1 Wurubuarɛ, n kaboena nyi baa lese n yele Siyɔn,

nyaŋ te kaboena nyi baa tɔ alaŋaŋ fa neŋ.

2 Nyaŋ ŋon n ne nyii da kefane,

balaŋ pou baa kɔŋ n gyaŋ.

3 De nombiakumɛɛ kaa dii de dɔɔ na,

nyaŋ moona ŋe popou kyɛɛ daa.

4 Baŋ n ba lese wɔ, te n ba mo wɔ nyi be kaa kyaa nyɔ ɔsom deni dinaa man nɛ,

baŋna nyeebam.

N dekpaŋalaŋ man abɔɔ kpaakpaa ŋan te baa daa,

nyɔ ɔsom deni dinaa fereŋkyeŋ keŋ abɔɔ.

5 Da nyeelɛɛre Wurubuarɛ,

n ne yɛɛ gyakoloŋ nombia mo kpa daa,

n dɔɔ te tɛɛle kei ɔto balaŋ, na baŋ pou be kyaa ɛpo wɔle nɛ,

na mo be loo gyakaa.

6 Nyaŋ moona n doŋ see bulase mokɔɔ,

te n moo n doŋ bake gbegya.

7 N ne yɔkɔse ɛpo dɔɔ feliŋ kegyɔ,

na feliŋ keŋ ne gyɔɔ nɛ te tina yela,

n ne yele tɛɛlese yeesa kefae ne yɛɛ yididi.

8 N gyakoloŋ nombia ne yele gyakoloŋ na gyoo tɛɛle dɔɔ balaŋ pou,

n ne yele baŋ be kyaa weese dɛɛlee na weese dɛɛyalae pou

ne kpee kenyaŋee nɔɔneŋ.

9 N ne kɛɛ tɛɛle keŋ, na n te woli ke loŋ,

n ne desina ke nideli.

Loŋ te wulu Wurubuarɛ boŋobiise,

na ke yela balaŋ baŋ kenyiŋ weenɛɛ,

nawolo nyi mena te n doo ke.

10 N ne woli ka adaŋse ŋan loŋ, na ŋa te doo kyɛɛkyɛɛ,

n ne yele ɔga ne ŋɛɛ wooso ke, na n te hiraa ke weenɛɛ.

11 Kulutoo de gyu ɔto na weenɛɛ te gbigi,

wɔɔman abɔɔ te wulu nya anebiliŋiŋse pou.

12 Ŋalese ne tuu depampaa keŋ man burum,

kenyaŋee te wuu bulasebia pou dɔɔ.

13 Namense te lɛɛ wonembia dedii keŋ pou,

wamela te lɛɛ ataŋgyase ŋan man pou,

be popou ne nyaŋee kpee nɔɔneŋ.