1 Tɛɛle pou, ɛ nyaŋee fae yeesa fa Wurubuarɛ,

2 Ɛ kpee nɔɔneŋ lese ɔ gyoorobiiri yele,

ɛ mo obuo fa e na ɛ ka lese ɔ yele.

3 Ɛ yako Wurubuarɛ nyi, <Abɔɔ ŋan n ne yɛɛ nɛ dana gyakoloŋ.

N doŋ keŋ dokoso be kyaa ya,

mena dɔɔ n kɔlara ne buŋii neŋ.

4 Tɛɛle kei pou ne buŋ neŋ,

bee kpee yele kalese nɔɔneŋ fa neŋ,

bee kpee nɔɔneŋ lese n yele.

5 Ɛ kɔŋ kaa kɛɛ keŋ Wurubuarɛ be yɛɛ,

ɔ te yɛɛ gyakoloŋ nombia fa denibalaŋ.

6 Ɔ yelaa ɛpo bese tɛɛle dowolo,

be tɛɛwɔna be nawɔɔ toŋ loŋ keŋ,

botɔɔ te de nyaŋeewɔ lee wa ayɛŋ dɔɔ.

7 Ɔ na mo ɔ doŋ di gyoori kekpaakekpaa,

ɔ sia gyakaa tɛɛlese pou dɔɔ,

baŋ bɛɛ seŋ tia e nɛ, naa gyina ba wose ya.

8 Ɛmɛɛ balaŋ pou ɛ lese de Wurubuarɛ yele,

ɛ lese ɔ yele na balaŋ ke nyii.

9 Ŋon yelela te de kyaa nyeedoŋ man,

ɔ te yele de nawɔɔ ke sarakee ya.

10 Nyaŋ Wurubuarɛ te kɛɛse daa kɛɛ,

n te kyalase daa ŋgba kɔba wolom nɛ.

11 N yelaa da gyoowɔ kɔtase man,

te n moo kasolɔse yuŋ nyiŋan seele daa.

12 N yelaa balaŋ tɛɛwɔ da nyeeya dɔɔ,

de tɛɛwɔ boalaŋ na loŋse man,

mɔna n moo daa kɔŋ botɔɔ keŋ abɔɔ be gbigi nɛ.

13 Maa mo katoo kedeesa abɔɔ kɔŋ nyɔ ɔsom deni dinaa man,

na me kaa tɔ ma alaŋaŋ fa neŋ,

14 abɔɔ ŋan mɔɔ gyuusu me nɔɔ yako te mɔɔ kaŋ ntam,

debaŋ keŋ ma wose be kyaŋ maŋ nɛ.

15 Maa mo wonembia baŋ bɔɔ doo nuŋ,

na namense baala yɛɛ katoo kedeesa fa neŋ,

maa mo nunkyue baala na asoose deesi fa neŋ.

16 Ɛmɛɛ baŋ pou ɛ ne yee Wurubuarɛ nɛ ɛ kaa nyii,

ɛ yela maa yako ŋon keŋ ɔ be yɛɛ fa maŋ.

17 Me lɔɔ nɔɔ baake e,

te ma moo me laakem lese ɔ yele.

18 Nyi nombiakumɛɛ keyɛɛ deŋ doo me konɔɔ man nɛ,

nafɔ Wurubuarɛ be gyae waa nyii maŋ ya.

19 Mɔ ke gbagba na Wurubuarɛ nyii maŋ,

te ɔ tei ma kefane.

20 Ɛ lese Wurubuarɛ yele,

ɔ te bɛɛ ma kefane ya,

te ɔ ta lese ɔ kegyae lee me dɔɔ ya.