Nɔɔneŋ 72

Kefane fa gyoo*72:1 Solomɔn nɔɔneŋ

1 Ao Wurubuarɛ, yela gyooneŋ kedi nombia kegbɛɛ dɔɔ,

yela gyoorobu ke yɛɛ nombia ŋan tenɛɛ.

2 Yela waa di n balaŋ nombia kegbɛɛ dɔɔ,

waa di baŋ bɔɔ ŋere wɔ do nɛ nombia kegbɛɛ dɔɔ fa wɔ.

3 Yela bulase ka mo wose kenyiŋ kɔna balaŋ baŋ,

na bulasebia ka mo nombia keyɛɛ kegbɛɛ dɔɔ kɔŋ.

4 Waa di lɛɛ ayematena balaŋ baŋ man,

na waa lɛɛ ayematena bia nyee,

waa di baŋ bɛɛ ŋere wɔ do nɛ dɔɔ.

5 Weese na gyaalaŋ nyiŋaa be kyaa nɛ,

waa kyaa kalola kegyakaare pou man.

6 Waa yɛɛ ŋgba ɔga ne ŋɛɛla woli ŋalese ŋan bɔɔ kɛrɛɛ ŋe dɔɔ nɛ,

ŋgba ɔga ne ŋɛɛla woli tɛɛle dɔɔ nɛ.

7 Balaŋ baa yɛɛ nombia ŋan tenɛɛ nɛ ɔ debaŋ man,

na baa nyiŋ ba wose kelii debaŋ keŋ gyaalaŋ ba tekaa kyaa ya.

8 Waa di gyoori lee ɛpo dɔɔ kelii ɛpo dɔɔ,

lee Eferatese boo dɔɔ kelii tɛɛle ɔto.

9 Baŋ be kyaa depampaa keŋ man nɛ baa buŋ e,

na ɔ kɔlara kaa buŋii e.

10 Taresisi gyooneŋ na baŋ be kyaa boo nɔɔnɔɔ nɛ,

baa tɔ toto fa e.

Gyooneŋ baŋ be kyaa Saba na Seba nɛ,

baa kaa fa e abɔɔ.

11 Gyooneŋ pou baa buŋ e,

na tɛɛlese pou ka som e.

12 Nawolo nyi ŋon ne gyaela waa lɛɛ ayematena baŋ bee wii bake e,

na baŋ bɔɔ ŋere wɔ do, keŋ be taŋ ŋolo ke lɛɛ wɔ ya nɛ.

13 Waa wii baŋ bɔɔ dana doŋ ya, na ayematena waraŋase,

na waa lɛɛ baŋ bɔɔ dana kolo ya nɛ lee yeŋ man.

14 Waa lese wɔ lee kaŋeredo na awudiina nyiŋmaa man,

nawolo nyi be fatabo na lee koya ɔ siaman.

15 Waa kyaa kyare.

Baa mo kɔba yayam lee Seba kɔna e.

Balaŋ baa fane fa e debaŋ kamasɛ,

na baa hiraa e wee kamasɛ.

16 Weenɛɛ dee gbigi tɛɛle keŋ pou dɔɔ,

ŋe dɛɛ gbigi kelii bulasebia pou nyeeya dɔɔ,

weenɛɛ dee de ŋgba Lebanɔn nɛ,

ŋgba ŋalese ŋan kyaa wɔɔman nɛ.

17 Waa lɛɛ yele kekpaakekpaa,

weese nyiŋaa ɔ kyaa nɛ, ɔ yele mɔ dee doo mena.

Wurubuarɛ waa ta ɔ dɔɔ hiraa tɛɛlese pou,

na baa baake e nyi nyeebam.

18 Ɛ lese Degbeŋgyoo Wurubuarɛ, Iserae Wurubuarɛ ŋon yele,

ŋon waageŋ ne yɛɛna gyakoloŋ nombia.

19 Ɛ lese ɔ gyoorobiiri yele kekpaakekpaa,

ɔ gyoorobiiri dɛɛ lɛɛ tɛɛle pou dɔɔ.

Dɛɛkɔŋ mena, Dɛɛkɔŋ mena.

20 Yese bu Dawide kefane keŋ ɔto yaa.