1 Maa kpee kegyae na nombia kedi kegbɛɛ dɔɔ nɔɔneŋ,

Degbeŋgyoo, nyaŋ te maa kpee nɔɔneŋ lese n yele.

2 Maa kɛɛ nideli nyi maa kyaa keŋ nombiikum be doo me man ya.

Woromɔ te nyaŋ ke kɔŋ me gyaŋ?

Maa mo konɔɔ keŋ nombiikum be doo ke man ya,

kyaa ma dekpaŋalaŋ man.

3 Mɔɔ gyae maa kɛɛ nombia ŋan taŋ tɔnɔɔ,

ke kɔŋ me dɔɔ ya.

Mɛɛ kɔla ŋan nombiakumɛɛ yɛɛra ne yɛɛ,

Mɔɔ gyae maa mo ma wose do ŋe man ya.

4 Konɔɔ keŋ ne tulii nombia naa benaa maŋ ya.

Mɔɔ gyae maa lɛɛ keŋ ke yɛɛ dukum ke do ya.

5 Ɔkamasɛ ŋon ɔ yoo wɔlɛɛ ɔ dɔɔ na,

maa wɔlɛɛ e,

Ɔkamasɛ ŋon ɔ dana agaŋtaŋ te ɔ ne gate ɔ wose nɛ,

mɔɔ gyae maa sɛɛ e ya.

6 Me sia gyae ke gyakaa baŋ bee di anokoare tɛɛle keŋ dɔɔ nɛ dɔɔ,

na baa kyaa me gyaŋ,

ŋon nombiikum be doo ɔ wose man ya nɛ,

waa som maŋ.

7 Ŋon ɔ na beo balaŋ nɛ,

be gyae waa kyaa ma dekpaŋalaŋ man ya,

ŋon ɔ ne di dekara nɛ,

be gyae waa seŋ me siaman ya.

8 Nebo kamasɛ maa lese akpanyanyaŋtena pou,

lee tɛɛle keŋ man.

Maa munu nombiakumɛɛ yɛɛra pou,

lee Degbeŋgyoo donɔɔ dinaa keŋ man.