1 Naa yele ke takaa neŋ lee nombiakumɛɛ yɛɛra,

yaa n sia keyɛɛ baŋ bɛɛ yɛɛ keŋ be dei ya nɛ ya.

2 Nawolo nyi be gyae ke kyare ya baa boto ŋgba ŋale nɛ,

baa yekee ŋgba ŋalese nalaŋ nyiŋan nɛ.

3 Mo n wose lɔ Degbeŋgyoo dɔɔ na n ke yɛɛ deeli,

kyaa tɛɛle keŋ dɔɔ na n ke di ke weenɛɛ wose kefɛɛ man.

4 Yela Degbeŋgyoo ayɛɛsa kagyoo n sia,

na waa fa neŋ keŋ n konɔɔ ne gyae.

5 Mo n gbɛɛneŋ do Degbeŋgyoo nyiŋmaa man,

mo n wose lɔ ɔ dɔɔ na waa yɛɛ kɛŋa,

6 waa yela n katenee ke ŋalakee ŋgba tɛɛkena nɛ,

na n deŋele kedi ke yɛɛ ŋgba weese teŋteŋ nɛ.

7 Kyaa yididi Degbeŋgyoo siaman,

na n ke nyiŋ konɔɔ daa e,

abɔɔ de dee fa baale,

te be nombiakumɛɛ kebake de kɔŋ mena fa wɔ nɛ, naa yele ke takaa neŋ ya.

8 Wɔŋ n wose lee baŋ man, na n ke tina baŋkum yela.

naa gyeŋ baŋ ya, gyae ka mo neŋ gyu dukum man.

9 Nawolo nyi baa wɔlɛɛ balaŋ kumɛɛ,

mɔna baŋ be loo gyakaa Degbeŋgyoo dɔɔ nɛ, baa mo tɛɛle keŋ ŋgba be dedii nɛ.

10 Teka kyomii akpanyanyaŋtena be gyae baa tekaa kyaa ya,

nyaŋ ke kɛo wɔ mɔna n be gyae n ke naa wɔ ya.

11 Mɔna baŋ bɛɛ yɔkɔse ba wose nɛ, baa mo tɛɛle keŋ bese be wui,

na baa kyaa wosefɛɛreŋ man nyiŋ ba wose.

12 Akpanyanyaŋtena ne bake baŋ be tenɛɛ nɛ nyeeman,

te ba te ŋɛɛ be kela tee wɔ,

13 mɔna Degbeŋgyoo na boŋo akpanyanyaŋtena bo,

nawolo nyi ɔ gyeŋ nyi ba wee ne kɔŋ.

14 akpanyanyaŋtena ne wɔŋ be yoosila,

na ba te goo be baŋdaŋ,

nyi baa wɔŋ ayematena na baŋ bɔɔ dana kolo ya nɛ lɔ,

na baa ko baŋ be gbɛɛneŋ tenɛɛ nɛ.

15 Mɔna be yoosilase ŋan gyae ke sɔkee baŋ gbagba konɔɔse man,

na be baŋdaŋse ŋan ke tekerii.

16 Kolobii keŋ walaŋ ŋon ɔ gbɛɛneŋ tenɛɛ dana nɛ,

dei kela akpanyanyaŋtena abɔɔ burum ŋan be dana.

17 Degbeŋgyoo waa yɔkɔse akpanyanyaŋtena baameŋse,

mɔna waa kɛɛ baŋ ba tenɛɛ nɛ dɔɔ.

18 Degbeŋgyoo ne kɛɛna baŋ nombiikum be doo be man ya nɛ dɔɔ,

te be dedii gyae ke doo kekpaakekpaa.

19 Nyi nombiikum de yala wɔ na, baa seŋ keŋkeŋ,

Tanam ke yala man na, baa nyiŋ weenɛɛ burum.

20 Mɔna akpanyanyaŋte waa munu,

ŋgba mena keŋ weese ne yele kyeŋkyeŋkɔɔse ne kpiisi nɛ,

baa ŋaalaa pou ŋgba nyɔɔse nɛ.

21 Akpanyanyaŋte ne paa kolo te ɔ bɛɛ tɔ ya,

mɔna walaŋ ŋon ɔ tenɛɛ nɛ ne faa lee ɔ konɔɔ man.

