1 Me nyiŋa konɔɔ kɛɛ Degbeŋgyoo siaman,

ɔ besenaa ɔ sia tee maŋ te ɔ nyii me kewii.

2 Ɔ lese maŋ lee bɔɔ keŋ ne sarakee nɛ man,

lee depate tɛɛle keŋ man,

ɔ moo maŋ ka seŋ kpanaŋ dɔɔ,

te ɔ faa maŋ daseŋae kpaakpaa.

3 Ɔ moo nɔɔneŋ wɔle do me nɔɔman,

nɔɔneŋ keŋ maa kpee lese Wurubuarɛ yele.

Balaŋ burum baa naa na baa yee Degbeŋgyoo,

na baa mo be loo gyakaa ɔ dɔɔ.

4 Walaŋ ŋon,

ɔ na mo ɔ wose lɔ Degbeŋgyoo dɔɔ,

te ɔ bɛɛ mo ɔ sia gyakaa baŋ bee gyina ba wose dɔɔ,

yaa baŋ bɛɛ bese be wɔle kasom akɛrɛɛ wurubuarɛse ya nɛ, ŋonna nyeebam.

5 Degbeŋgyoo me Wurubuarɛ,

n gyakoloŋ nombia,

na abɔɔ ŋan n be bake nyi nyaŋ ke yɛɛ fa daa nɛ boe burum.

Ŋolo be kyaa keŋ baa mo maana neŋ ya,

akpaa me yako nyi maa kaŋtee nya ayɛɛsa nɛ,

ŋolo be tale kala ŋa ya.

6 Kedeesase na abɔɔ kefa bɛɛ gyoo n sia ya,

mɔna n ta toro ma deŋela,

n bɛɛ bɔɔse katoo kedeesase na dukum kedeesase ya.

7 Keŋte me yakowɔ nyiaa, <<Maŋ yaa, ma te kɔŋ.

Ba te ŋmarase ma wose man nombia do tɔne keŋ man.

8 Me Wurubuarɛ, mɛɛ gyae nyi maa yɛɛ n kegyaebii,

nyaŋ mmaraa keŋ doo me konɔɔ man.>>

9 Ma te kolosi n nyeekelɛɛ nombia ŋan balaŋ burum degyaŋee man,

Degbeŋgyoo, me te wuu me nɔɔ nyi mɔɔ kolosi ŋa ya,

ŋgba mena keŋ n gyeŋ nɛ.

10 Me ta mo n katenee weese me konɔɔ man ya,

me kolosi nya anokoare na n nyeekelɛɛ nombia ŋan.

me te wuu n kegyae na nya anokoare nombia ŋan dɔɔ,

balaŋ burum degyaŋee man ya.

11 Degbeŋgyoo, naa lese n waraŋase kewii lee me dɔɔ ya,

yela n kegyae na nya anokoare kedi ke gyee maŋ debaŋ kamasɛ.

12 Nawolo nyi nombiakumɛɛ ŋan ŋolo be tale kala ya, te kilisi maŋ,

me dukum ta boo kela maŋ te mɔɔ ne naa ya.

Ŋa boe kela ma nyeenyɔɔse,

ŋa te yele ma woo te yeu lee me gyaŋ.

13 Degbeŋgyoo, yela me nombia ka gyoo n sia na n ke lɛɛ maŋ,

Degbeŋgyoo, yɛɛ bileŋ na n kaa kyɔ maŋ.

14 Yela desɛŋ ke kyaŋ baŋ pou bɛɛ gyae ma yeŋ nɛ,

na kekolosi ka gyoo wɔ,

yela baŋ pou bɛɛ gyae ma kewɔlɛɛ nɛ, ka mo desɛŋ bese be wɔle.

15 Yela baŋ pou bɛɛ yako maŋ nyi, <Mbo, mbo> nɛ,

nɔɔ ke doo wɔ lee ba desɛŋ dɔɔ.

16 Yela baŋ pou bɛɛ kɛo neŋ nɛ,

ke nyaŋee na ke yɛɛ wɔ gyoŋ lee nyaŋ dɔɔ,

yela baŋ pou bɛɛ gyae n nyeekelɛɛ nɛ, ke yako debaŋ kamasɛ nyiaa,

Degbeŋgyoo boe.

17 Mɔna maŋ dɔɔ, me yɛɛ diyemte e, te me nombia dana waraŋase,

mɔna Degbeŋgyoo na gyueŋ me dɔɔ,

nyaŋ ne kyɔɔna maŋ te n ne lɛɛ maŋ,

nyaŋ yɛna me Wurubuarɛ, naa dɔɔ wɔle ya.