1 Degbeŋgyoo me Wurubuarɛ, ma te yeu kaa gyoo neŋ,

lɛɛ maŋ na n ka lese maŋ lee baŋ pou bee gegi maŋ nɛ nyiŋmaa man.

2 Na mena ya na baa tirii maŋ ŋgba dinaate nɛ,

na baa kyekpetee maŋ keŋ ŋolo be lɛɛ maŋ ya.

3 Ao Degbeŋgyoo me Wurubuarɛ, nyi akpaa ma te yɛɛ kei,

mo me nyiŋmaase yɛɛ kolo kum,

4 yaa me ta mo dukum tɔ me dɔɔ ŋolo kom,

yaa me ta ŋere me kɔlare ŋolo do keŋ ɔ te yɛɛ maŋ kolo ya nɛ,

5 kenaŋ na yela me kɔlare ke gegi maŋ kyaŋ,

yela waa sakatee ma nyeedoŋ tɛɛle dɔɔ,

na waa mo me sia tiu tɛɛle na maa doo akuŋkuŋ man.

6 Degbeŋgyoo, koro n baŋ man,

koro seŋ tia me kɔlara baŋ nedoŋ keŋ.

Me Wurubuarɛ wosi n wose, di nombia kegbɛɛ dɔɔ.

7 Yela tɛɛlese pou kaa yilaa kilisi neŋ,

na n kaa kyaa n gyoorobiiri gbeli dɔɔ adido di gyoori be dɔɔ.

8 Degbeŋgyoo ne di balaŋ nombia.

Ao Degbeŋgyoo, di me nombia lee ma anokoare kedi,

na mena keŋ nombiikum be doo me man ya dɔɔ.

9 Yela akpanyanyaŋtena nombiakumɛɛ keyɛɛ kekɔŋ ɔto,

na n ke yela walaŋ ŋon ɔ gbɛɛneŋ tenɛɛ nɛ ka seŋ ɔ nae dɔɔ.

Nyaŋ yɛna Wurubuarɛ ŋon n tenɛɛ,

te n na gyoo walaŋ nyeempɔ na ɔ konɔɔ man kɛɛ.

10 Wurubuarɛ Adidote yɛna me yoo nyeele pampasaŋ,

ŋon ne lɛɛna baŋ be konɔɔse man dei nɛ nyee.

11 Wurubuarɛ ne di nombia kegbɛɛ dɔɔ,

ɔ yɛɛ Wurubuarɛ ŋon ɔ ne bu fɔɔ wee kamasɛ.

12 Akpaa ŋolo te kyɛɛkee lee ɔ gbɛɛneŋ kumɛɛ man ya na, Wurubuarɛ waa sara ɔ yoosila,

waa buŋ na waa maa ɔ baŋdaŋ.

13 Ɔ te desina ɔ yoo abɔɔ kumɛɛ ŋan see,

ɔ te desina baŋdaŋ nyeela ŋan ne ŋalakee nɛ see.

14 Kɛɛ, ɔ kamasɛ ŋon ɔ dana nombiakumɛɛ keyɛɛ fulu,

ne kyaŋ kayeyɛɛ fulu na ɔ ta lola akɛrɛɛ.

15 Walaŋ kamasɛ ŋon ɔ wula dowokom nɛ,

ɔ ne yale gyoo bɔɔ keŋ ɔ be wulu nɛ man.

16 Nombiakumɛɛ ŋan bɛɛ yɛɛ nɛ, na bese bo kɔŋ baŋ gbagba dɔɔ,

be nombia akaraŋkaraŋ na bese bo seele baŋ gbagba.

17 Maa fa Degbeŋgyoo karaŋ nawolo nyi ɔ tenɛɛ,

Maa kpee nɔɔneŋ lese Degbeŋgyoo Adidote ŋon yele.