22 Baŋ Degbeŋgyoo be hiraa wɔ nɛ, baa mo tɛɛle keŋ ŋgba be dedii nɛ,

mɔna baŋ ɔ be falaa wɔ nɛ baa munu.

23 Walaŋ ŋon Degbeŋgyoo nombia na gyoo ɔ sia nɛ,

waa kɛɛ ɔ nawɔɔ kekulu man.

24 Nyi ɔ gyɔ ɔ nae koraŋ na, ɔ be gyae waa yala ya,

nawolo nyi Degbeŋgyoo dana e ɔ nyiŋmaa man.

25 Nafɔ me yɛɛ bu e, nɛnɛɛ me ta bee,

mɔna ma te naata nyi ba te bɛɛ walaŋ ŋon ɔ tenɛɛ,

yaa nyi ɔ bia keta solee weenɛɛ ya.

26 Bɛɛ yɛɛ wɔe debaŋ kamasɛ, bɛɛ paa balaŋ abɔɔ lee be konɔɔ man,

mena dɔɔ baa hiraa be bia.

27 Wɔŋ n wose lee nombiakumɛɛ keyɛɛ man, na n ke yɛɛ deeli,

na n ke kyaa tɛɛle keŋ dɔɔ kekpaakekpaa.

28 Nawolo nyi Degbeŋgyoo ne gyae baŋ be nombia doona ke gbɛɛ nɛ,

ɔ be gyae waa bɛɛ ɔ balaŋ baŋ bee di anokoare nɛ ya.

Waa wɔlɛɛ baŋ bɛɛ yɛɛ nombia kumɛɛ nɛ korakora,

waa munu akpanyanyaŋte duuluŋ man balaŋ.

29 Baŋ ba tenɛɛ nɛ baa mo tɛɛle keŋ bese be wui,

na baa kyaa ke dɔɔ kekpaakekpaa.

30 Baŋ ba tenɛɛ nɛ na mo be nɔɔse kolosi nyansa nombia,

te be laakemse ne kolosi nombia ŋan doona ŋe gbɛɛ.

31 Be Wurubuarɛ mmaraa doo be konɔɔse man,

te be nawɔɔ bɛɛ sarakee ya.

32 Nombiakumɛɛ yɛɛre na deke ŋon ɔ tenɛɛ nɛ,

ɔ ne gyae nyi waa ko e,

33 mɔna Degbeŋgyoo be gyae waa yela akpanyanyaŋtena ke di be dɔɔ,

yaa baa bu wɔ fɔɔ nombia dedii man ya.

34 Daa Degbeŋgyoo,

na n ke ta ɔ gbɛɛneŋ man.

Waa gyina neŋ adido, na n ka mo tɛɛle yɛɛ n dedii,

akpaa be wɔlɛɛ akpanyanyaŋtena na, nyaŋ kena ke.

35 Ma te naa akpanyanyaŋte na nyeeman doŋte ŋolo,

ŋon ɔ be nyiŋ ɔ wose ŋgba daŋ keŋ seŋɛɛ tɛɛle kpaakpaa dɔɔ nɛ,

36 te kyare ya na, ɔ be kyaa bela ya,

me kaa kɛo e mɔna ma te naa e bela ya.

37 Mo n sia kɛɛ walaŋ ŋon nombiikum be doo ɔ man ya, na n ka gyene ŋon ɔ gbɛɛneŋ tenɛɛ nɛ,

n kena nyi be duuluŋ man balaŋ baa kyaa wosefɛɛreŋ man.

38 Mɔna baa wɔlɛɛ nombiakumɛɛ yɛɛra pou,

bɔɔ gyae baa nyiŋ duuluŋmantena ya.

39 Degbeŋgyoo ne lɛɛna baŋ ba tenɛɛ nɛ nyee,

nyi ba wose de kyaŋ wɔ na, ŋon te bee yeu kagyoo.

40 Degbeŋgyoo ne kyɔ wɔ na ɔ te lɛɛ wɔ,

ɔ ne lɛɛ wɔ lee akpanyanyaŋtena nyiŋmaa man, na ɔ te lɛɛ ba nyee,

nawolo nyi ŋon te bee yeu kagyoo.