1 Ɛmɛɛ balaŋ pou ɛ nyii,

ɛmɛɛ baŋ pou ɛ kyaa tɛɛle kei dɔɔ nɛ ɛ tei,

2 balaŋ yakaa nyibaŋ na kegyiise,

kɔbatena na ayematena pou.

3 Me nɔɔ gyae ke kolosi nyansa nombia,

nombia ŋan doo me konɔɔ man, gyae ke yela ɛ ke nyii nombia man.

4 Maa see deŋele maa nyii dudu,

maa mo adolɛɛ kegyɔ lese ma deboloo man.

5 Nyi weeya kumɛɛ de kɔŋ na woŋ dɔɔ te maa yee,

nyi akpanyanyaŋtena baŋ bɛɛ beo balaŋ de kilisi maŋ

6 baŋ bɛɛ mo ba wose lɔ ba wose kenyiŋ dɔɔ,

te bee gyina ba wose lee be kɔba keŋ be dana beiŋ dɔɔ nɛ?

7 Ŋolo be tale tɔ ɔ dɔɔ nyeeman kom,

yaa waa mo kolo fa Wurubuarɛ mo lɛɛ ba nyee ya.

8 Nawolo nyi nyeeman kom ketɔ keŋ dana koyadoŋ,

keŋ ŋolo be tale tɔ ke,

9 na waa kyaa kekpaakekpaa,

nyi ɔ ba gyoo yebɔɔ man ya.

10 Nawolo nyi dɛɛ naa nyi siakaralatena na yem,

mena te ayiŋtena na baŋ bɔɔ gyeŋ daale ya nɛ na yem,

na be te tina ba wose kenyiŋ see balaŋ wɔlɛɛ.

11 Nafɔ baŋ gbagba dana tɛɛlese ba wose dɔɔ,

mɔna nɛnɛɛ ba yebɔɔse ta bese be dɛɛse kekpaakekpaa,

keŋ baa kyaa botɔɔ be kalola kegyakaarese pou man.

12 Denibalaŋ na ba wosekenyiŋ koraŋ nɛ, bɔɔ gyae baa kyaa kyare ya,

be yɛɛ ŋgba wonembia baŋ bɛɛ yekee nɛ.

13 Mena ne gyaela kekɔŋ baŋ bɛɛ mo ba wose lɔ baŋ gbagba dɔɔ,

na baŋ be silana wɔ, te baŋ mɔ na mo ba wose lɔ be dɔɔ nɛ dɔɔ.

14 Be yɛɛ ŋgba namense nɛ, ba te kpaŋ wɔ fa yeŋ,

yeŋ ne gyaela ke kɛɛ be dɔɔ,

(mɔna baŋ be gbɛɛneŋ tenɛɛ nɛ baa di be dɔɔ nebo).

Be dinɔɔ gyae ke wɔlɛɛ yebɔɔ man,

baa kyaa lemlem lee be gyooro akpaŋalaŋ man.

15 Mɔna Wurubuarɛ waa lɛɛ ma nyee lee woyadɛɛ,

ke yɛɛ ampaŋ nyi waa mo maŋ gyu ɔ gyaŋ.

16 Nyi akpaa ŋolo de nyiŋ kɔba,

te ɔ nyiŋ akpaŋalaŋ kpaakpaa nɛ, naa yee ya.

17 Nawolo nyi akpaa ɔ yem na, ɔ be gyae waa mo kolo gyu ya,

ɔ wose kenyiŋ be gyae ke sila e gyu ya.

18 Doo nyi ɔ kekyaa man na ɔ ne kɛlɛɛ ɔ wose,

te balaŋ lese ɔ yele lee ɔ wose kenyiŋ dɔɔ,

19 mɔna baa gyu ke tuŋ be naanaɔ,

bɔɔ gyae baa naa keŋmaŋee bela ya.

20 Balaŋ baŋ be dana ba wose, mɔna bɔɔ ne nyii nombia man ya nɛ,

wɔɛ ŋgba wonembia baŋ bɛɛ yekee nɛ.