ.

21 Ɔ man te de konɔɔse ne nyaŋee,

nawolo nyi de ta mo da wose lɔ ɔ yele fereŋkyeŋ keŋ dɔɔ.

22 Degbeŋgyoo, yela n kegyae keŋ taŋ ɔto ya nɛ, ke kyaa de man,

ŋgba mena keŋ de loo gyakaa n dɔɔ nɛ.