1 Ao Wurubuarɛ, naa kyaa yididi ya,

naa tɔ n deŋela ya,

Ao Wurubuarɛ, naa kyaa yakaa ya.

2 Kɛɛ mena keŋ n kɔlara ne di deboŋ,

kɛɛ mena keŋ n kɔlara ne gyina ba nyeeya.

3 Bɛɛ mo adao gbɛɛ bake n balaŋ nyeeman,

bɛɛ bake mena keŋ baa di baŋ n ne gyee wɔ nɛ dɔɔ.

4 Bɛɛ yako nyiaa, <Ɛ kɔŋ, na dee munu balaŋ baŋ,

na ŋolo be tɔɔse Iserae yele bela ya.

5 Bɛɛ yɛɛ nɔɔdokoloŋ bake,

bɛɛ bake n nyeeman.

6 Baŋ yɛna Ɛdomtena na Isimaeletena,

na Moabetena na Hagaritena,

7 Gebaletena na Amonitena na Amaleketena,

Filisitena na Tirotena.

8 Asiriyatena mɔ te gyu ke kpuna wɔ,

na baa do Lɔte duuluŋmantena doŋ.

9 Yɛɛ wɔ ŋgba mena keŋ n be yɛɛ Midiatena,

na Siseratena na Yabinetena Kison boo nɔɔman nɛ.

10 N munu wɔ Endore,

te ba bese woŋsila tɛɛle dɔɔ.

11 Yɛɛ be gyoorobia ŋgba n ke yɛɛ Orebo na Seebe nɛ,

be gyooneŋ ŋgba Seba na Salemuna nɛ.

12 Bɛɛ yako nyi, <Ɛ yela dɛɛ mo,

Wurubuarɛ tɛɛle keŋ bese de dedii.

13 Me Wurubuarɛ, yɛɛ wɔ ŋgba koloŋoloŋ man akuŋkuŋ nɛ,

ŋgba wura te feliŋ gyɔɔwɔ nɛ.

14 Mena keŋ boalaŋ ne kpa laa,

yaa boalaŋ laakemse ne yele bulase ne kpaa nɛ,

15 mena te mo n feliŋkum gyakaa be dɔɔ,

na n ka mo n feliŋ nɔɔdoŋte keŋ ŋmaase wɔ.

16 Degbeŋgyoo, yela desɛŋ ke kyaŋ wɔ,

na baa nyiŋ sila n yele gbɛɛ.

17 Yela desɛŋ ke kyaŋ wɔ, na ba wose ke gbirisi wɔ kekpaakekpaa,

na baa munu ba desɛŋ man.

18 Yela baa gyeŋ nyi nyaŋ ŋon n yele yɛna Degbeŋgyoo nɛ,

nyaŋ nyaageŋ yɛna Adidote tɛɛle kei pou dɔɔ.