1 Ɛ fa Degbeŋgyoo karaŋ, nawolo nyi ɔ dei,

te ɔ kegyae mɔ kyaa kekpaakekpaa.

2 Yela baŋ Degbeŋgyoo be lɛɛ ba nyee nɛ ke yako be nombia,

baŋ ɔ be lɛɛ ba nyee lee be kɔlara nyiŋmaa man.

3 baŋ ɔ be yilaa lee tɛɛlese man,

lee weese dɛɛlee na weese dɛɛyalae, lee ado yenaŋ na ata yenaŋ.

4 Be man baale tɛɛwɔ yeyɛɛ depampaa ŋɛŋerɛŋɛɛ man,

be te nyiŋ gbɛɛ gyu donɔɔ dinaa daale man be kaa kyaa ya.

5 Tanam na loŋboaneŋ koo wɔ,

te be gbalasewɔ nideli.

6 Be wiiwɔ baake Degbeŋgyoo lee ba wose kekyaŋ man,

te ɔ lese wɔ lee be kaale man.

7 Ɔ moo wɔ ta gbɛɛ keŋ tenɛɛ nɛ dɔɔ,

gyu donɔɔ dinaa keŋ baa kyaa ke man nɛ.

8 Ɛ yela baa fa Degbeŋgyoo karaŋ lee ɔ kegyae keŋ be taŋ ɔto ya,

na ɔ gyakoloŋ nombia ŋan ɔ be yɛɛ fa denibalaŋ dɔɔ.

9 Nawolo nyi ɔ ne fa baŋ loŋboaneŋ na ko wɔ nɛ loŋ,

te ɔ ne fa baŋ tanam na ko wɔ nɛ abɔɔ kpaakpaa.

10 Baale kyaawɔ detiŋtɛɛ na detiŋtɛɛ tuum man,

be tɔɔ wɔ deni te be doowɔ nyeela akyakaase man naa diyem,

11 nawolo nyi ba korowɔ seŋ tia Wurubuarɛ nombia,

te be ta mo Adidote ŋon kawola yɛɛ kolo ya.

12 Mena dɔɔ ɔ ŋere wɔ yela be yɛɛ tom nedoŋ naa diyem,

be kpaŋtewɔ yala keŋ ŋolo be kyaa waa kyɔ wɔ ya.

13 Keŋte be wiiwɔ baake Degbeŋgyoo lee be kayeyɛɛ man,

te ɔ lɛɛ wɔ lee ba wose kekyaŋ man.

14 Ɔ lese wɔ lee detiŋtɛɛ na detiŋtɛɛ tuum man,

te ɔ tekerii ba agbaragbarase ŋan.

15 Ɛ yela baa fa Degbeŋgyoo karaŋ lee ɔ kegyae keŋ taŋ ɔto ya,

na ɔ gyakoloŋ nombia ŋan ɔ ne yɛɛ fa denibalaŋ nɛ dɔɔ.

16 Nawolo nyi ɔ te tekerii kɔbere anaanɔɔse,

te ɔ kɛrɛɛ ŋa nyeela bibiina ŋan man aguŋ aguŋ.

17 Baale bese ayiŋtena lee ba deŋele doŋ dɔɔ,

te be naa diyem nideli lee be nombiakumɛɛ dɔɔ.

18 Weenɛɛ kamasɛ dana wɔ duwaare,

te ba benaa yeŋ denaanɔɔ.

19 Keŋte be wiiwɔ baake Degbeŋgyoo lee ba wose kekyaŋ man,

te ɔ lɛɛ wɔ lee be kayeyɛɛ kenaŋ man.

20 Ɔ kpila ɔ nombii ke kyɔɔ wɔ be kaweese,

ɔ lese wɔ lee yebɔɔ man.

21 Ɛ yela baa fa Degbeŋgyoo karaŋ lee ɔ kegyae keŋ taŋ ɔto ya,

na gyakoloŋ nombia ŋan ɔ ne yɛɛ fa denibalaŋ dɔɔ.

22 Ɛ yela baa yɛɛ karaŋ kefa kedeesa,

na baa kpee kenyaŋee nɔɔneŋ yako ɔ tomse ŋan ɔ be yɛɛ nɛ.

23 Baale kyaawɔ pantuuse dinaana man ɛpo dɔɔ,

di kebu booneŋ dinaana dɔɔ.

24 Be naa Degbeŋgyoo tomse,

ɔ gyakoloŋ nombia ŋan ɔ be yɛɛ ɛpo ateta.

25 Nawolo nyi ɔ kolosiwɔ te feliŋ dinaa gyɔɔwɔ,

te yelaa ɛpo kegyɔ korowɔ adido.

26 Ŋa korowɔ gyu adido, te ŋe tisiwɔ kɔŋ ateta,

baŋ be kyaa ŋe man nɛ sereewɔ te ba wose yeŋa wɔ.

27 Be gyɔɔ be nawɔɔ kpaŋte ŋgba baŋ bɔɔ dɛɛse nɛ,

bɔɔ gyeŋ kpene keŋ baa yɛɛ ya.

28 Keŋte be wiiwɔ baake Degbeŋgyoo lee ba wose kekyaŋ man,

te ɔ lese wɔ lee be kayeyɛɛ kenaŋ man.

29 Ɔ yelaa feliŋ dinaa keŋ fɛɛwɔ,

te feliŋ kegyɔ keŋ tinaa kegyɔ yela.

30 Te yɛɛ wɔ gyoŋ nyi ka te yɔkɔse,

te ɔ moo wɔ kelii be dɛɛseŋae man ŋgba mena keŋ bɛɛ gyae nɛ.

31 Ɛ yela baa fa Degbeŋgyoo karaŋ, lee ɔ balaŋ kegyae keŋ taŋ ɔto ya,

na ɔ gyakoloŋ nombia ŋan ɔ ne yɛɛ fa denibalaŋ nɛ dɔɔ.

32 Ɛ yela baa gyina ɔ yele adido balaŋ degyaŋee man,

na baa lese ɔ yele donɔɔ kegyiise degyaŋee man.

33 Ɔ yelaa booneŋ bese depampaa,

booneŋ nyee bese tɛɛle dowolosa.

34 Tɛɛle kpaakpaate bese tɛɛlekum,

lee baŋ be kyaa ke dɔɔ nɛ akpanyanyaŋ nombia keyɛɛ dɔɔ.

35 Ɔ besena depampaa yɛɛ depaa,

te dugbutu tɛɛle bese booneŋ nyee.

36 Ɔ yelaa baŋ tanam na ko wɔ nɛ ke kyaawɔ botɔɔ,

te be kara donɔɔ dinaa kyaa ke man.

37 Be fara wɔɔse duu gerepo ŋe man,

te be nyiŋa weenɛɛ nideli.

38 Ɔ hiraa wɔ yela be wukuwɔ nideli,

ɔ te yele be nunkyuese ke kɔɔkee ya.

39 Keŋte be yaanɔɔle kɔɔkeewɔ te be yɔkɔse wɔ,

lee kaŋeredo na kaale na waraŋsa kedi dɔɔ.

40 Ɔ doo be siamantena desɛŋ nideli,

ɔ yelaa be tɛɛwɔ yeyɛɛ depampaa man botɔɔ keŋ gbɛɛ be doo ya nɛ.

41 Mɔna ɔ gyinaa ayematena adido lee be kaale man,

te ɔ yelaa ba loŋtona wukuwɔ ŋgba namense dikpii nɛ.

42 Baŋ be gbɛɛneŋ tenɛɛ Wurubuarɛ siaman nɛ naawɔ te be nyaŋeewɔ,

mɔna akpanyanyaŋtena pou wuu be nɔɔse.

43 Walaŋ kamasɛ ŋon ɔ sia be kare nɛ, waa gyoo nombia kɛŋa man,

na waa gyueŋ Degbeŋgyoo kegyae ayɛɛsa.